Êsêkiêl 47 - Nau Brah Ndu Ngơi 2023

N'hor dak krong hoch luh tă bơh ngih brah

¹ Jêh ta nây, păng leo gâp hăn đŏng rlet ma mpông pêr ngih brah jêh ri aơ, n'hor dak krong luh tă bơh tâm dâng mbong ngih brah hoch rlet mpeh luh nar (yorlah ngih brah ndâk rle luh nar). N'hor dak nây tă bơh pŭng pa ma ngih brah jŭr hoch mpeh pa dâng nơng ƀư brah.

² Păng leo gâp luh ma trong mpông pêr mpeh pa lơ jêh ri leo gâp ndăch padih tât ta mpông pêr padih mpeh luh nar jêh ri dak hoch tă mpeh pa dâng.

³ Păng hăn rlet mpeh luh nar, ta ti djôt du njăr rse veh, bunuyh nây veh geh prăm rhiăng met, jêh ri leo gâp re rgăn dak; dak nây jru dah rmăng jâng iăr.

⁴ Păng veh đŏng prăm rhiăng met jêh ri leo gâp hăn rgăn dak; dak nây jru tât kômâk. Păng veh tay prăm rhiăng met đŏng jêh ri leo gâp hăn rgăn dak; dak nây jru dah bŭt.

⁵ Păng veh tay prăm rhiăng met đŏng; rnôk nây jêng du n'hong dak krong gâp mâu dơi rgăn ôh yorlah dak lĕ hao jêh, mra re rgăn; nây jêng du n'hong dak krong bu mâu dơi rgăn ôh.

⁶ Rnôk nây, păng lah ma gâp: “Hơi kon bunuyh, may saơ lĕ?” Jêh nây păng leo gâp plơ̆ sĭt ta ntŭk kơh dak krong.

⁷ Tơlah tât jêh ta nây, aơ, bar đah ding kơh dak krong geh âk ngăn tơm si.

⁸ Păng lah ma gâp: “N'hong dak aơ hoch tât mpeh luh nar jŭr ntŭk neh lâng jêh ri hoch rlet dak mƀŭt, jêh ri tơlah hŏ hoch jêh rlet ma dak mƀŭt pôri dak mƀŭt ri rgâl jêng rsang.

⁹ Ăp ntŭk dak krong nây hoch tât pôri lĕ rngôch mpa rêh, nây jêng mpa rêh mpât rêh tâm dak, mra dơi rêh da dê jêh ri ta nây mra geh âk ntil ka. Ta ntŭk dak nây hoch tât pôri dak mƀŭt jêng rsang, jêh ri ta ntŭk dak krong nây hoch tât pôri lĕ rngôch mpa mra rêh ta nây.

¹⁰ Phung seng ka mra gŭ ta kơh dak krong nây; tă bơh Êngêdi kŏ tât ma ƀon Ên-Êglaim mra jêng ntŭk nthăng nhuăl. Ta nây, geh ka âk ntil êng, nâm bu ka tâm Dak Mƀŭt Toyh.

¹¹ Ƀiălah lĕ djut trâp păng mâu mra jêng kah ôh bu dŏng ƀư lŏ boh.

¹² Ta klơ kơh dak krong nây, đah aơ jêh ri đah ri, mra hon geh ăp ntil tơm si geh play sa, n'ha păng mâu blau kro ôh jêh ri play păng mâu tăch yơt lĕ. Ăp khay, khân păng mra geh play mhe, yorlah dak hoch luh tă bơh ntŭk kloh ueh djrah ăn ma khân păng. Play păng dŏng gay ma sa, n'ha păng prăp ma ƀư dak si.”

N'har bri neh mhe

¹³ Kôranh Brah Yêhôva lah: “Aơ jêng n'har n'gor bri neh khân may mra tâm pă ăn ma jât ma bar ndŭl mpôl phung Israel ƀư drăp ndơn. Y-Yôsep mra geh bar kô̆.

¹⁴ Ăn khân may mra tâm pă ndrăng khân may nơm ƀư drăp ndơn yorlah Gâp ton jêh mra ăn neh aơ ma phung chô yau khân may, jêh ri khân may mra geh neh nây ƀư drăp ndơn.

¹⁵ Aơ jêng n'har neh: Mpeh pa lơ, tă bơh Dak Mƀŭt Toyh tĭng trong ƀon Hêtlôn kŏ tât trong leo hăn tât ta ƀon Sêdat,

¹⁶ ƀon Hamat, ƀon Bêrôtha, ƀon Sibraim (n'har vah vang ƀon Damas jêh ri ƀon Hamat), ƀon Haser-Hatikôn, ƀon nây gŭ ta n'har ƀon Hauran.

¹⁷ N'har neh aơ mra ntơm bơh dak mƀŭt tât ma ƀon Hasar-Ênon tât ta n'har mpeh pa lơ ƀon Damas, jêh ri tât n'har ƀon Hamat mpeh pa lơ.

¹⁸ Mpeh luh nar ntơm bơh vah vang ƀon Hauran, ƀon Damas, bri Gilêat jêh ri bri Israel, njŏ tĭng dak krong Yurdan. Khân may mra veh tă bơh n'har mpeh pa lơ kŏ tât ma dak mƀŭt mpeh luh nar. Nây mra jêng n'har mpeh luh nar.

¹⁹ Mpeh pa dâng ntơm bơh Tamar kŏ tât ma dak krong Mêriba ta Kadês, tât ma n'hong Êjipt kŏ tât ma Dak Mƀŭt Toyh. Nây jêng n'har mpeh pa dâng.

²⁰ Mpeh nhâp nar mra jêng Dak Mƀŭt Toyh, tă bơh n'har mpeh pa dâng kŏ tât ntŭk lăp ƀon Hamat. Aơ jêng n'har mpeh nhâp nar.

²¹ Khân may mra tâm pă bri aơ ndrăng khân may nơm tĭng nâm mpôl băl Israel.

²² Ăn khân may mra nchroh gay tâm pă drăp ndơn ăn ma khân may nơm jêh ri phung bu năch gŭ ta nklang khân may jêh ri deh kon sau ta nklang khân may. Khân may uănh khân păng nâm bu phung ƀon lan deh jêh ri văch ma toyh tâm bri Israel; khân may ăt dơi tâm pă drăp ndơn ta nklang phung mpôl băl Israel.

²³ Ta moh mpôl băl phung bu năch gŭ, khân may mra sŏk drăp ndơn ăn ma khân păng,” Kôranh Brah Yêhôva lah pônây.