Êsêkiêl 46 - Nau Brah Ndu Ngơi 2023

Lĕ nau vay ntăm ƀaƀă

¹ Kôranh Brah Yêhôva lah: “Mpông pêr tâm ndring ta trôm mpeh luh nar mra ntĭl dôl prao nar pah kah, ƀiălah mra pơk tâm nar saƀat jêh ri tâm nar ntơm luh khay mhe.

² Hađăch mra lăp ta nây ma mpông pêr nhuang panăp jêh ri dâk dăch jrŏng mpông pêr dôl phung kôranh ƀư brah mra nhhơr ndơ ƀư brah gŭch jêh ri ndơ ƀư brah ma nau đăp mpăn. Hađăch mra chon mon mbah ta ntŭk lăp mpông pêr jêh ri du luh, ƀiălah mpông pêr mâu mra ntĭl ôh êlor măng.

³ Tâm lĕ nar saƀat jêh ri tâm nar ntơm luh khay mhe, phung ƀon lan tâm n'gor mra yơk mbah tanăp măt Brah Yêhôva ta ntŭk lăp mpông pêr nây.

⁴ Ndơ ƀư brah gŭch hađăch nhhơr ăn ma Brah Yêhôva tâm nar saƀat jêng prao mlâm biăp kon mâu geh têl ôh jêh ri du mlâm biăp nkuăng mâu geh têl.

⁵ Ndơ ƀư brah rnih môi mra jêng du êpha rnih nhhơr ma biăp nkuăng, bi ma ndơ ƀư brah rnih môi nhhơr ndrel ma lĕ biăp kon pôri ndah âk hađăch nhhơr tĭng nâm dơi jêh ri tâm du êpha rnih ndrel du hin dak ngi ôlive.

⁶ Ta nar ntơm luh khay mhe, hađăch mra nhhơr du mlâm ndrôk nkuăng ndăm mâu geh têl, prao mlâm biăp kon jêh ri du mlâm biăp nkuăng ăt mâu geh têl ôh.

⁷ Bi ma ndơ ƀư brah rnih môi, hađăch mra nhhơr du êpha ndrel ma du mlâm ndrôk nkuăng, du êpha rnih ndrel ma biăp nkuăng. Bi ma lĕ biăp kon ndah âk hađăch nhhơr tĭng nâm dơi jêh ri du êpha rnih ndrel du hin dak ngi ôlive.

⁸ Tơlah hađăch hăn lăp mra hăn rgăn nhuang panăp mpông pêr jêh ri mra hăn tĭng trong nây tâm ban lĕ.

⁹ Tơlah phung ƀon lan tâm n'gor bri văch dăn tanăp Brah Yêhôva tâm lĕ yan nau rƀŭn, tơlah mbu nơm lăp ta mpông pêr mpeh pa lơ gay ma yơk mbah mra luh ta mpông pêr mpeh pa dâng; bi ma mbu nơm lăp mpông pêr mpeh pa dâng mra luh ta mpông mpeh pa lơ. Mâu geh du huê nuyh dơi plơ̆ sĭt ôh ta mpông pêr păng hŏ lăp, ƀiălah mra du luh sŏng tra năp păng nơm.

¹⁰ Hađăch ndrel phung ƀon lan mra hăn lăp du tơ̆ jêh ri tơlah phung ƀon lan du luh hađăch ăt du luh đŏng.

¹¹ Tâm lĕ nau tâm rƀŭn jêh ri lĕ nar tâm rƀŭn toyh, ndơ ƀư brah rnih môi mra jêng du êpha rnih ndrel ndrôk nkuăng, du êpha rnih nhhơr ndrel du mlâm biăp nkuăng. Bi ma lĕ biăp kon hađăch ŭch nhhơr ndah tĭng nâm dơi, tâm du êpha rnih ndrel ma du hin dak ngi ôlive.

¹² Tơlah hađăch nhhơr ma Brah Yêhôva ndơ ƀư brah tĭng ŭch, nđâp lah ndơ ƀư brah gŭch mâu lah ndơ ƀư brah ma nau đăp mpăn, pôri bu mra pơk mpông pêr mpeh luh nar ăn ma hađăch. Hađăch mra nhhơr ndơ ƀư brah gŭch mâu lah ndơ ƀư brah ma nau đăp mpăn nâm bu hađăch hŏ nhhơr jêh ndơ ƀư brah nây ta nar saƀat. Jêh nây, hađăch du luh, jêh ri tơlah hŏ du luh jêh pôri mpông pêr bu dơi ntĭl lơi.”

¹³ “Ăp nar, hađăch mra nhhơr ma Brah Yêhôva du mlâm biăp kon du năm mâu sôt jêng ndơ ƀư brah gŭch tâm ăp ôi.

¹⁴ Ăp ôi, hađăch mra nhhơr biăp kon nây ndrel du kô̆ tâm prao êpha rnih, ndrel ma du kô̆ tâm pe hin dak ngi ôlive gay pot đah rnih. Ndơ ƀư brah rnih môi nhhơr ma Brah Yêhôva ăp nar jêng nau vay ƀư n'ho ro.

¹⁵ Lĕ rngôch ăp ôi, bu mra nhhơr biăp kon, ndơ ƀư brah rnih môi jêh ri dak ngi ôlive ƀư ndơ ƀư brah gŭch ăp nar.”

¹⁶ Kôranh Brah Yêhôva lah: “Tơlah hađăch sŏk moh ndơ tă bơh drăp ndơ păng ăn du huê tâm phung kon bu klâu păng nơm pôri ndơ nây mra jêng ndơ lĕ kon bu klâu hađăch. Nây jêng drăp ndơ khân păng yor nau dơi ndơn drăp.

¹⁷ Ƀiălah tơlah hađăch sŏk du ntil tâm drăp ndơ păng geh ăn ma du huê tâm phung oh mon păng pôri ndơ nây mra jêng ndơ bunuyh oh mon kŏ tât ma năm nau jêng kon me; rnôk nây ndơ nây mra mplơ̆ sĭt ma hađăch nơm. Drăp ndơ hađăch mra jêng ndơ phung kon bu klâu păng.

¹⁸ Hađăch mâu sŏk ôh du ntil ndơ jêng drăp ndơ phung ƀon lan jêh ri mprơh khân păng tă bơh drăp ndơn khân păng. Hađăch mra sŏk ndơ êng păng nơm ăn phung kon bu klâu păng ƀư drăp ndơ gay ma mâu geh du huê tâm phung ƀon lan Gâp mâu geh ôh roh drăp ndơ khân păng.”

¹⁹ Jêh ta nây, păng leo gâp rgăn ta mpông kêng meng mpông pêr jêh ri leo gâp lăp tâm lĕ jrô kloh ueh ma phung kôranh ƀư brah rlet mpeh pa lơ, jêh ri aơ, ta nây geh du ntŭk bôl dŭt mpeh nhâp nar.

²⁰ Păng lah ma gâp: “Nây jêng ntŭk phung kôranh ƀư brah gâm lĕ ndơ ƀư brah chuai nau tih jêh ri chuai nau ƀư tih, ndrel n'hôl lĕ ndơ ƀư brah rnih môi gay mâu djôt leo ôh ndơ nây tât tâm ntŭk ndring padih jêh ri ƀư ăn phung ƀon lan jêng kloh lĕ.”

²¹ Jêh nây păng djôt gâp hăn luh ndring padih jêh ri leo gâp tât puăn njônh ndring; aơ, ăp njônh ndring geh du ndring jê̆.

²² Tâm puăn njônh ndring geh ndring jê̆ văr jŭm jong bar jât met jêh ri huy jât prăm met; lĕ rngôch puăn ndring ta puăn njônh nây geh tâm ban da dê.

²³ Geh du mlâm mpir văr jŭm lĕ puăn ndring jêh ri geh ŭnh năk văr jŭm tâm dâng jâng mpir nây.

²⁴ Bunuyh nây lah ma gâp pô aơ: “Aơ jêng ngih ŭnh, jêng ntŭk phung bunuyh pah kan tâm ngih brah gâm puăch lĕ ndơ ƀư brah ma phung ƀon lan.”