Êsêkiêl 45 - Nau Brah Ndu Ngơi 2023

Nau tâm pă n'gor

¹ “Tơlah khân may tâm nchroh gay tâm pă n'gor ƀư drăp ndơn, ăn khân may sŏk lor du kô̆ nhhơr ma Brah Yêhôva; nây jêng du kô̆ neh kloh ueh. Păng geh bar jât rbăn prăm rhiăng met jong jêh ri nau dĭ rkăng jêng prăm met. Lĕ rngôch nkual mra jêng kloh ueh.

² Ta klơ kô̆ neh nây, ăn khân may sŏk du ntŭk neh njok rkăng tâm ban gay ƀư ntŭk kloh ueh, nau jong bar rhiăng prăm jât met, nau dĭ rkăng ăt bar rhiăng prăm jât met. Văr jŭm ntŭk neh nây mra geh du ntŭk neh nsoih jêng bar jât prăm met.

³ Tâm nkual neh kloh ueh nây, ăn khân may prăp êng du ntŭk neh nau jong geh jât bar rmưn prăm rhiăng jêh ri nau huy prăm rbăn met gay ƀư ntŭk kloh ueh, ta nây jêng ntŭk dŭt kloh ueh.

⁴ Nây jêng du kô̆ neh kloh ueh jêng nkual prăp ăn ma lĕ phung kôranh ƀư brah jêng nơm pah kan tâm ntŭk kloh ueh jêh ri văch dăch Brah Yêhôva gay pah kan ma Păng. Nây jêng ntŭk gay ndâk ngih ăn ma khân păng jêh ri du ntŭk kloh ueh ăn ntŭk kloh ueh.

⁵ Du ntŭk neh êng nau jong geh jât ma bar rmưn prăm rhiăng met, nau dĭ rkăng prăm rbăn met, njêng ndơ mpeh ma phung Lêvi. Lĕ phung aơ pah kan tâm ngih brah jêh ri geh bar jât ƀon.

⁶ Ta meng kô̆ neh kloh ueh, ăn khân may sŏk du kô̆ neh nau dĭ rkăng bar rbăn prăm rhiăng met jêh ri nau jong geh jêng jât bar rmưn prăm rhiăng met, gay ndâk ƀon. Păng mra jêng ndơ mpeh ma lĕ rngôch ngih Israel.

⁷ Hađăch geh kô̆ neh n'har yor du pŭng jêng neh kloh ueh jêh ri du pŭng jêng neh ndâk ƀon. Neh nây rlet mpeh nhâp nar tât n'har bri mpeh nhâp nar bri dak, mpeh luh nar tât n'har bri mpeh luh nar bri dak. Nau jong ntơm bơh n'har bri mpeh luh nar tât n'har bri mpeh nhâp nar ăt tâm ban ma ntơm bơh mpôl băl aơ tât ma mpôl băl ri.

⁸ Kô̆ neh nây mra jêng drăp ndơn hađăch bri Israel. Phung hađăch Gâp mâu mra tŭn jot phung ƀon lan Gâp đŏng ôh, ƀiălah mra tâm pă kô̆ neh hôm e ăn lĕ mpôl băl Israel.

⁹ Kôranh Brah Yêhôva lah: ‘Hơi phung hađăch Israel, găp jêh khân may ƀư pônây! Chalơi hom nau ƀư djơh jêh ri tŭn jot, ƀư hom nau sŏng, nau di. Rlu hom nau pit in drăp ndơ ƀon lan Gâp, Kôranh Brah Yêhôva Brah lah pônây.’”

Lĕ ndơ tâm nal ma ndơ veh jêh ri lĕ ndơ ƀư brah

¹⁰ “Dŏng hom lĕ njing ăn di, du êpha ăn di, du mlâm khăl ngan ăn di.

¹¹ Êpha jêh ri ngan mra veh njing tâm ban; du ngan prăp du kô̆ tâm jât hômer; hômer mra jêng njing bu veh.

¹² Du sêkel mra jêng bar jât gêra; bar jât sêkel tâm rƀŭn đah bar jât ma prăm sêkel, rƀŭn đah jât ma prăm sêkel mra jêng du mina.

¹³ Aơ jêng ndơ khân may mra nhhơr: Tâm ăp du hômer ba ƀlê sŏk du kô̆ prao êpha, tâm ăp du hômer ba ôrgơ sŏk du kô̆ prao êpha.

¹⁴ Bi ma dak ngi ôlive, dơi veh đah ngan, tâm ăp kôr sŏk du kô̆ tâm jât (du kôr jêng tâm ban ma du hômer mâu lah jât ngan, yorlah jât ngan jêng du hômer.)

¹⁵ Tâm lĕ ndrêch gơ̆ nse phung Israel, geh bar rhiăng mlâm biăp mra sŏk du mlâm biăp kon gay ƀư ndơ ƀư brah rnih môi, ndơ ƀư brah gŭch, jêh ri ndơ ƀư brah ma nau đăp mpăn gay chuai nau tih phung ƀon lan khân păng, Kôranh Brah Yêhôva lah pônây.

¹⁶ Lĕ rngôch phung ƀon lan tâm n'gor bri nây mra ăn ndơ nhhơr ma hađăch Israel.

¹⁷ Ƀiălah hađăch djôt prăp ndrăp nkra lĕ ndơ ƀư brah gŭch, ndơ ƀư brah rnih môi jêh ri ndơ nhhơr nhêt tâm lĕ nar tâm rƀŭn, nar luh khay mhe, nar saƀat ndrel ma lĕ rngôch nar rƀŭn tâm ngih Israel. Hađăch mra nhhơr ndơ ƀư brah chuai nau tih, ndơ ƀư brah rnih môi, ndơ ƀư brah gŭch jêh ri ndơ ƀư brah ma nau đăp mpăn gay chuai nau tih ăn ma ngih Israel.”

Lĕ nau rƀŭn

¹⁸ Kôranh Brah Yêhôva lah: “Năng nguay khay nguay, ăn may sŏk hom du mlâm ndrôk nkuăng ndăm mâu geh têl khap jêh ri ƀư kloh ntŭk kloh ueh.

¹⁹ Kôranh ƀư brah mra sŏk mham mpa ƀư brah chuai nau tih mhĭng mham ta lĕ jrŏng mpông ngih brah, ta puăn njônh ndơ ndor năp nơng ƀư rah jêh ri ta lĕ jrŏng mpông pêr tâm ndring ta trôm.

²⁰ Năng pơh tâm khay nây, ăt may ƀư tâm ban pônây ăn ma phung yor mâu gĭt rbăng mâu lah rluk ƀư tih. Nâm pônây, may mra ƀư brah chuai nau tih ăn ma ngih brah.

²¹ Nar năng jât ma puăn khay nguay, ăn khân may djôt prăp hom rƀŭn Nau Găn; khân may mra sa piăng let mâu geh ndrui tâm pơh nar.

²² Tâm nar nây, hađăch mra yor păng nơm jêh ri yor lĕ rngôch phung ƀon lan tâm n'gor ndrăp du mlâm ndrôk nkuăng ndăm jêng ndơ ƀư brah chuai nau tih.

²³ Tâm pơh nar năng rƀŭn, ăp nar hađăch ndrăp pơh mlâm ndrôk nkuăng jêh ri pơh mlâm biăp nkuăng mâu geh ntŭk mhĭk ôh ƀư brah gŭch ăn ma Brah Yêhôva tâm pơh nar, jêh ri ăp nar du mlâm be nkuăng ƀư ndơ brah chuai nau tih.

²⁴ Hađăch ntop đŏng tâm nây tâm ăp nar ndrôk nkuăng du êpha, ăp mlâm biăp nkuăng du êpha, ăp êpha du hin dak ngi gay ƀư ndơ ƀư brah rnih môi.

²⁵ Tâm nar bŏng khay pơh năng tâm rƀŭn jêh ri lĕ tâm pơh nar, tâm ban lĕ hađăch mra ndrăp ndơ ƀư brah chuai nau tih, ndơ ƀư brah gŭch, ndơ ƀư brah rnih môi jêh ri ma dak ngi ôlive nâm bu saơm.”