Êsêkiêl 44 - Nau Brah Ndu Ngơi 2023

Phung gŭ ta ntŭk kloh ueh

¹ Păng leo gâp tât mpông pêr padih ntŭk kloh ueh mpeh luh nar. Mpông nây hôm e nchăng.

² Brah Yêhôva lah ma gâp: “Mpông pêr aơ mra ntĭl mro, mâu pơk đŏng ôh. Mâu geh nuyh dơi lăp mpông pêr aơ yorlah Yêhôva Brah Ndu Israel hŏ lăp ma mpông nây. Yor ri, mpông nây mra ntĭl lơi.

³ Geh knŏng du huê hađăch mơ dơi tât gŭ ta nây gay sa piăng let tanăp Brah Yêhôva. Hađăch mra hăn lăp tă bơh nhuang panăp mpông pêr jêh ri luh tă bơh trong nây lĕ.”

⁴ Jêh nây păng leo gâp tât panăp ngih brah ta mpông pêr mpeh pa lơ. Gâp uănh treng, aơ, nau chrêk ma lơp Brah Yêhôva bêng ngih Brah Yêhôva, jêh ri gâp păn muh măt ta neh.

⁵ Rnôk nây, Brah Yêhôva lah ma gâp: “Hơi kon bunuyh, sek uănh hom, uănh nanê̆ ma măt jêh ri iăt ma tôr lĕ rngôch ntil nau Gâp mra lah ma may ma lĕ rngôch nau vay ƀư jêh ri nau vay ma ngih brah Brah Yêhôva. Sek uănh hom ntŭk lăp ngih brah, jêh ri lĕ rngôch trong luh tă bơh ntŭk kloh ueh.

⁶ Ăn may lah hom ma phung vay tâm rdâng, jêng ma ngih Israel pô aơ, Kôranh Brah Yêhôva lah: ‘Hơi ngih Israel, lĕ rngôch nau ƀơ̆ khân may hŏ ƀư lĕ găp jêh!

⁷ Khân may hŏ leo jêh phung bu năch jêng phung mâu koh ntâu tâm nuih n'hâm jêh ri tâm săk jăn hăn lăp tâm ntŭk kloh ueh Gâp gay ƀư ƀơ̆ ƀơch ngih brah Gâp, tơlah khân may nhhơr piăng let, ngi jêh ri mham ma Gâp. Pônây, khân may hŏ ƀư tih ngroh lơi nau tâm rnglăp Gâp ma lĕ rngôch nau ƀơ̆ khân may.

⁸ Khân may nơm mâu djôt prăp ôh ndơ kloh ueh Gâp ƀiălah khân may hŏ njêng phung êng mât mray ngih kloh ueh Gâp ntrok ăn ma khân may.’

⁹ Kôranh Brah Yêhôva lah: ‘Mâu geh du huê bu năch mâu koh ntâu tâm nuih n'hâm jêh ri tâm săk jăn dơi lăp ntŭk kloh ueh Gâp. Rlau ma nĕ du huê phung bu năch gŭ ta nklang phung ƀon lan Israel ăt mâu dơi lăp ôh ta nây.

¹⁰ Dôl phung Israel vĭ nhhơt pôri phung Lêvi du ngai đah Gâp tâm ban lĕ, chalơi Gâp gay pah kan phung rup brah; khân păng mra anh nau tih khân păng nơm.

¹¹ Nđâp lah pônây, khân păng pah kan tâm ntŭk kloh Gâp, ƀư nuyh chiă uănh mpông ngih brah jêh ri pah kan ma Gâp. Khân păng mra nkhĭt lĕ mpa ƀư brah gay ƀư ndơ ƀư brah gŭch jêh ri ƀư brah êng ăn ma phung ƀon lan; khân păng dâk tanăp măt phung ƀon lan gay pah kan.

¹² Yorlah khân păng hŏ pah kan jêh ma phung ƀon lan tanăp phung rup brah khân păng jêh ri ƀư ma ngih Israel tŭp tâm nau tih; yor ri, Gâp hŏ yơr ti tâm rdâng đah khân păng jêh ri khân păng mra anh nau tih khân păng, Kôranh Brah Yêhôva lah pônây.

¹³ Khân păng mâu mra văch dăch Gâp ôh gay ƀư lôch nau kan kôranh ƀư brah tanăp măt Gâp. Mâu lĕ khân păng mâu mra văch dăch ôh ma moh ndơ kloh ueh Gâp mâu lah ndơ dŭt kloh ueh, ƀiălah mra anh nau bêk prêng jêh ri lĕ rngôch nau mhĭk khân păng hŏ ƀư jêh.

¹⁴ Ƀiălah, Gâp mra njêng dơm khân păng kan mât uănh ngih brah gay ƀư ăn jêh lĕ kan pah jêh ri lĕ rngôch nau kan khlay tâm nây.’”

Phung kôranh ƀư brah jêng noi deh Lêvi

¹⁵ “Bi phung kôranh ƀư brah noi deh Lêvi, phung kon sau Y-Sadôk, hôm e mât mray ntŭk kloh ueh Gâp tơlah phung ƀon lan Israel vĭ nhhơt du ngai đah Gâp. Lĕ rngôch phung nây mra văch dăch Gâp gay pah kan ma Gâp. Khân păng mra dâk tanăp Gâp gay nhhơr ngi jêh ri mham, Kôranh Brah Yêhôva lah pônây.

¹⁶ Nây jêng phung mra lăp tâm ntŭk kloh ueh Gâp, văch dăch sưng Gâp gay pah kan ma Gâp jêh ri ƀư nau kan Gâp.

¹⁷ Tơlah khân păng lăp lĕ mpông pêr nkual tâm trôm pôri khân păng mra nsoh ma bok ao mhay; khân păng mâu nsoh ndơ ma rsau biăp ôh dôl khân păng pah kan ta lĕ mpông pêr tâm nkual mâu lah trôm ngih brah.

¹⁸ Khân păng mra mpân kưn ma bok mhay ta klơ bôk jêh ri nsoh kho gleh ma bok mhay tât ta n'gang bŭt; khân păng mâu mra dơi nsoh moh bok ƀư tuh dak rhal.

¹⁹ Ƀiălah tơlah hăn rgăn ma nkual padih jêng ntŭk geh phung ƀon lan pôri khân păng doh lơi kho ao nsoh dôl pah kan jêh ri ăn tâm lĕ jrô kloh ueh, jêh ri nsoh ao êng, mâu om ăn ôh ao khân păng ƀư ăn ma phung ƀon lan jêng kloh.

²⁰ Khân păng mâu poih plưn bôk, ăt mâu om sŏk jong ƀiălah mra kreh sŏk gleh.

²¹ Mâu geh ôh du huê kôranh ƀư brah dơi nhêt ndrănh tơlah păng lăp tâm nkual ta trôm.

²² Khân păng mâu dơi sŏk ur đah bu ur ndrô mâu lah bu ur bu lĕ lơi jêh ƀiălah dơi sŏk du huê bu ur druh bơh noi deh phung Israel, mâu lah sŏk bu ur ndrô ur du huê kôranh ƀư brah êng.

²³ Khân păng mra nti ma phung ƀon lan Gâp gĭt rnglah moh ntil ndơ jêng kloh ueh đah moh ntil ndơ neh ntu, ntĭm ăn ma phung ƀon lan Gâp gĭt rnglah ntil nau kloh đah nau ƀơ̆ ƀơch.

²⁴ Tơlah geh nau tâm rlăch, khân păng jêng kôranh phat dôih, jêh ri phat dôih tĭng nâm nau vay Gâp. Khân păng mra djôt prăp nau vay Gâp jêh ri nau vay dăp Gâp tâm lĕ rngôch nar năng tâm rƀŭn Gâp jêh ri prăp dơi jêng kloh ueh lĕ nar saƀat Gâp.

²⁵ Khân păng dơi văch dăch săk bunuyh khĭt klach lah geh nau ƀơ̆. Ƀiălah, tơlah bunuyh khĭt jêng me mâu lah mbơ̆ khân păng, kon bu ur mâu lah kon bu klâu khân păng, oh nâu mâu lah oh nur ê hŏ geh sai, pôri kôranh ƀư brah mra geh nau ƀơ̆.

²⁶ Lôch jêh nau ƀư kloh, kôranh ƀư brah gŭ kâp tâm pơh nar đŏng.

²⁷ Ta nar kôranh ƀư brah nây lăp tâm ntŭk kloh tâm nkual ta trôm gay pah kan ta nây, pôri păng mra nhhơr du ndơ ƀư brah chuai nau tih păng nơm, Kôranh Brah Yêhôva lah pônây.

²⁸ Bi ma drăp ndơ gay prăp ăn ma khân păng Gâp nơm yơh jêng drăp ndơ ma khân păng. Lơi ta khân may ăn ma khân păng ôh du ntil drăp ndơn tâm bri Israel Gâp nơm yơh jêng drăp ndơn ma khân păng.

²⁹ Khân păng mra siăm khân păng nơm ma ndơ ƀư brah rnih, ndơ ƀư brah geh tih jêh ri ƀư brah chuai nau tih. Lĕ rngôch moh ndơ phung ƀon lan bri Israel, nhhơr mra jêng ndơ khân păng.

³⁰ Lĕ rngôch kao play dak bôk dŭt ueh tâm lĕ rngôch play kao ndrel lĕ rngôch ndơ ƀư brah rnih môi khân may hŏ nhhơr jêh, jêng ndơ phung kôranh ƀư brah da dê. Khân may mra nhhơr đŏng ăn ma phung kôranh ƀư brah rnih pach ueh lơn khân may gay ma nau ueh uĭn dơi gŭ tâm ngih khân may.

³¹ Phung kôranh ƀư brah mâu dơi sa ôh puăch du ntil mpô mpa, nđâp lah sĭm och mâu lah mpô mpa khĭt êng mâu lah mpô mpa geh bu kăp hêk.”