Êsêkiêl 43 - Nau Brah Ndu Ngơi 2023

Nau tâm saơ ma nau chrêk ma lơp Brah Yêhôva

¹ Jêh nây bunuyh nây leo gâp hăn lăp mpông pêr, jêng mpông pêr uănh mpeh luh nar.

² Gâp saơ nau chrêk ma lơp Brah Ndu Israel tă bơh mpeh luh nar văch tât. Nteh bâr Păng nâm bu nteh n'gôr dak toyh, jêh ri tâm neh nchrat ang yor nau chrêk ma lơp Păng.

³ Nau tâm saơ gâp saơ rnôk nây tâm ban đah nau tâm saơ hŏ mpơl ma gâp tơlah Păng văch ƀư rai ƀon aơ. Păng tâm ban đah nau tâm saơ gâp hŏ tâm saơ ta kơh dak krong Kêbar jêh ri gâp păn muh măt ta neh.

⁴ Chrêk ma lơp Brah Ndu lăp tâm ngih brah rgăn ta mpông pêr mpeh luh nar.

⁵ Huêng Brah chông gâp leo klơ jêh ri njŭn gâp lăp nkual tâm trôm, jêh ri nau chrêk ma lơp Brah Yêhôva bêng ngih brah.

⁶ Gâp tăng geh bu ngơi ma gâp tă tâm trôm ngih brah, jêh ri geh du huê bunuyh dâk êp kêng gâp.

⁷ Bunuyh nây lah ma gâp: “Hơi kon bunuyh, aơ yơh jêng ntŭk dơm sưng hađăch Gâp, jêng ntŭk ăn mpang jâng Gâp. Ta aơ, Gâp mra gŭ ta nklang phung kon sau ƀon lan Israel kŏ tât n'ho ro. Ntơm bơh abaơ let kăndơ̆, ngih Israel lĕ rngôch phung ƀon lan jêh ri phung hađăch khân păng mâu mra ƀư ƀơ̆ đŏng ôh amoh kloh ueh Gâp yor nau văng tĭr khân păng jêh ri yor ma săk jăn khĭt phung hađăch khân păng ta klơ lĕ ntŭk prêh đŏng ôh.

⁸ Tơlah khân păng ndâk mpông ngih khân păng dăch mpông ngih Gâp jêh ri ndâk n'gâng mpông khân păng dăch n'gâng mpông Gâp, kŏ tât vah vang Gâp đah khân păng knŏng tâm ƀah du mlâm mpir dơm, pôri khân păng hŏ ƀư ƀơ̆ amoh kloh ueh Gâp. Yor nau kan ƀơ̆ khân păng ƀư jêh yor nây Gâp ji nuih dĭng ƀư rai lơi khân păng.

⁹ Aƀaơ ri, ăn khân păng chalơi lĕ nau văng tĭr jêh ri mƀăr săk jăn khĭt khân păng ngai đah Gâp ri mơ Gâp mra gŭ ta nklang khân păng n'ho ro.

¹⁰ Hơi kon bunuyh, rblang hom ngih brah ăn ma phung Israel gay khân păng gĭt bêk prêng ma nau tih khân păng. Ăn khân păng veh tĭng rup bu nchih kach aơ.

¹¹ Tơlah khân păng bêk prêng ma lĕ nau khân păng hŏ ƀư pôri may ăn hom ma khân păng uănh samƀŭt rup ngih brah: nau dăp lor, trong luh, trong lăp, lĕ rngôch samƀŭt rup, lĕ nau vay ƀư jêh ri lĕ nau vay ma păng. Nchih hom nau lĕ nau nây tanăp măt khân păng gay ma khân păng djôt prăp lĕ rngôch samƀŭt nđâp ƀư tĭng nâm nau vay ƀư jêh ri nau vay.

¹² Aơ yơh jêng nau vay ma ngih brah. Lĕ rngôch n'gor văr jŭm, ta klơ n'gơn yôk jêng ntŭk kloh ueh ngăn. Di yơh, nây jêng nau vay ma ngih brah.

Nơng ƀư brah

¹³ Aơ jêng nau veh nơng ƀư brah veh amma (du amma aơ jong lơn amma vay du nđam). Mbon păng prêh lơn n'gul met jêh ri rkăng n'gul met, geh ndor năp jŭm nây prêh du nđam. Aơ jêng nau prêh nơng ƀư brah.

¹⁴ Ntơm bơh mbon tâm neh tât ma ndor năp tâm dâng jêng du met, đah mbon n'gul met. Ntơm bơh ndor năp jê̆ tât ndor năp toyh geh jêng bar met, đah mbon n'gul met.

¹⁵ Ŭnh năk ta nơng ƀư brah prêh bar met jêh ri ntơm bơh ŭnh năk nơng ƀư brah rô̆ puăn mlâm nke.

¹⁶ Ŭnh năk nơng ƀư brah rup n'gong, jong prao met jêh ri huy prao met.

¹⁷ Năp mpeh klơ tâm ban lĕ jêng puăn blon đŏng, pơh met jong jêh ri pơh met huy; geh du mlâm năp văr jŭm bar nđam n'gul jêh ri du mlâm bong n'gul met. Bi ma nau mbak ntung hao nơng ƀư brah rle mpeh luh nar.”

¹⁸ Bunuyh nây lah ma gâp: “Hơi kon bunuyh, Kôranh Brah Yêhôva lah: ‘Aơ jêng lĕ nau vay ƀư ma nơng ƀư brah tơlah lôch jêh ndâk gay nhhơr ndơ ƀư brah gŭch jêh ri ƀư brah tŏ mham ta klơ nây.’

¹⁹ Kôranh Brah Yêhôva lah: ‘Dôl phung kôranh ƀư brah, mpôl Lêvi tâm noi deh Y-Sadôk, văch dăch Gâp, gay pah kan ma Gâp, may jao ăn hom ma khân păng du mlâm ndrôk nkuăng rah gay ma ƀư brah chuai nau tih.

²⁰ Ăn may sŏk mham păng mhĭng ta klơ puăn mlâm nke nơng ƀư brah, ta puăn njônh năp jêh ri ta ndor văr jŭm gay ƀư kloh nơng ƀư brah jêh ri ƀư brah chuai nau tih ma nơng ƀư brah.

²¹ Ăn may djôt ndrôk nkuăng ƀư brah chuai nau tih jêh ri gŭch păng tâm ntŭk tâm nal jêh ta ngih brah, padih ntŭk kloh ueh.

²² Ta nar năng bar, ăn may nhhơr du mlâm be nkuăng mâu geh sôt ƀư ndơ ƀư brah chuai nau tih, jêh ri nơng ƀư brah mra dơi geh nau kloh nâm bu ƀư kloh jêh ma ndrôk nkuăng.

²³ Tơlah lôch jêh nau ƀư kloh nơng ƀư brah, ăn khân may nhhơr hom du mlâm ndrôk nkuăng rah mâu geh têl jêh ri du mlâm biăp nkuăng mâu geh têl nhŭp tă ƀơh phung păng.

²⁴ May mra nhhơr biăp nây tanăp măt Brah Yêhôva, jêh ri phung kôranh ƀư brah sui boh ta klơ jêh ri nhhơr ƀư brah gŭch ma Brah Yêhôva.

²⁵ Tâm pơh nar, ăn nar may mra prăp ăn du mlâm be nkuăng gay ƀư ndơ ƀư brah chuai nau tih jêh ri nhhơr du mlâm ndrôk nkuăng rah, du mlâm biăp nkuăng mâu geh têl, nhŭp tă bơh phung păng.

²⁶ Tâm pơh nar, khân păng mra ƀư brah chuai nau tih ăn nơng ƀư brah jêh ri ƀư kloh păng gay prăp êng ma păng jêng kloh ueh.

²⁷ Tơlah lôch lĕ nar nây, ntơm bơh nar năng pham rlet pakơi taơ, phung kôranh ƀư brah mra nhhơr ndơ ƀư brah gŭch jêh ri ndơ ƀư brah ma nau đăp mpăn khân may ta klơ nơng ƀư brah nây jêh ri Gâp mra vơt dơn khân may.’ Kôranh Brah Yêhôva lah pônây.”