Êsêkiêl 42 - Nau Brah Ndu Ngơi 2023

Lĕ jrô prăp ăn ma kôranh ƀư brah

¹ Jêh nây, păng leo gâp lăp tâm nkual padih mpeh pa lơ jêh ri leo gâp lăp tâm du jrô tâm tra đah nkual ngih brah jêh ri tâm tra đah ngih mpeh pa lơ.

² Tra panăp ngih mpeh pa lơ jong geh prăm jât met, dĭ geh bar jât prăm met.

³ Tâm rđĭl đah du ntŭk jât met jêng ntŭk nkual tâm trôm jêh ri du ntŭk tâm tra đah mbon dơi krĭp lŭ jêng ndơ nkual padih, jêng nkual pe tăp.

⁴ Mpeh panăp lĕ jrô geh trong hăn huy prăm met jêh ri mpeh tâm trôm geh du trong huy n'gul met; lĕ mpông jrô rle mpeh pa lơ da dê.

⁵ Lĕ jrô ta klơ huêt lơn lĕ jrô tâm dâng jêh ri lĕ jrô ta nklang, yorlah geh lĕ nkual hin ntŭk.

⁶ Lĕ jrô ta tăp pe mâu geh meh nâm bu ta nkual, yor ri lĕ jrô ta klơ jêh ri lĕ jrô ta nklang rŭch pakơi đê̆ jêh ri huêt lơn lĕ jrô tâm dâng.

⁷ Mpir padih njok tĭng lĕ jrô, leo mpeh ma nkual padih tâm tra đah lĕ jrô, veh geh bar jât prăm met.

⁸ Nau jong tâm lĕ jrô nkual padih jêng bar jât prăm met, bi ma lĕ jrô tâm tra ngih brah jong prăm jât met.

⁹ Tâm dâng jrô nây, mpeh luh nar, geh du mpông ăn phung tă bơh nkual padih hăn lăp.

¹⁰ Tâm ban lĕ geh lĕ jrô njok tĭng nau rkăng mpir nkual mpeh luh nar, panăp nkual nây ro jêh ri tâm tra đah ngih brah.

¹¹ Geh du trong mpeh panăp lĕ jrô nây tâm ban lĕ panăp jrô mpeh pa lơ; lĕ rngôch lĕ jrô nây geh nau jong jêh ri dĭ tâm ban da dê. Lĕ rngôch trong luh, trong lăp geh nau veh tâm ban da dê.

¹² Lĕ rngôch mpông jrô mpeh pa dâng ăt tâm ban pônây lĕ. Ntŭk tơm trong, geh du mlâm mpông gay bu hăn lăp, tâm tra đah mpir mpeh luh nar.

¹³ Rnôk nây, păng lah ma gâp pô aơ: “Lĕ rngôch jrô mpeh pa lơ jêh ri lĕ jrô mpeh pa dâng tanăp nkual ngih brah jêng lĕ jrô kloh ueh, jêng ntŭk phung kôranh ƀư brah hăn dăch Brah Yêhôva mra sa ndơ ƀư brah kloh ueh ngăn. Phung kôranh nây mra ăn ta nây ndơ ƀư brah kloh ngăn, ndơ ƀư brah rnih môi, ndơ ƀư brah chuai nau ƀư tih jêh ri ndơ ƀư brah chuai nau tih yorlah ntŭk nây jêng kloh ueh.

¹⁴ Tơlah lăp jêh ta ntŭk kloh ueh nây, lĕ phung kôranh ƀư brah mâu dơi luh du tă bơh ntŭk kloh ueh gay luh tâm nkual padih ôh kŏ tât khân păng doh jêh ri dơm lĕ kho ao hŏ nsoh jêh dôl pah kan, yorlah lĕ kho ao nây jêng kloh ueh. Khân păng tơh kho ao êng êlor ma hăn dăch ntŭk prăp ma phung ƀon lan.”

¹⁵ Lôch jêh hŏ veh mpeh tâm trôm ngih brah, păng leo gâp luh ta mpông mpeh luh nar jêh ri veh văr jŭm ngih brah.

¹⁶ Bunuyh nây sŏk mâng veh gay veh mpeh luh nar geh bar rhiăng prăm jât met.

¹⁷ Păng sŏk mâng veh gay veh mpeh pa lơ geh bar rhiăng prăm jât met.

¹⁸ Păng sŏk mâng veh gay veh mpeh pa dâng geh bar rhiăng prăm jât met.

¹⁹ Păng plơ̆ tay mpeh nhâp nar gay veh, geh bar rhiăng prăm jât met.

²⁰ Pôri, păng veh lĕ puăn pŭng mpir văr jŭm ngih brah, nau jong bar rhiăng prăm jât met, nau huy bar rhiăng prăm jât met. Mpir aơ gay tâm pă rnglah ntŭk kloh ueh ma đah ntŭk ƀon lan.