Êsêkiêl 41 - Nau Brah Ndu Ngơi 2023

Nkoch nau tâm trôm ngih brah

¹ Jêh nây, Bunuyh nây leo gâp lăp tâm trôm ngih brah jêh ri păng veh lĕ meh. Lĕ jrŏng dĭ geh pe met đah aơ pe met đah ri; nây jêng tâm nau dĭ lĕ jrŏng ngih bok rnôk kăl e.

² Dĭ mpông lăp jêng prăm met, bar met n'gul đah aơ, bar met n'gul đah ri. Păng veh padih ngih brah kloh ueh, nau jong geh bar jât met jêh ri dĭ jât met.

³ Păng lăp tâm trôm jêh ri veh lĕ jrŏng mpông lăp jêng du met; nau prêh mpông jêng pe met jêh ri nau huy mpông pe met n'gul.

⁴ Păng veh mpeh tâm trôm dŭt ngih brah kloh ueh, jong jât met, huy jât met. Păng lah ma gâp: Aơ jêng ntŭk dŭt kloh ueh.

⁵ Jêh nây păng veh mpir ngih brah mbâl pe met; dĭ lĕ jrô kêng pŭng văr jŭm ngih jêng bar met.

⁶ Lĕ jrô kêng pŭng geh pe tưng, ăp tưng geh pe jât jrô; lĕ jrô nây tâm rđĭl đah mpir văr jŭm ngih brah dŏng ƀư ndơ rkơl ăn ma lĕ jrô kêng pŭng gay mâu hôm nchrong klơ mpir ngih brah.

⁷ Lĕ jrô kêng pŭng lơ prêh lơ huy. Nau bu ndâk văr jŭm ngih brah dơi ndâk tĭng kơt mpir lơ hâu prêh lơ huêt, yorlah jrô lơ prêh lơ huy. Bu hăn hao bơh tưng tâm dâng tât tưng klơ rgăn tưng ta nklang.

⁸ Tâm ban lĕ gâp saơ ngih brah n'gân klơ du mbon prêh veh du bông mâng veh, nây jêng pe met; mbon lĕ jrô kêng pŭng tâm ban lĕ.

⁹ Nau mbâl mpir padih tâm lĕ jrô kêng pŭng jêng bar met n'gul; mpir nây jong lơ ma mbon tâm lĕ ngih kêng pŭng jêng bar met n'gul.

¹⁰ Tâm ƀah vah vang lĕ jrô kêng pŭng ngih brah jêh ri lĕ jrô êng huy jât met, văr jŭm ngih brah.

¹¹ Lĕ mpông tâm lĕ jrô pơk kêng pŭng mpeh ma neh hŏng, du mlâm mpông mpeh pa lơ, du mlâm mpông mpeh pa dâng; jêh ri neh hŏng nây huy bar met n'gul.

¹² Ngih rle năp đah nkual ngih brah, mpeh nhâp nar, huy pe jât prăm met. Mpir nchueng jŭm ngih nây mbâl bar met n'gul, jong puăn jât prăm met.

¹³ Jêh nây đŏng, bunuyh nây veh ngih brah jong prăm jât met; nkual hŏng ngih brah, ngih đah mpir păng ăt jong prăm jât met.

¹⁴ Nau dĭ panăp ngih jêh ri nkual ngih brah mpeh luh nar jêng prăm jât met.

¹⁵ Lôch nây, păng veh nau jong lĕ ngih rle tra năp đah ndring nhuang pakơi ngih brah, nđâp ma nkual bar đah jêng prăm jât met. Ngih brah tâm trôm jêh ri padih, lĕ nhuang panăp tâm tra đah nkual,

¹⁶ Lĕ ndop mpông, lĕ mpông bloh mbong gre, lĕ nkual văr jŭm pe tăp nây, mpeh panăp ndop mpông, lĕ rngôch ndop mblum văr jŭm ma kađar da dê. Ntơm bơh neh tât mpông bloh jêh ri lĕ mpông bloh geh nkŭm da dê.

¹⁷ Ta klơ mpông, tâm trôm jêh ri padih ngih brah, lam mpir văr jŭm tâm trôm jêh ri padih,

¹⁸ bu kach nsêr rup chêrubim jêh ri lĕ tơm sala; du mlâm tơm play đung jêng ta nklang bar chêrubim. Ăp chêrubim geh bar muh măt:

¹⁹ du mlâm muh măt păng rle mpeh ma rup tơm sala jêng mpeh đah aơ, du mlâm muh măt rup yau mŭr kon rle mpeh ma rup tơm sala đah ri. Lam lĕ rngôch ngih brah bu kach nsêr da dê nâm pônây.

²⁰ Ntơm bơh neh tât ta klơ mpông luh lăp, bu kach ta rup Chêrubim jêh ri rup tơm sala ta klơ mpir ngih brah.

²¹ Lĕ mbong mpông ngih brah rup n'gong jêh ri panăp măt ntŭk kloh ueh ăt tâm ban pônây lĕ.

²² Du mlâm nơng ƀư brah ma tơm si prêh du met n'gul, jong du met. Lĕ njônh, ndap jêh ri lĕ blon nơng ƀư brah đah tơm si da dê. Păng lah ma gâp pô aơ: “Aơ jêng sưng gŭ tanăp măt Brah Yêhôva.”

²³ Ngih brah jêh ri ntŭk kloh ueh geh bar mpông.

²⁴ Du mlâm mpông geh bar blah mpông dơi nchăng, mpông aơ bar blah, mpông ri bar blah.

²⁵ Geh rup Chêrubim jêh ri lĕ rup tơm sala kach nsêr ta mpông ngih tâm ban đŏng ta klơ mpir. Geh du ndring ma tơm si panăp nhuang, mpeh padih.

²⁶ Ta mpir nhuang panăp jêng mpông bloh mbong gre geh bar đah kach nsêr rup tơm play đung. Lĕ jrô kêng pŭng ngih brah jêh ri chor nkŭm ăt dơi ƀư ueh tâm ban pônây lĕ.