Êsêkiêl 40 - Nau Brah Ndu Ngơi 2023

Nau tâm saơ ma ngih brah mhe

¹ Năm rơh bar jât ma prăm rnôk he jêng bu nă, ta bôk năm, năng jât khay nây, jêng năm jât ma puăn jêh bu sŏk ƀon toyh Yêrusalem, ăt tâm nar nây lĕ, ti Brah Yêhôva dơm ta klơ gâp jêh ri Păng leo gâp lăp tâm ƀon nây.

² Tâm lĕ rngôch nau tâm saơ bơh Brah Ndu, gâp saơ Păng leo gâp lăp bri Israel jêh ri dơm gâp ta klơ du gôl yôk prêh ngăn, ta klơ yôk nây, mpeh pa dâng, geh du ntil nau ndâk nkra nâm bu du rplay ƀon.

³ Tơlah Păng leo gâp lăp ta nây, gâp saơ du huê bunuyh săk jăn nâm bu du huê bunuyh ma kông. Bunuyh nây dâk ta ndring mpông, ti djôt rse ndrăn mhay jêh ri du mlâm mâng ndăl gay ma veh.

⁴ Bu klâu nây lah ma gâp: “Hơi kon bunuyh, sŏk măt uănh hom, sŏk tôr rkêng iăt jêh ri ăn nuih n'hâm gŭ mĭn ma lĕ nau gâp mra mpơl ma may; yorlah ăn may saơ dơi njŭn may tât ta aơ. Pôri nkoch hom lĕ rngôch nau may saơ ma phung Israel.”

⁵ Ri, geh du mlâm mpêr văr jŭm padih ngih brah. Bunuyh nây djôt tâm ti du bông mâng gay ma veh, jong pe met, jêng prao amma, ăp amma nây jong lơn met vay dŏng du nđam. Bunuyh nây veh nau dĭ mpêr jêng du bông mâng jêh ri nau prêh jêng du bông mâng.

⁶ Jêh ta nây, păng hăn tât ta mpông pêr mpeh luh nar, chuat hao pe mbak gung gay veh ndring mpông mpêr, nau dĭ du bông mâng; ndring êng ăt du bông mâng.

⁷ Ăp jrô jong du bông mâng jêh ri dĭ du bông mâng. Vah vang ăp jrô tâm ƀah bar met n'gul; kađar lăp mpông sâng êp ta nhuang panăp mpông pêr nây huy du bông mâng veh.

⁸ Bunuyh nây veh nhuang panăp mpông pêr tâm trôm, ăt du bông mâng.

⁹ Bunuyh nây veh nhuang panăp mpông pêr geh puăn met jêh ri lĕ meh păng geh du met. Nây jêng nhuang panăp mpông pêr tâm trôm.

¹⁰ Ta ntŭk mpông pêr mpeh luh nar, ăp pŭng geh pe jrô, lĕ rngôch pe jrô veh geh tâm ban da dê; jêh ri lĕ meh ăp pŭng veh tâm ban.

¹¹ Bunuyh nây veh nau dĭ trong lăp ta mpông pêr geh prăm met jêh ri nau jong geh prao met n'gul.

¹² Panăp lĕ jrô, ăp pŭng geh du mlâm mpêr prêh n'gul met, jêh ri ăp jrô rup n'gong tâm ban ăp pŭng pe met.

¹³ Bunuyh nây veh mpông mpêr lăp tă pakơi, tă klơ chor jrô aơ tât ma chor jrô ri, geh jât bar met n'gul nau dĭ; bar trong luh lăp tâm sŏng đah aơ đah ri.

¹⁴ Bunuyh nây veh lĕ jrŏng jêng pe jât met, êp kêng jrŏng nây geh ndring jŭm mpông pêr lăp.

¹⁵ Tâm ƀah vah vang mpông pêr lăp jêh ri nhuang panăp mpông pêr tâm trôm jêng bar jât prăm met.

¹⁶ Lĕ jrô jêh ri jrŏng păng mpeh ta trôm mpông pêr kŏ tât nhuang panăp geh mpông bloh mbong gre bar da dê. Mpeh tâm trôm jêh ri jŭm nây geh mpông bloh da dê. Ta klơ lĕ jrŏng geh lĕ rup tơm sala.

¹⁷ Jêh ta nây, păng leo gâp lăp ta ndring ngih padih. Aơ, ntŭk aơ geh âk jrô jêh ri trong hăn krĭp lŭ jŭm nkual; trong hăn krĭp lŭ nây geh pe jât mlâm jrô.

¹⁸ Trong hăn krĭp lŭ tĭng mpông pêr, nau jong geh tâm ban mpông pêr nây. Aơ jêng trong hăn geh krĭp lŭ dêh lơn.

¹⁹ Păng veh nau tâm ƀah ntơm bơh mpeh panăp mpông pêr tâm dâng kŏ tât panăp nkual tâm trôm, geh prăm jât met mpeh luh nar, jêh ri mpeh pa lơ tâm ban đŏng.

²⁰ Păng hăn veh nau jong jêh ri nau dĭ mpông pêr mpeh pa lơ, leo ma tâm nkual padih.

²¹ Bar đah mpông pêr, ăp kêng geh pe jrô; lĕ jrŏng jêh ri nhuang panăp tâm ban ma nau veh mpông pêr tal nguay: jong geh bar jât prăm met jêh ri dĭ bar jât ma prăm met n'gul.

²² Lĕ mpông bloh, nhuang panăp jêh ri rup tơm sala jêng ndơ păng ăt tâm ban ma đah nau veh mpông pêr mpeh luh nar. Geh pơh mbak gung hao leo ma mpông pêr jêh ri du nhuang panăp tâm trôm nây.

²³ Tâm tra đah mpông pêr mpeh pa lơ jêh ri mpông pêr mpeh luh nar jêng mpông pêr lăp nkual tâm trôm. Păng veh ntơm bơh mpông pêr aơ tât ma mpông pêr ri, geh prăm jât met.

²⁴ Jêh nây, păng leo gâp hăn sĭt mpeh pa dâng. Aơ, ta nây geh mpông mpêr mpeh pa dâng. Păng veh lĕ jrŏng jêh ri lĕ ndring panăp ăt tâm ban ma nau veh.

²⁵ Nhuang pă năp nây geh âk mpông bloh văr jŭm tâm ban lĕ mpông bloh êng. Nau jong nhuang panăp aơ jêng bar jât prăm met jêh ri dĭ jêng jât bar met n'gul.

²⁶ Geh ntung gung pơh mbak gung hao leo mpông pêr jêh ri du mlâm nhuang panăp tâm trôm nây; ta klơ lĕ rngôch bar đah jrŏng geh âk rup tơm sala da dê.

²⁷ Nkual nhuang tâm trôm du mlâm mpông pêr rle mpeh pa dâng, jêh ri păng veh ntơm bơh mpông pêr aơ tât ma mpông pêr ri mpeh pa dâng jêng prăm jât met.

²⁸ Jêh ri, bunuyh nây njŭn gâp lăp tâm nkual rgăn mpông pêr pa dâng. Păng veh mpông pêr pa dâng jêh ri mpông nây geh nau veh tâm ban đah lĕ rngôch mpông pêr êng.

²⁹ Lĕ jrô, lĕ jrŏng jêh ri nhuang panăp păng geh tâm ban nau veh. Mpông pêr jêh ri lĕ nhuang panăp geh mpông bloh văr jŭm. Lĕ nhuang panăp geh nau jong bar jât prăm met jêh ri nau dĭ jêng jât bar met n'gul.

³⁰ Văr jŭm geh lĕ nhuang panăp, nau jong jât bar met n'gul, nau dĭ bar met n'gul.

³¹ Lĕ ndring panăp mpông pêr tâm tra đah nkual padih geh lĕ rup tơm sala da dê jêng ta klơ lĕ jrŏng păng jêh ri geh ntung gung pham mbak gung gay hao leo klơ.

³² Jêh ta nây, păng leo gâp lăp nkual tâm trôm mpeh luh nar. Păng veh mpông pêr nây jêh ri păng geh nau veh tâm ban ma mpông pêr êng lĕ.

³³ Đơ jrô, lĕ jrŏng jêh ri lĕ nhuang panăp păng geh nau veh tâm ban lĕ ndơ êng. Mpông pêr aơ jêh ri nhuang panăp geh mpông bloh văr jŭm da dê; lĕ nhuang panăp jong bar jât prăm met, nau dĭ jêng jât bar met n'gul.

³⁴ Lĕ nhuang mpông mpêr aơ tâm tra đah nkual padih geh rup tơm sala da dê jêng ta klơ lĕ jrŏng nây lĕ rngôch bar đah măt jêh ri geh du mlâm ntung gung pham mbak gung gay ma chuat hao.

³⁵ Jêh bunuyh nây njŭn leo gâp lăp tâm mpông pêr mpeh pa lơ; bunuyh nây veh mpông pêr nây jêh ri păng geh nau veh tâm ban đah mpông pêr êng.

³⁶ Đơ jrô, lĕ jrŏng jêh ri lĕ nhuang păng panăp ăt geh nau veh tâm ban jêh ri geh mpông bloh văr jŭm. Mpông pêr nây geh nau jong bar jât prăm met, dĭ jât bar met n'gul.

³⁷ Lĕ jrŏng păng tâm tra đah nkual padih geh rup tơm sala da dê jêng ta klơ lĕ jrŏng nây lĕ rngôch bar đah măt, jêh ri geh du mlâm ntung gung pham mbak gung gay ma chuat hao.

³⁸ Du mlâm jrô geh mpông êp lĕ jrŏng mpông pêr nây, jêng ntŭk bu rao ti lĕ ndơ ƀư brah gŭch.

³⁹ Tâm nhuang panăp mpông pêr, geh bar mlâm sưng ăp pŭng, ta klơ nây bu nkhĭt lĕ mpa ƀư brah dŏng ăn ndơ ƀư brah gŭch, ndơ ƀư brah chuai nau ƀư tih jêh ri ndơ ƀư brah chuai nau tih.

⁴⁰ Mpeh padih nhuang panăp, êp ntŭk chuat hao rlet mpông pêr mpeh pa lơ, geh bar mlâm sưng; đah ri nhuang panăp mpông pêr ăt geh bar mlâm sưng.

⁴¹ Pônây, geh puăn mlâm sưng mpeh đah aơ mpông pêr jêh ri puăn mlâm sưng mpeh đah ri, lĕ rngôch jêng pham mlâm. Ta klơ sưng nây, bu nkhĭt mpa ƀư brah.

⁴² Geh đŏng puăn mlâm sưng ma lŭ n'gong dŏng ăn ndơ ƀư brah gŭch, jong n'gul met, dĭ pơh jât prăm centimet, prêh n'gul met, bu dơm ta klơ nây lĕ ndơ dŏng gay nkhĭt mpa ƀư brah ăn ndơ ƀư brah gŭch jêh ri ndơ ƀư brah êng.

⁴³ Geh nglĕ dĭ tâm ban mpang ti nkrêp ta puăn pŭng mpir; puăch ƀư brah mra ăn ta klơ sưng.

⁴⁴ Mpeh padih mpông pêr tâm trôm, geh jrô gay ăn phung mprơ ntŭk nkual meng mpeh mpông pêr pa lơ, rlet mpeh pa dâng. Ăt geh du mlâm jrô đŏng mpeh luh nar, rlet mpeh pa lơ.

⁴⁵ Bunuyh nây lah ma gâp: “Geh jrô rlet mpeh pa dâng prăp ăn ma phung kôranh ƀư brah mât uănh ngih brah,

⁴⁶ jêh ri jrô rlet mpeh pa lơ prăp ăn ma phung kôranh ƀư brah mât uănh nơng ƀư brah. Nây jêng phung kon bu klâu Y-Sadôk, nây jêng tâm nklang phung kon bu klâu Y-Lêvi văch dăch Brah Yêhôva gay ma pah kan ma Păng.”

⁴⁷ Jêh nây, bunuyh nây veh nkual n'gong, nau jong prăm jât met jêh ri nau dĭ prăm jât met. Nơng ƀư brah gŭ ta panăp ngih brah.

Ngih brah

⁴⁸ Jêh nây đŏng, Bunuyh nây njŭn gâp lăp nhuang panăp ngih brah jêh ri bunuyh nây veh lĕ jrŏng nhuang panăp, du ding bar met n'gul; nau dĭ mpông pêr jêng pơh met, nau jru mpông pêr ăp pŭng du met n'gul.

⁴⁹ Nhuang panăp geh nau jong jât met jêh ri dĭ prăm met n'gul. Geh du mlâm ntung gung jât mbak hăn hao nhuang panăp jêh ri kêng meng lĕ jrŏng geh bar meh, ăp pŭng du n'gâng.