Êsêkiêl 4 - Nau Brah Ndu Ngơi 2023

Nau mbơh lor ma nau bu ƀư rai ƀon Yêrusalem

¹ “Hơi kon bunuyh, sŏk hom du rlat ƀrĭk dơm păng ăn panăp may jêh ri kach nchih rup ƀon Yêrusalem ta klơ neh yăng nây.

² Ăn may nchueng lơh ma ƀon nây, ndâk njêng pôih, ƀư mpêr tâm rdâng đah păng; dăp phung tahan nchueng lơh jêh ri nkra mâng ƀư klưh lơi mpêr jŭm ƀon tâm rdâng đah păng.

³ Jêh nây sŏk đŏng du plơp loih rlat ƀư mpêr loih rgăn vah vang may đah ƀon, jêh ri rle muh măt may đah păng. Bu mra nchueng păng jêh ri may mra nchueng păng. Nây jêng nau mbên ăn ma ngih Israel.

⁴ Jêh nây, may bê̆ch nkêng pa chiau jêh ri dơm nau tih ngih Israel ta may. Ndah nâm nar may bê̆ch nkêng pônây, dah nây lĕ may mra anh nau tih khân păng.

⁵ Yorlah Gâp hŏ nal jêh ma may, mrô nar tâm ban đah mrô năm khân păng ƀư tih, nây jêng pe rhiăng sĭn jât nar. Pônây may mra anh nau tih ma ngih Israel.

⁶ Tơlah lôch jêh nar nây, may mra bê̆ch nkêng rle pa ma jêh ri anh nau tih ăn ma ngih Yuđa tâm puăn jât nar Gâp nal ăn may, du nar jêng du năm.

⁷ Ăn may n'gĭl rle muh măt may ma nau bu nchueng ƀon Yêrusalem, jêh ri yơr ti hưl gay mbơh lor nau tâm rdâng đah păng.

⁸ Aơ, Gâp sŏk rse ndrăn chăp may jêh ri may mâu blau plăch pa chiau pa ma ôh kŏ tât lôch nar nchueng ƀon.

⁹ May sŏk hom ba ƀlê, ba ôrgơ, play tuh, tuh vang, koi jêh ri ba dơm tâm ngan pala dŏng ƀư piăng let ăn ma may nơm. Ndah nâm jŏ nar may bê̆ch nkêng dah nây lĕ nar may mra sa piăng let nây, geh pe rhiăng sĭn jât nar.

¹⁰ Ndơ sông sa may mra sa ăp nar jâk klăp lah bar rhiăng gram; jêh ri may mra sa tĭng mông tâm nal.

¹¹ Ăn may nhueh đŏng dak may nhêt klăp lah rlau n'gul lit jêh ri nhêt tĭng mông tâm nal.

¹² May mra sa piăng let nây nâm bu du glo piăng let ba ôrgơ, jêh ri may sŏk ek bunuyh gay ma gŭch piăng let tra năp măt khân păng.”

¹³ Brah Yêhôva lah đŏng: “Pônây phung kon sau Israel mra sa piăng let ƀơ̆ ƀơch tâm lĕ bri dak Gâp mra mprơh khân păng hăn du.”

¹⁴ Gâp lah: “Ơ Yêhôva Brah Ndu! Huêng gâp mâu mâp ƀư ƀơ̆ ôh. Ntơm bơh jê̆ tât aƀaơ ri, gâp mâu mâp sa ôh mpô mpa khĭt măt mâu lah mpô mpa bri hêk sa, jêh ri mâu lĕ geh ndơ ƀơ̆ lăp jêh tâm trôm mbung gâp.”

¹⁵ Păng lah: “Dơi, Gâp mra ăn ma may sŏk ek ndrôk ntrok an ek bunuyh gay gŭch piăng let.”

¹⁶ Jêh nây Păng lah tay: “Hơi kon bunuyh, aơ, Gâp mâu ăn ôh piăng let tâm ƀon Yêrusalem, khân păng mra veh piăng let sa tâm nau klach, nhueh dak nhêt tâm nau krit toyh ngăn.

¹⁷ Yor pưt piăng let jêh ri dak, khân păng uănh ndrăng ma nau krit toyh jêh ri ra ai huơi yor ma nau tih khân păng nơm.”