Êsêkiêl 39 - Nau Brah Ndu Ngơi 2023

Nau mbơh lor êng tâm rdâng đah Y-Gôk

¹ “Hơi kon bunuyh, mbơh lor hom nau tâm rdâng đah Y-Gôk, jêh ri lah ma păng ôp aơ Kôranh Brah Yêhôva lah: ‘Hơi Y-Gôk hađăch phung Rôs, phung Mêsek jêh ri phung Tubal, aơ, Gâp tâm rdâng ma may,

² Gâp mra plăch rlơ̆ may. Gâp mra leo may hăn du luh jêh ri ăn may tât tă bơh n'gor ngai mpeh pa lơ, jêh ri njŭn may hao rlet klơ lĕ yôk Israel.

³ Gâp mra lơh ăn tŭp lơi na may tă bơh ti pa chiau jêh ri ƀư ăn tŭp lơi hăr may tă bơh ti pa ma.

⁴ May mra cha lôt khĭt ta klơ lĕ yôk Israel; may jêh ri lĕ rngôch tahan may, lĕ rngôch phung ƀon lan hăn tĭng may tâm ban lĕ. Gâp mra jao may ma ăp phung sĭm jêh ri ma mpô mpa bri ƀư ndơ sa.

⁵ May mra chôt khĭt tâm mir nâm bu Gâp hŏ lah jêh,’ Kôranh Brah Yêhôva lah pônây.

⁶ ‘Rnôk aơ, Gâp mra njuăl ŭnh tŭp ma bri Magôk jêh ri ma phung gŭ nau mpăn tâm lĕ gôl dak mƀŭt jêh ri khân păng mra gĭt Gâp jêng Brah Yêhôva.

⁷ Gâp mra mpơl amoh kloh ueh Gâp ta nklang ƀon lan Israel Gâp jêh ri Gâp mâu dơi ăn bu ngơi djơh tât amoh kloh ueh Gâp đŏng ôh. Lĕ ntil mpôl bunuyh mra gĭt Gâp jêng Brah Yêhôva, Nơm Kloh ueh Israel.

⁸ Aơ, nau nây mra tât jêh ri mra geh tât ngăn, Kôranh Brah Yêhôva lah pônây. Nây jêng nar Gâp hŏ mbơh jêh!

⁹ Rnôk nây, phung gŭ tâm ăp ƀon Israel mra hăn luh gay su ndơ jêh ri jao ma ŭnh lĕ ndơ dŏng tâm lơh, khêl toyh jêh ri khêl jê̆, na jêh ri hăr, tak jêh ri jôih. Khân păng mra djôt sĭnh ŭnh lĕ ndơ nây tâm pơh năm.

¹⁰ Khân păng mâu ŭch joi long tâm mir, mâu chôk long tâm krŏng, yorlah khân păng sŏk ndơ tâm lơh prăp sĭnh ŭnh. Khân păng mra tŭn jot phung lĕ tă tŭn jot khân păng jêh ri pit in phung hŏ tă pit in khân păng, Kôranh Brah Yêhôva lah pônây.

¹¹ Tâm nar nây, Gâp mra ăn Y-Gôk du ntŭk ƀư môch tâp ta Israel tâm rlŭng ma phung bu năch hăn nsong mpeh pa luh nar dak mƀŭt. Môch tâp nây mra king lơi trong phung bu năch hăn nsong. Yorlah ta ntŭk nây bu mra tâp Y-Gôk jêh ri lĕ rngôch phung âk ndrel păng. Bu mra ntơ ntŭk nây rlŭng Hamôn Gôk.

¹² Ngih Israel mra roh tâm pơh khay gay tâp săk jăn khĭt khân păng jêh ri ƀư ăn kloh tâm bri neh.

¹³ Lĕ rngôch phung ƀon lan gŭ tâm n'gor mra tâp khân păng. Nây jêng du nar toyh ăn ma phung ƀon lan Israel, nây jêng du nar Gâp mra tâm mpơl nau chrêk rmah, Kôranh Brah Yêhôva lah pônây.

¹⁴ Khân păng mra prơh phung bunuyh hăn ƀaƀơ lam n'gor gay tâp phung bunuyh khĭt hôm e klen ta klơ neh jêh ri ƀư kloh lơi. Pơh khay pakơi, khân păng mra hăn tĭng joi.

¹⁵ Tơlah khân păng hăn rgăn tâm lam n'gor jêh ri saơ lĕ nting nđăng pôri khân păng chŭt du mlâm jrŏng tâm mbên kêng meng kŏ tât phung kuyh ntu môch lôch tâp brôi lĕ nting nđăng nây tâm rlŭng Hamôn Gôk.

¹⁶ Tâm ban lĕ geh du rplay ƀon dơi ntơ jêng Hamôna. Nâm pônây, bu mra ƀư kloh n'gor.’

¹⁷ Hơi kon bunuyh, Kôranh Brah Yêhôva lah: ‘Ngơi hom ma ăp phung sĭm jêh ri lĕ rngôch mpa bri pô aơ: Văch rgum hom tă bơh lam ntŭk puăn njônh jêh ri gŭ văr jŭm du mlâm mpa ƀư brah Gâp nkra jêh ăn ma khân may, nây jêng du mpa ƀư brah toyh ta klơ yôk Israel gay ma khân may dơi sa puăch jêh ri nhêt mham.

¹⁸ Khân may mra sa puăch phung janh ktang, nhêt mham phung kôranh chiă uănh tâm neh ntu, phung biăp nkuăng, biăp kon, be nkuăng, ndrôk nkuăng lay bri Basan.

¹⁹ Khân may mra sa ngi ăn hơm, nhêt mham ăn nhŭl tă bơh mpa ƀư brah Gâp nkhĭt jêh ăn khân may.

²⁰ Ta sưng sông Gâp, khân may mra sa hơm puăch seh jêh ri puăch phung ncho seh, puăch phung janh ktang jêh ri ăp ntil phung tahan tâm lơh,’ Kôranh Brah Yêhôva lah pônây.”

Nau chrêk rmah phung ƀon lan Israel

²¹ “Gâp mra mpơl nau chrêk rmah Gâp tâm lĕ bri dak; lĕ rngôch ntil mpôl bunuyh mra saơ nau Gâp phat dôih jêh ri dơm ti Gâp ta klơ khân păng.

²² Ntơm bơh nar nây tât kăndơ̆, ngih Israel mra gĭt Gâp jêng Yêhôva Brah Ndu khân păng.

²³ Rnôk nây, lĕ ntil mpôl bunuyh mra gĭt ma ngih Israel hŏ leo hăn ƀư bu nă yor nau tih khân păng, yorlah păng hŏ ƀư tih tâm rdâng đah Gâp. Yor nây yơh Gâp pôn lơi muh măt Gâp đah khân păng, jao khân păng tâm ti phung rlăng jêh ri lĕ rngôch khân păng hŏ chôt khĭt ma đao.

²⁴ Gâp hŏ ƀư ma khân păng nâm pônây yor nau ƀơ̆ ƀơch jêh ri nau ƀai khân păng, jêh ri Gâp hŏ pôn lơi muh măt đah khân păng.

²⁵ Yor nây, Kôranh Brah Yêhôva lah: ‘Aƀaơ ri, Gâp mra njŭn leo phung tă ƀư bu nă Y-Yakôb plơ̆ sĭt; Gâp mra yô̆ an ma lĕ phung Israel jêh ri Gâp mra ntôn yor amoh kloh ueh Gâp.

²⁶ Khân păng mra chuêl lĕ nau bêk prêng jêh ri lĕ rngôch nau tih mâu răp jăp khân păng hŏ ƀư jêh đah Gâp tơlah khân păng mra gŭ rêh đăp mpăn tâm bri neh khân păng nơm, mâu hôm klach ma bu ôh.

²⁷ Tơlah Gâp lĕ njŭn khân păng sĭt tă bơh ta nklang phung ƀon lan êng jêh ri tâm rgum tay khân păng tă bơh bri phung rlăng khân păng, pôri Gâp mra mpơl nau kloh ueh Gâp yor tă khân păng tanăp măt âk bri dak.

²⁸ Khân păng mra gĭt Gâp jêng Yêhôva Brah Ndu khân păng, nđâp lah Gâp hŏ mprơh khân păng jêng bu nă tâm lĕ bri dak êng jêh nây rgum tay khân păng sĭt ta bri dak khân păng nơm, mâu ăn klen du huê bunuyh ôh.

²⁹ Gâp mâu mra pôn đŏng ôh muh măt đah khân păng yorlah Gâp mra nkhŭt Huêng Brah Gâp ta klơ ngih Israel,’ Kôranh Brah Yêhôva lah pônây.”