Êsêkiêl 38 - Nau Brah Ndu Ngơi 2023

Nau tâm lơh bơh Y-Gôk jêh ri phung mpôl băl bunuyh êng

¹ Geh nau Brah Yêhôva ngơi ma gâp:

² “Hơi kon bunuyh, rle hom muh măt may mpeh ma Y-Gôk tâm bri Magôk jêng hađăch ma phung Rôs, phung Mêsek jêh ri phung Tubal mbơh lor tâm rdâng đah păng.

³ May lah hom pô aơ Kôranh Brah Yêhôva lah: ‘Hơi Y-Gôk, hađăch ma phung Rôs, phung Mêsek jêh ri phung Tubal, aơ, Gâp tâm rdâng đah may.

⁴ Gâp mra plăch may, dơm nglĕ nklĕ ta kang may jêh ri njŭn may hăn tâm lơh ndrel ma lĕ rngôch phung tahan may, seh nđâp ma phung tahan ncho seh, lĕ rngôch nsoh ao loih jêh ri rnglăp ƀư jêng du phung tahan âk ngăn. Lĕ rngôch khân păng cheng âk khêl toyh, khêl jê̆ jêh ri djôt đao da dê.

⁵ Phung tahan Persi, phung Kus jêh ri phung Put mra gŭ ndrel khân păng, lĕ rngôch khân păng cheng khêl jêh ri ndô môk loih.

⁶ Gômer jêh ri lĕ rngôch phung tahan păng; Bet-Tôgarma tă bơh n'har bri pa lơ ndrel ma lĕ rngôch phung tahan păng, nây jêng âk phung ƀon lan gŭ ndrel may.

⁷ May rơm ndrăp hom; may ndrel lĕ rngôch phung ƀon lan tâm rgum văr jŭm may nkra ndrăp lor. May mra ƀĭt gai khân păng.

⁸ Âk nar pakơi, may mra sŏk dơn nau bu kuăl hăn tâm lơh. Tâm lĕ năm nglĕ dŭt, may mra hăn tâm lơh tâm du n'gor bu hŏ sâm rklaih jêh tă bơh đao, jêh ri phung ƀon lan păng tâm rgum âk mpôl băl bunuyh ma n'gor yôk Israel, jêng ntŭk rngot njăp lĕ roh rai bơh jŏ jêh. Bu hŏ njŭn khân păng sĭt tă bơh phung mpôl băl bunuyh jêh ri lĕ rngôch gŭ rêh đăp mpăn da dê.

⁹ May jêh ri nđâp ma phung tahan may ndrel ma phung mpôl băl bunuyh gŭ ndrel may mra rduh ran panăp, rduh lơh nâm bu phŭt chuănh, nâm bu ndâr tŭk nkŭm lam bri neh.’”

¹⁰ Kôranh Brah Yêhôva lah: “Tâm lĕ rngôch nar nây, geh nau mĭn mra nsĭch tâm rngok may jêh ri may mra geh mĭn nkra nau ƀư ƀai.

¹¹ May mra lah: ‘Gâp mra hăn tât lơh bri dak geh ƀon mâu geh mpêr ôh, gâp mra hăn tât ndrel phung ƀon lan gŭ mpăn, đăp rmên, nây jêng lĕ rngôch phung gŭ tâm ntŭk mâu geh mpêr ôh, mâu geh ôh rnăng mpông jêh ri mâu geh mpông.

¹² Gâp mra sŏk ndơ pit in, ntŭng pit ƀư rai jêh nây rduh lơh lĕ ntŭk rlâm rai aƀaơ lĕ geh bunuyh gŭ jêh ri hăn lơh du phung ƀon lan dơi njŭn sĭt tă bơh lĕ bri dak, nây jêng du phung ƀon lan geh âk mpô mpa rong jêh ri drăp ndơ dôl gŭ ta nklang n'gor.’

¹³ Phung Sêba jêh ri phung Dêdan, phung tăch rgâl tă bơh phung Tarsis jêh ri lĕ rngôch tahan mom ndăm păng mra lah ma may pô aơ: ‘Di lĕ may văch tât gay sŏk pit drăp ndơ? Di lĕ may rgum jêh phung lĭng tahan may gay ƀư rai, sŏk lơi prăk jêh ri mah, mpô mpa rong jêh ri drăp ndơ, jêh ri sŏk pit in âk râk ndô ndơ lĕ?’

¹⁴ Yor ri, hơi kon bunuyh, mbơh lor hom jêh ri lah ma Y-Gôk pô aơ Kôranh Brah Yêhôva lah: ‘Tâm nar nây, may mâu gĭt Israel jêng phung ƀon lan Gâp dôl gŭ đăp mpăn hĕ?

¹⁵ Rnôk nây, may mra văch tât tă bơh ntŭk may nơm gŭ jêng n'gor ngai mpeh pa lơ, may jêh ri âk phung ƀon lan gŭ ndrel may, lĕ rngôch ncho seh da dê, du mpôl bunuyh âk ngăn rgum jêng du phung tahan janh ktang.

¹⁶ Hơi Y-Gôk! May mra hăn tât lơh ƀon lan Israel Gâp nâm bu du ndâr tŭk nkŭm lĕ bri. N'hêl nanê̆, tâm rnôk nglĕ dŭt, Gâp mra ăn may lơh bri Gâp gay ma phung mpôl băl bunuyh uănh gĭt năl Gâp tơlah Gâp dŏng may gay mpơl nau kloh ueh Gâp tanăp măt khân păng.’

Nau mbơh lor tâm rdâng đah Y-Gôk

¹⁷ Kôranh Brah Yêhôva lah: ‘Mâu di kăl e Gâp hŏ dŏng oh mon Gâp jêng nơm mbơh lor Israel lah jêh? Tâm rnôk nây, âk năm rlau khân păng hŏ mbơh lor pô aơ Gâp mra ăn may tât tâm lơh đah phung ƀon lan Gâp.’

¹⁸ Kôranh Brah Yêhôva lah: ‘Aơ jêng nau mra geh tât tâm nar nây: Tơlah Y-Gôk mra hăn lơh bri Israel pôri nau ji nuih Gâp mra n'hôl duh klơ trôm muh Gâp.

¹⁹ Tâm nau ntôn jêh ri nau ji nuih, Gâp ngơi pô aơ: N'hêl nanê̆ tâm nar nây mra geh nau n'găr neh ntu toyh geh tât ta n'gor bri Israel.

²⁰ Tanăp măt Gâp, ka tâm dak mƀŭt, sĭm och klơ trôk, phung mpô mpa bri, lĕ rngôch ndrŭng rvơng mpa vơr tâm neh, lĕ rngôch bunuyh ta klơ neh ntu mra râm nsâr. Phung yôk bu mra klŭp lơi da dê, phung yôk klêr nâp rlâm da dê, jêh ri lĕ rngôch mpêr ƀon mra rlâm ta neh da dê.’

²¹ Kôranh Brah Yêhôva lah: ‘Gâp mra kuăl đao tât tâm rdâng đah Y-Gôk ta klơ lĕ rngôch yôk Gâp. Ăp nơm mra plăch đao tâm rdâng đah oh nâu khân păng nơm.

²² Gâp mra ƀư nau phat dôih tâm rdâng đah păng ma nau ji tưp jêh ri ma nau pling mham. Gâp mra nkhŭt dak mih toyh, glo dak pler, ŭnh jêh ri lŭ mô ŭnh nkhŭt ta klơ păng, ta klơ phung tahan âk păng jêh ri phung ƀon lan hăn ndrel păng.

²³ Nâm pônây, Gâp mra tâm mpơl nau toyh jêh ri nau kloh ueh Gâp, jêh ri Gâp mra dơi gĭt năl tra năp măt âk mpôl băl bunuyh. Khân păng mra gĭt Gâp jêng Brah Yêhôva.’”