Êsêkiêl 37 - Nau Brah Ndu Ngơi 2023

Rlŭng bêng ma nting kro

¹ Ti Brah Yêhôva dơm ta gâp; Păng leo gâp luh yor ma Huêng Brah Yêhôva jêh ri dơm gâp ta nklang rlŭng; rlŭng nây bêng ma nting.

² Păng leo gâp hăn nsong văr jŭm ta nklang nting nây. Ri, geh âk ngăn nting tâm rlŭng nây, jêh ri lĕ nting nây kro ngăn.

³ Păng lah ma gâp pô aơ: “Hơi kon bunuyh, dơi lĕ nting aơ dâk rêh tay?” Gâp plơ̆ lah: “Ơ Kôranh Brah Yêhôva, May nơm yơh gĭt nau nây!”

⁴ Păng lah tay ma gâp, “Mbơh lor hom ma nting nây jêh ri lah ma khân păng: ‘Hơi nting kro, iăt hom nau Brah Yêhôva.’

⁵ Kôranh Brah Yêhôva lah ma lĕ nting nây pô aơ: ‘Aơ, Gâp mra ăn n'hâm nsôr lăp tâm khân may jêh ri khân may mra rêh.

⁶ Gâp mra dơm rse suan tâm khân may, mra ăn mlay puăch hon ta klơ khân may jêh ri nkŭm khân may ma ntâu. Gâp mra ăn n'hâm nsôr tâm khân may jêh ri khân may mra rêh; jêh nây khân may gĭt Gâp jêng Brah Yêhôva.’”

⁷ Pônây, gâp mbơh lor nâm bu Păng hŏ lah jêh. Dôl gâp mbơh lor geh n'găr ktang jêh ri lĕ rngôch nting rgum tay, tâm ntrŭp tay jêng ăp kôp nting ndrăng nting.

⁸ Gâp uănh saơ rse suan jêh ri geh mlay puăch tâm sĭr ta klơ nting nây, geh ntâu nkŭm ƀiălah mâu geh n'hâm nsôr ôh tâm trôm.

⁹ Rnôk nây Păng lah ma gâp: “Hơi kon bu nuyh, mbơh lor hom ma sial; mbơh lor hom jêh ri lah ma sial pô aơ Kôranh Brah Yêhôva lah: Hơi nau n'hâm nsôr, văch tât bơh sial puăn njônh jêh ri nsôr ta klơ lĕ rngôch bunuyh bu nkhĭt gay khân păng dơi rêh.”

¹⁰ Pôri gâp mbơh lor nâm bu Păng hŏ lah, jêh ri nau n'hâm nsôr lăp tâm khân păng. Khân păng dâk rêh jêh ri dâk ma jâng khân păng, tâm rnglăp nsum jêng du phung tahan âk ngăn ngên.

¹¹ Păng lah ma gâp: “Hơi kon bunuyh, đơ nting aơ jêng lĕ rngôch ngih Israel. Aơ, khân păng ngơi pô aơ: ‘Nting hên lĕ kro jêh, nau kâp gân hên lĕ roh, hên bu ƀư rai lĕ jêh!’”

¹² Pôri, mbơh lor hom jêh ri lah ma khân păng pô aơ Kôranh Brah Yêhôva lah: “Hơi phung ƀon lan Gâp, aơ, Gâp mra pơk môch khân may, ƀư ăn khân may luh tă bơh môch, jêh ri Gâp mra njŭn khân may sĭt tâm bri Israel.

¹³ Hơi phung ƀon lan Gâp, khân may mra gĭt Gâp jêng Brah Yêhôva, tơlah Gâp lĕ pơk môch blang khân may jêh ri djôt khân may hao luh tă bơh môch blang.

¹⁴ Gâp mra dơm Huêng Brah Gâp tâm khân may jêh ri khân may mra rêh. Gâp mra njêng tay khân may tâm n'gor bri êng khân may nơm, jêh nây khân may mra gĭt Gâp jêng Brah Yêhôva; Gâp hŏ lah jêh ri Gâp lĕ ƀư jêh,” Brah Yêhôva lah pônây.

Bar mâng jra

¹⁵ Geh nau Brah Yêhôva lah ma gâp:

¹⁶ “Hơi kon bunuyh, sŏk hom du mlâm mâng jra jêh ri nchih ta klơ mâng nây pô aơ: ‘Ăn ma phung Yuđa jêh ri phung kon sau Israel tâm rnglăp đah păng.’ Sŏk hom du mlâm mâng jra êng jêh ri nchih ta klơ mâng nây: ‘Ăn ma Y-Yôsep, nây jêng mâng jra Êphraim, jêh ri bơh lĕ ngih Israel jêng tâm rnglăp đah păng.’

¹⁷ Ntrŭp hom bar mâng jra nây tâm rnglăp jêng du mlâm mâng jra tâm ti may.

¹⁸ Tơlah phung ƀon lan may ôp: ‘May mâu mra rblang nau tâm ntĭt aơ ma hên moh lĕ ntil nau nây?’

¹⁹ pôri may mplơ̆ lah hom pô aơ Kôranh Brah Yêhôva lah: ‘Aơ, Gâp mra sŏk mâng jra Y-Yôsep, nây jêng mâng jra tâm ti Y-Êphraim, jêh ri lĕ ndŭl mpôl Israel tâm rnglăp ndrel ma păng; Gâp mra tâm rnglăp păng đah mâng jra Yuđa, gay njêng knŏng du mlâm mâng jra dơm, jêh ri bar mâng jra mra jêng nguay tâm ti Gâp.’

²⁰ May djôt hom mâng jra may hŏ nchih jêh rplay samƀŭt ta klơ nây ăn khân păng uănh

²¹ jêh ri lah ma khân păng pô aơ Kôranh Brah Yêhôva lah: ‘Aơ, Gâp mra njŭn leo kon sau phung Israel tă bơh lĕ rngôch bri dak khân păng hŏ hăn tât jêh. Gâp mra rgum tay khân păng tă bơh puăn njônh jêh ri njŭn khân păng sĭt tâm bri êng ma khân păng nơm.

²² Gâp mra ƀư ăn ma khân păng jêng nguay bri dak tâm neh nây ta klơ lĕ yôk Israel, jêh ri knŏng du huê hađăch mra chiă uănh khân păng. Khân păng mâu mra jêng bar bri dak jêh ri mâu geh tâm pă jêng bar bri hađăch đŏng ôh.

²³ Khân păng mâu mra ƀư nau ƀơ̆ ƀơch êng tă bơh ma lĕ rup brah đŏng ôh, mâu lah tă bơh lĕ ndơ ƀơ̆, mâu lah tă bơh lĕ rngôch nau tih khân păng hŏ ƀư jêh. Gâp mra tâm rklaih khân păng tă bơh lĕ rngôch ntŭk khân păng hŏ ƀư tih. Gâp mra ƀư kloh khân păng; khân păng mra ƀư phung ƀon lan Gâp jêh ri Gâp mra ƀư Brah Ndu khân păng.

²⁴ Oh mon Gâp jêng Y-Đavit mra ƀư hađăch ta klơ khân păng jêh ri lĕ rngôch mra geh knŏng du huê bunuyh chiăp dơm. Khân păng mra chuat tĭng nau vay ƀư bơh Gâp; khân păng mra djôt prăp nau vay dăp Gâp jêh ri tĭng ƀư.

²⁵ Khân păng mra gŭ tâm bri Gâp hŏ ăn jêh ma oh mon Gâp jêng Y-Yakôb, jêh ri jêng bri chô yau khân may hŏ gŭ. Khân păng, kon sau khân păng jêh ri lĕ rngôch rô̆ khân păng mra gŭ ta nây kŏ tât ƀaƀơ n'ho ro. Oh mon Gâp jêng Y-Đavit mra ƀư hađăch khân păng mro mrăng.

²⁶ Gâp mra njêng đah khân păng du nau tâm rnglăp đăp mpăn, nây jêng du nau tâm rnglăp n'ho ro ta nklang khân păng đah Gâp. Gâp mra njêng jêh ri ƀư ăn rnoh bunuyh khân păng bĭk rơ̆. Gâp mra ndâk ngih brah kloh ueh Gâp ta nklang khân păng ƀaƀơ n'ho ro.

²⁷ Gâp mra gŭ ta nklang khân păng; Gâp mra ƀư Brah Ndu khân păng jêh ri khân păng mra ƀư ƀon lan Gâp.

²⁸ Rnôk nây, lĕ bri dak mra gĭt Gâp, Brah Yêhôva, hŏ ƀư kloh ueh ma phung Israel yorlah ngih brah kloh ueh Gâp mra gŭ ta nklang khân păng ƀaƀơ n'ho ro.’”