Êsêkiêl 36 - Nau Brah Ndu Ngơi 2023

Nau mbơh lor ma phung yôk Israel

¹ Hơi kon bunuyh, mbơh lor hom ma phung yôk Israel pô aơ: “Hơi phung yôk Israel, iăt hom nau Brah Yêhôva!

² Kôranh Brah Yêhôva lah: Yorlah tahan nơm rlăng lah jêh geh ma may pô aơ: ‘Ha ha! Đơ ntŭk gôl yôk prêh kăl e hŏ jêng drăp ndơn he jêh!’”

³ Yor ri, mbơh lor hom pô aơ: “Kôranh Brah Yêhôva lah: ‘N'hêl nanê̆, yorlah khân păng hŏ ƀư ăn khân may jêng rngol jêh ri rduh lơh khân may tă bơh ăp njônh gay ma khân may jêng drăp ndơn ma phung ƀon lan hôm e klen lĕ bri dak jêh ri khân may jêng ndơ phung ƀon lan ntêh rmot, ngơi mưch.’

⁴ Yor nây, hơi phung yôk Israel, iăt hom nau Kôranh Brah Yêhôva: ‘Kôranh Brah Yêhôva lah ma phung yôk jêh ri gôl yôk, bong dak n'hor jêh ri ntŭk rlŭng, ntŭk rlâm rai jêh ri lĕ ƀon rngol hŏ jao ăn phung ƀon lan hôm klen ma lĕ bri dak jŭm khân may pit in jêh ri suai rak.’

⁵ Yor ri, aơ jêng nau Kôranh Brah Yêhôva lah: ‘N'hêl nanê̆ ngăn tâm nau ntôn duh nuih, Gâp mbơh nau tâm rdâng ma phung ƀon lan hôm e klen bơh lĕ bri dak jêh ri ma lĕ rngôch phung Êđôm, jêng phung bêng ma nuih n'hâm răm maak jêh ri mưch rmot ngăn, mĭn sŏk bri Gâp ƀư drăp ndơn ăn ma khân păng nơm gay ma khân păng sŏk pit in ndrêch gơ̆.’

⁶ Pônây, mbơh lor hom ma bri Israel; mbơh hom ma phung nâm jêh ri lĕ yôk, bong dak n'hor jêh ri ntŭk rlŭng pô aơ: ‘Kôranh Brah Yêhôva lah: Ngăn, Gâp lah tâm nau ntôn jêh ri nau Gâp duh nuih yorlah khân may hŏ dơn lĕ bri dak bu ƀư bêk prêng.’

⁷ Yor ri, Kôranh Brah Yêhôva lah: ‘Gâp hŏ ton pô aơ, lĕ rngôch bri dak gŭ văr jŭm khân may ăt mra dơn nau bêk prêng.

⁸ Bi khân may, hơi phung yôk Israel, mra chăt nkeh n'gĭng jêh ri luh play ăn ma phung ƀon lan Israel, yorlah khân păng bơi ma plơ̆ sĭt.

⁹ Aơ, Gâp gŭ mpeh ma khân may, plơ̆ n'gĭl tay ma khân may jêh ri khân may mra dơi pŏk rlơk srih ntil.

¹⁰ Ta klơ neh khân may, Gâp mra ntop ăn bĭk rơ̆ bunuyh lĕ rngôch ngih Israel. Lĕ rngôch ƀon toyh mra geh bunuyh gŭ, lĕ rngôch ntŭk lĕ rlâm rai nchah mra rdâk njêng tay đŏng.

¹¹ Gâp mra ntop đŏng kon bunuyh jêh ri mpô mpa ta klơ neh khân may, khân păng mra hao bĭk rơ̆ lơn jêh ri chăt jêng. Gâp mra ƀư ăn khân may ma bunuyh âk nâm bu kăl e jêh ri ăn nau ƀŭn lap ma khân may âk lơn bơh ntơm saơm. Rnôk nây, khân may mra gĭt Gâp jêng Brah Yêhôva.

¹² Gâp mra ăn geh phung ƀon lan gŭ ta klơ neh khân may, jêng phung ƀon lan Israel Gâp, N'hêl nanê̆, khân păng mra dơi jêng ndơ may jêh ri may mra jêng drăp ndơn khân păng jêh ri khân may mra jêng drăp ndơn ma khân păng; may mâu mra ƀư roh lơi phung kon khân păng đŏng ôh.’”

¹³ Kôranh Brah Yêhôva lah: “Yorlah bu lah ma khân may pô aơ: ‘Hơi neh, may sa rvăn bu jêh ri ƀư roh lơi phung kon sau phung ƀon lan may’

¹⁴ yor ri, may mâu hôm sa rvăn bu đŏng ôh jêh ri mâu lĕ hôm ƀư roh lơi kon sau phung ƀon lan may đŏng ôh, Brah Yêhôva lah pônây.

¹⁵ Gâp mâu mra hôm ăn khân may tăng nau lĕ bri dak ƀư prêng đŏng ôh; may mâu mra hôm dơn ôh nau phung ƀon lan ntêh rmot jêh ri mâu mra ƀư chêh prah đŏng ôh ma phung ƀon lan, Kôranh Brah Yêhôva lah pônây.”

Nau plơ̆ njêng tay phung ƀon lan Israel

¹⁶ Geh nau Brah Yêhôva lah ma gâp:

¹⁷ “Hơi kon bunuyh, tơlah ngih Israel gŭ jêh tâm bri khân păng nơm, khân păng hŏ ƀư ƀơ̆ ƀơch bri nây yor tă trong hăn jêh ri kan khân păng nơm ƀư. Trong khân păng gŭ ngao panăp măt Gâp jêng nâm bu nau ƀơ̆ ƀơch bơh du huê bu ur rnôk păng geh săk bu ur.

¹⁸ Gâp hŏ nkhŭt nau Gâp ji nuih ta klơ khân păng yor tă bơh mham khân păng hŏ nkhŭt jêh ta klơ neh, jêh ri yorlah khân păng hŏ ƀư ƀơ̆ ƀơch bri neh nây yor ma rup brah khân păng.

¹⁹ Gâp hŏ ƀư nchah rai nhhơt jêh khân păng tâm phung ƀon lan jêh ri khân păng lĕ pru pra lam bri dak êng; Gâp hŏ phat dôih khân păng tĭng trong jêh ri kan khân păng pah.

²⁰ Ntŭk khân păng hŏ tât jêh tâm lĕ bri dak, khân păng hŏ ƀư tih đah amoh kloh ueh Gâp da dê, kŏ tât bu lah ma khân păng pô aơ: ‘Nây jêng phung ƀon lan Brah Yêhôva ƀiălah lĕ bu mprơh khân păng hăn du tă bơh bri Brah Yêhôva!’

²¹ Ƀiălah Gâp chrê nhhuach ma amoh kloh ueh Gâp phung ngih Israel hŏ ƀư tih jêh ta nklang lĕ ntil mpôl bunuyh, jêng ntŭk khân păng hŏ hăn tât jêh.

²² Yor nây, lah hom ma ngih Israel pô aơ: ‘Kôranh Brah Yêhôva lah: Hơi ngih Israel, mâu di yor ma khân may dĭng Gâp ƀư nau nây, ƀiălah yor amoh kloh ueh Gâp khân may hŏ ƀư mhĭk jêh tâm nklang lĕ phung ƀon lan jêng ntŭk khân may hŏ tât.

²³ Gâp mra ƀư ăn kloh amoh dŭt toyh Gâp, jêng amoh bu hŏ ƀư ƀơ̆ jêh ta nklang lĕ phung ƀon lan; n'hêl nanê̆, ta nklang lĕ phung ƀon lan, khân may ƀư ƀơ̆ amoh nây. Kôranh Brah Yêhôva lah: Tâm ban pônây, lĕ ntil mpôl bunuyh mra gĭt Gâp jêng Brah Yêhôva tơlah Gâp tâm mpơl tra năp măt khân păng nau kloh ueh tâm amoh Gâp rgăn ta khân may.

²⁴ Gâp mra sŏk sĭt lơi phung khân may tă bơh ta nklang lĕ phung ƀon lan, rgum tay khân may tă bơh lĕ rngôch bri dak jêh ri leo sĭt tâm bri êng khân may nơm.

²⁵ Gâp mra djrah dak rsang ta klơ khân may jêh ri khân may mra jêng kloh; Gâp mra ƀư kloh lĕ rngôch nau ƀơ̆ ƀơch khân may jêh ri lĕ rngôch rup brah khân may.

²⁶ Gâp mra ăn ma khân may nuih n'hâm mhe jêh ri Gâp mra dơm huêng brah mhe tâm khân may. Gâp mra sŏk lơi nuih n'hâm ma lŭ bơh nglay săk khân may jêh ri ăn ma khân may nuih n'hâm ma mlay.

²⁷ Gâp mra dơm Huêng Brah Gâp tâm khân may jêh ri ăn khân may chuat tĭng nau vay ntăm bơh Gâp, pôri khân may mra djôt prăp nau vay ƀư bơh Gâp jêh ri tĭng ƀư.

²⁸ Khân may mra gŭ tâm bri Gâp ăn jêh ma chô yau khân may; khân may jêng phung ƀon lan Gâp, jêh ri Gâp jêng Brah Ndu khân may.

²⁹ Gâp mra tâm rklaih khân may bơh lĕ rngôch nau ƀơ̆ ƀơch. Gâp mra kuăl ba ƀlê ueh, ăn chăt hon ntop âk jêh ri mâu ăn nau sât ji ngot tât ma khân may.

³⁰ Gâp mra ntop âk kao play jêh ri kao play tă bơh mir gay ma khân may mâu geh nau bêk prêng ta nklang lĕ bri dak bu yor nau sa sât ji ngot.

³¹ Rnôk nây, khân may kah gĭt tay trong mhĭk jêh ri nau kan mâu ueh khân may nơm. Khân may tâm rmot êng khân may nơm yor nau tih jêh ri nau ƀơ̆ khân may.’

³² Kôranh Brah Yêhôva lah: ‘Mâu di yor khân may dĭng Gâp ƀư nâm pônây, ăn khân may gĭt nau nây. Hơi ngih Israel, ăn khân may saơ nau bêk prêng jêh ri đit ngăn yor trong khân may nơm!’

³³ Kôranh Brah Yêhôva lah: ‘Tâm nar Gâp mra ƀư kloh lĕ rngôch nau tih khân may, Gâp mra ƀư tay ăn lĕ ƀon toyh geh ƀon lan gŭ jêh ri lĕ ntŭk rlâm rai mra rdâk tay.

³⁴ Bri neh lĕ rngol mra geh pŏk rlơk ntrok đah bu chalơi jêng rngot tanăp măt lĕ rngôch bunuyh hăn rgăn.

³⁵ Khân păng mra lah: “Bri neh rngol aơ hŏ jêng nâm bu n'gar Êđen; đơ ƀon lĕ rlâm rai, jêng rngol jêh ri ntŭk hŏ rai, aƀaơ lĕ nkra tay jêh ri geh bunuyh gŭ!”

³⁶ Rnôk nây, phung mpôl băl bunuyh hôm e klen văr jŭm khân may mra gĭt Gâp, Brah Yêhôva, hŏ ndâk njêng tay ntŭk rai jêh jêh ri tăm tay ta ntŭk ƀư rai. Gâp, Brah Yêhôva, hŏ lah, jêh ri mra ƀư nau nây.’

³⁷ Kôranh Brah Yêhôva lah: ‘Gâp ŭch ngih Israel dăn ma Gâp gay Gâp ƀư ăn nau aơ: Nây jêng Gâp mra ntop âk phung ƀon lan khân păng nâm bu du phung biăp.

³⁸ Lĕ rngôch ƀon rlâm rai mra âk phung bunuyh nâm bu phung biăp nhhơr ƀư ndơ ƀư brah, nâm bu phung biăp gŭ ta ƀon Yêrusalem tâm lĕ năng rƀŭn toyh. Jêh ri khân păng mra gĭt Gâp jêng Brah Yêhôva.’”