Êsêkiêl 35 - Nau Brah Ndu Ngơi 2023

Nau mbơh lor tâm rdâng đah Êđôm

¹ Nau Brah Yêhôva lah ma gâp:

² “Hơi kon bunuyh, rle hom muh măt may leo mpeh ma yôk Sêir jêh ri mbơh lor tâm rdâng ma păng.

³ Lah hom ma khân păng, Kôranh Brah Yêhôva lah: ‘Hơi yôk Sêir, Aơ, Gâp tâm rdâng đah may! Gâp mra yơr ti tâm rdâng đah may, ƀư ăn may jêng rngot njăp, ntŭk rngol.

⁴ Gâp mra ƀư ăn đơ ƀon toyh may jêng bri rdah jêh ri may mra jêng rngol. Rnôk nây, may mra gĭt Gâp jêng Brah Yêhôva.

⁵ Yorlah may hôm prăp nau rlăng ntơm bơh kăl e jêh ri hŏ jao jêh ma phung kon Israel ma tak đao tâm nar nau mhĭk tât khân păng tâm rnôk nglĕ dŭt.’

⁶ Yor nau nây, Kôranh Brah Yêhôva lah: ‘N'hêl nanê̆ tĭng nâm Gâp gŭ rêh mro mrăng, Gâp mra jao may tâm mham, jêh ri mham mra tĭng may. Yorlah may mâu tâm rmot ôh nau ƀư pling mham, yor nây mham mra tĭng may!

⁷ Pôri Gâp mra ƀư ma yôk Sêir jêng rngol, jêng nsoih dơm jêh ri ăn păng geh rai, mâu hôm geh bunuyh prot rgăn ta nây đŏng ôh.

⁸ Gâp mra ƀư ăn lĕ yôk păng bêng ma bunuyh bu nkhĭt; đơ phung bu nkhĭt ma đao mra chôt khĭt ta klơ yôk may, tâm lĕ rlŭng jêh ri lĕ rngôch n'hor dak may.

⁹ Gâp mra ƀư ma may jêng rngol n'ho ro; lĕ rngôch ƀon toyh may mâu mra geh bunuyh gŭ ôh jêh ri khân may mra gĭt Gâp jêng Brah Yêhôva.

¹⁰ Yorlah may lah jêh pô aơ: “Bar ndŭl mpôl nây jêh ri bar bri dak nây mra jêng ndơ gâp jêh ri hên mra sŏk pha khân păng” nđâp lah Brah Yêhôva dôl gŭ ta nây.’

¹¹ Yor nây, Kôranh Brah Yêhôva lah: ‘N'hêl nanê̆ tĭng nâm Gâp gŭ rêh mro mrăng, Gâp mra ƀư ma may tĭng nau ji nuih jêh ri nau rmot may hŏ ƀư jêh ma khân păng nôk may tâm rmot đah khân păng, jêh ri Gâp mra mpơl Gâp nơm ta nklang khân păng dôl Gâp phat dôih may.

¹² May mra gĭt Gâp, Brah Yêhôva, hŏ tăng lĕ nau suai rak may ngơi jêh tâm rdâng đah lĕ yôk Israel, pô aơ: “Lĕ yôk nây hŏ jêng rngol jêh ri jao jêh ăn ma he sa rvăn.”

¹³ Phung khân may hŏ sŏk bâr mbung ngơi n'hao êng săk nơm jêh gay tâm rdâng đah Gâp jêh ri ngơi nau mhĭk ma Gâp. N'hêl nanê̆ Gâp, lĕ tăng jêh nau nây!’

¹⁴ Kôranh Brah Yêhôva lah: ‘Dôl lĕ rngôch rplay neh maak răm Gâp mra ƀư ăn may jêng rngol.’

¹⁵ Yorlah may hâk răm jêh dôl drăp ndơn ngih Israel lĕ jêng rngol, yor nây Gâp ăt ƀư ma may tâm ban pônây lĕ. Hơi yôk Sêir, may ndrel ma lĕ bri Êđôm, ma nau nây lĕ rngôch n'gor mra jêng rngol, jêh ri khân păng mra gĭt Gâp jêng Brah Yêhôva.”