Êsêkiêl 34 - Nau Brah Ndu Ngơi 2023

Nau mbơh lor tâm rdâng đah phung rmăk leo Israel

¹ Geh nau Brah Yêhôva lah ma gâp:

² “Hơi kon bunuyh, mbơh lor hom nau tâm rdâng đah phung rmăk leo Israel; mbơh lor hom jêh ri lah ma phung rmăk leo nây pô aơ: ‘Kôranh Brah Yêhôva lah: Rêh ni ngăn ma phung rmăk leo Israel jêng bunuyh knŏng mĭn siăm êng khân may nơm! Mâu di hĕ phung rmăk leo mra siăm phung biăp lĕ?

³ Khân may sa glo dak toh, nsoh rsau biăp, nkhĭt phung biăp lay ƀiălah khân may mâu ăn phung biăp sa!

⁴ Khân may mâu ƀư ôh ma phung kon biăp kuet rôi ăn dơi jêng ktang, mâu ŭch săm ăn bah phung ji, mâu ŭch put ôh ma dak si phung sôt rmanh; mâu ŭch njŭn sĭt ôh phung tă bu mprơh du plơ̆ sĭt, mâu ŭch joi ôh phung lĕ nhhơt roh, ƀiălah khân may ƀư nau janh ƀai, nchâp nđâl chiă uănh khân păng.

⁵ Yorlah mâu geh bunuyh rmăk leo pôri khân păng nchah rai nhhơt, jêh ri tơlah khân păng lĕ nchah rai nhhơt jêh khân păng jêng mpa sa ma lĕ rngôch mpô mpa bri.

⁶ Phung biăp Gâp nchah rai nhhơt ta klơ lĕ rngôch nâm jêh ri lĕ rngôch yôk prêh; phung biăp Gâp hăn nsong lam bri neh ntu, mâu geh bunuyh mray, mâu lĕ geh bunuyh tĭng joi.’

⁷ Yor ri, Hơi phung rmăk biăp, iăt hom nau Brah Yêhôva lah:

⁸ Kôranh Brah Yêhôva lah: ‘N'hêl nanê̆ tĭng nâm Gâp gŭ rêh mra mrăng, yorlah mâu geh bunuyh rmăk leo rĭ dĭng phung biăp Gâp hŏ ƀư mpa sa jêh ri hŏ jêng ndơ sa ma lĕ rngôch ntil mpô mpa bri. Phung rmăk biăp Gâp ăt mâu lĕ ŭch joi biăp Gâp, ƀiălah khân păng siăm êng khân păng nơm ƀiălah mâu ŭch ôh siăm phung biăp Gâp.’

⁹ Yor nây, hơi phung rmăk biăp, iăt hom nau Brah Yêhôva:

¹⁰ Kôranh Brah Yêhôva lah: ‘Aơ Gâp tâm rdâng đah phung rmăk biăp nây jêh ri Gâp dăn mplơ̆ sĭt tay biăp Gâp tă tâm ti khân păng. Gâp mâu hôm ăn khân păng chiăp đŏng ôh biăp Gâp, jêh ri khân păng ăt mâu dơi lĕ chiăp êng khân păng nơm đŏng ôh. Gâp mra tâm rklaih biăp Gâp luh du tă bơh trôm mbung khân păng gay biăp mâu ƀư ôh ndơ sa ăn ma khân păng.’

Brah Ndu jêng Nơm rmăk biăp ngăn

¹¹ ‘Kôranh Brah Yêhôva lah: Aơ Gâp nơm yơh mra joi biăp Gâp, Gâp mra tĭng joi khân păng.

¹² Nâm bu du huê rmăk biăp tĭng joi phung biăp păng tâm nar păng gŭ ta nklang phung biăp păng lĕ nchah rai nhhơt, Gâp ăt joi biăp Gâp nâm bu pônây lĕ. Gâp mra tâm rklaih khân păng luh du bơh lĕ rngôch ntŭk khân păng bơh lĕ rngôch ntŭk khân păng hŏ nchah rai nhhơt tâm nar tŭk mbâl ngo klĕng.

¹³ Gâp mra djôt leo khân păng luh du tă bơh ta nklang mpôl ƀon lan bri êng; Gâp mra rgum khân păng tă bơh tâm lĕ bri dak êng jêh ri njŭn leo khân păng sĭt tâm bri neh prăp êng ma khân păng nơm. Gâp mra chiăp khân păng ta klơ lĕ yôk Israel, êp tu dak jêh ri lĕ rngôch ntŭk geh bunuyh gŭ tâm n'gor bri.

¹⁴ Gâp mra chiăp rong khân păng tâm ndrêch gơ̆ nse jêh ri ndrung n'gar khân păng mra ăn ta klơ lĕ yôk Israel, ta neh prêh phung Israel. Ta Nây, khân păng mra gŭ rlu kuen tâm drung ueh răm jêh ri sa ta ntŭk ndrêch gơ̆ nse ueh, nây jêng ta klơ lĕ yôk Israel.

¹⁵ Gâp nơm yơh mra chiăp biăp Gâp jêh ri ăn khân păng rlu kuen,’ Kôranh Brah Yêhôva lah pônây.

¹⁶ Gâp mra joi biăp lĕ nhhơt roh, têk mplơ̆ sĭt biăp bu mprơh, biăp geh rmanh put săm ăn bah jêh ri ƀư ma phung lĕ huăr dơi jêng ktang. Ƀiălah Gâp mra ƀư rai lơi phung biăp lay jêh ri ktang. Gâp mra chiă uănh khân păng ma nau sŏng srăng.

¹⁷ Kôranh Brah Yêhôva lah: ‘Bi ma may jêng phung ndrăng biăp Gâp, aơ, Gâp mra phat dôih ndrăng phung biăp jêh ri phung biăp, nkuăng ma be nkuăng.

¹⁸ Phung khân may sa gơ̆ tâm ndrêch gơ̆ nse ueh mâu hŏ tŏng hĕ dĭng khân may sŏk jâng jot plên lơi gơ̆ hôm e? Khân may nhêt dak rsang mâu hŏ tŏng hĕ dĭng khân may sŏk jâng nchŭ lơi ăn rkhăl dak hôm e rmeh?

¹⁹ Bi phung biăp Gâp mra sa gơ̆ khân may lĕ jot jêh ma jâng, jêh ri nhêt dak lĕ jâng khân may nchŭ rkhăl!’

²⁰ Yor nây, Kôranh Brah Yêhôva lah: ‘Aơ, Gâp nơm yơh mra phat dôih ndrăng biăp lay jêh ri biăp rgay.

²¹ Yorlah khân may mbeng ma pŭng vĕ jêh ri ntrôl ma săng nglik, gĕ ma nke lĕ rngôch biăp lĕ hươi kŏ tât nôk khân may ƀư nchah rai nhhơt khân păng luh padih.

²² Ƀiălah Gâp mra tâm rklaih phung biăp Gâp, khân păng mâu mra ƀư ndơ sa ma bu đŏng ôh, jêh ri Gâp mra phat dôih ndrăng phung biăp jêh ri phung biăp.

²³ Gâp mra ndâk ta khân păng knŏng du huê rmăk biăp, păng mra mât rong phung nây, jêng Y-Đavit oh mon Gâp. Păng yơh mât rong khân păng, ƀư jêng du huê bunuyh chiăp khân păng.

²⁴ Gâp, Brah Yêhôva, mra ƀư Brah Ndu khân păng, bi Y-Đavit, oh mon Gâp, mra ƀư hađăch ta nklang khân păng. Gâp Brah Yêhôva hŏ lah jêh pônây.

²⁵ Rnôk nây, Gâp mra njêng du nau tâm rnglăp đăp mpăn đah phung biăp Gâp. Gâp mra mprơh lơi đơ mpô mpa bri janh tâm n'gor gay ăn phung ƀon lan Gâp dơi gŭ mpăn tâm bri rdah jêh ri gŭ bê̆ch tâm krŏng.

²⁶ Gâp mra ƀư ăn khân păng đah lĕ ntŭk văr jŭm yôk Gâp jêng tu nau ueh uĭn. Gâp mra ăn tŭp dak mih tâm di yan; dak mih nây mra jêng nau ueh uĭn.

²⁷ Tơm si nklang bri mra geh play âk jêh ri neh mra chăt hon jêng ndơ. Khân păng mra gŭ mpăn tâm bri khân păng jêh ri khân păng mra gĭt Gâp jêng Brah Yêhôva tơlah Gâp hŏ nkê̆ch pă jêh lĕ mâng mbăk khân păng, jêh ri hŏ rklaih khân păng tă bơh ti phung nhŭp khân păng ƀư jêng dĭk.

²⁸ Khân păng mâu mra ƀư jêng ndơ sa ma phung bu năch đŏng ôh, jêh ri phung mpô mpa bri mâu mra kăp hêk ôh khân păng. Khân păng mra gŭ mpăn, mâu geh ôh nuyh ƀư ăn nau klach krit.

²⁹ Gâp mra ndâk ma khân păng n'gar play lư amoh, khân păng mâu mra khĭt ji ngot đŏng ôh tâm bri khân păng nơm, jêh ri khân păng mâu mra dơn đŏng ôh nau lĕ bri dak văr jŭm ƀư bêk prêng.

³⁰ Khân păng mra gĭt Gâp, Brah Yêhôva, jêng Brah Ndu khân păng, gŭ ndrel khân păng jêh ri gĭt ngih Israel jêng ƀon lan Gâp, Kôranh Brah Yêhôva lah pônây.

³¹ Khân may jêng biăp Gâp, jêng phung biăp tâm ndrêch gơ̆ Gâp; khân may jêng kon bunuyh jêh ri Gâp jêng Brah Ndu khân may’, Kôranh Brah Yêhôva lah pônây.”