Êsêkiêl 33 - Nau Brah Ndu Ngơi 2023

Nau rhêt rhôi jêh ri nau ndâk njêng mhe tay phung ƀon lan Kôranh Brah. – Ƀon Yêrusalem mhe. – Nau kan nơm mbơh lor ( 33:1 – 48:35 ) Nau pah kan nơm mbơh lor

¹ Geh nau Brah Yêhôva lah ma gâp:

² “Hơi kon bunuyh, lah hom ma phung ƀon lan may mbơh lah pô aơ: ‘Tơlah Gâp ăn đao tât ma du n'gor bri, jêh ri ƀon lan tâm bri nây săch du huê nuyh gay ƀư bunuyh gak njrăng;

³ bunuyh nây saơ đao tât tâm bri dak păng uh nŭng gay mbơh ma phung ƀon lan.

⁴ Tơlah bu nơm tăng bâr nŭng mâu iăt nau mbơh, jêh ri đao tât nkhĭt păng pônây mham păng mra nkhŭt ta bôk păng nơm.

⁵ Yorlah păng hŏ tăng jêh bâr nŭng ƀiălah mâu ŭch njrăng ôh yor nây mham păng mra nkhŭt ta bôk păng. Ƀiălah tơlah păng iăt nau mbơh ri mơ dơi rklaih nau rêh păng nơm.

⁶ Ƀiălah, tơlah nơm kâp gak saơ đao tât mâu ŭch uh ôh nŭng gay mbơh ma phung ƀon lan, yor nây đao tât nkhĭt lơi nau rêh du huê bunuyh nơm nây mra khĭt tâm nau djơh mhĭk păng nơm, ƀiălah Gâp mra kêt mham păng ta ti nơm gak.’

⁷ Aơ hơi kon bunuyh, Gâp hŏ njêng may ƀư bunuyh kâp gak ăn ma ngih Israel, yor nây iăt hom nau ngơi tă bơh bâr mbung Gâp jêh ri tâm tang Gâp mbơh ăn khân păng njrăng.

⁸ Tơlah Gâp lah ma bunuyh mhĭk pô aơ: ‘Hơi phung mhĭk, nanê̆ ngăn may mra khĭt!’ Tơlah may mâu mbơh ôh ma bunuyh mhĭk chalơi trong djơh mhĭk păng, pôri bunuyh mhĭk nây mra khĭt tâm nau djơh mhĭk păng, ƀiălah Gâp mra ăn krêp mham păng ta ti may.

⁹ Ƀiălah, tơlah may hŏ mbơh jêh ma phung mhĭk chalơi lĕ trong djơh mhĭk păng ƀiălah păng mâu ŭch lơi ôh, păng mra khĭt tâm nau djơh mhĭk păng ƀiălah may hŏ rklaih jêh nau rêh may nơm.

¹⁰ Hơi kon bunuyh, lah hom ma ngih Israel pô aơ: ‘Khân may lah: Yor nau mhĭk jêh ri nau tih hên bun jâk ta klơ hên ƀư ăn ma hên rgănh hâu ngăn yor păng; mâm dơi hên rêh?’

¹¹ Lah hom ma khân păng pô aơ: ‘Kôranh Brah Yêhôva lah: Tĭng nâm Gâp gŭ rêh mro mrăng, Gâp mâu maak ôh ma nau khĭt nơm mhĭk, ƀiălah maak yor nau păng chalơi trong păng jêh ri dơi rêh. Khân may chalơi hom, chalơi trong djơh mhĭk khân may! Mâm ƀư khân may ŭch khĭt, hơi ngih Israel?’

¹² Bi ma may, hơi kon bunuyh, lah hom ma phung ƀon lan may pô aơ: Nau sŏng may nau sŏng mâu mra tâm rklaih păng ôh tơlah păng ƀư tih, jêh ri nau mhĭk nơm mhĭk mâu mra ƀư ăn păng rdja tơlah păng hŏ chalơi jêh nau mhĭk nây. Bunuyh sŏng srăng mâu mra yor tă nau sŏng srăng păng ơm geh dơi rêh tâm nar păng ƀư tih.

¹³ Nđâp tơlah Gâp geh ngơi ma nơm sŏng srăng n'hêl nanê̆ păng mra rêh, ƀiălah, tơlah păng nsing ma nau sŏng srăng păng nơm jêh ri ƀư tih, pôri mâu geh du ntil nau sŏng srăng păng dơi kah gĭt tay ƀiălah păng mra khĭt tâm nau djơh mhĭk păng hŏ ƀư.

¹⁴ Tơlah Gâp lah ma nơm mhĭk: ‘N'hêl nanê̆ may mra khĭt!’ Tơlah nơm mhĭk nây chalơi nau tih jêh ri ƀư nau sŏng srăng, nau di;

¹⁵ tơlah păng mplơ̆ sĭt ndơ nchăm, mplơ̆ sĭt ndơ păng hŏ ntŭng, chuat tĭng nau vay nau rêh, mâu ƀư ôh djơh mhĭk, n'hêl nanê̆ păng mra rêh jêh ri păng mâu khĭt ôh.

¹⁶ Mâu geh du ntil nau tih păng hŏ ƀư mra kah gĭt tay gay ma tâm rdâng đah păng; păng hŏ ƀư nau sŏng srăng, nau di, n'hêl nanê̆ păng mra rêh.

¹⁷ Ƀiălah phung mpôl băl may lah pô aơ: ‘Trong Kôranh Brah mâu sŏng ôh’ ƀiălah trong khân păng mâu sŏng ôh.

¹⁸ Tơlah bunuyh sŏng srăng chalơi nau sŏng srăng păng nơm ƀư nau mhĭk pôri păng mra khĭt tâm nau nây.

¹⁹ Tơlah phung mhĭk chalơi lĕ nau mhĭk păng jêh ri ƀư tĭng nau sŏng srăng, nau di ngăn, tă bơh nau nây păng mra rêh.

²⁰ Ƀiălah khân may lah pô aơ: ‘Trong Kôranh Brah mâu sŏng ôh!’ Hơi ngih Israel, Gâp mra phat dôih khân may, ăp nơm tĭng nâm kan păng ƀư.”

Nau mhe mhan ma ƀon Yêrusalem rlâm tŭp jêh

²¹ Tâm năng nguay, khay jât, năm rơh jât bar, pakơi nôk nau bu nhŭp hên hăn ƀư bu nă, geh du huê bunuyh rklaih jêh tă bơh ƀon Yêrusalem văch mbơh ma gâp pô aơ: “Ƀon lĕ bu sŏk jêh!”

²² Rnôk nây, kêng mhaơ êlor ma bunuyh klaih nây văch tât, ti Brah Yêhôva dra ta gâp jêh ri Păng hŏ pơk mbung gâp êlor bunuyh klaih nây văch tât kêng ôi. Pônây bâr mbung gâp dơi hă gâp mâu hôm mlo đŏng ôh.

²³ Geh nau Brah Yêhôva lah ma gâp:

²⁴ “Hơi kon bunuyh, phung gŭ tâm ntŭk rlâm rai ta bri Israel lah pô aơ: ‘Y-Abraham knŏng du huê păng ƀiălah hŏ dơi sŏk dơn jêh bri neh aơ. Bi ma he âk bunuyh n'hêl nanê̆ bri aơ mra dơi ăn ma he ƀư jêng drăp ndơn.’

²⁵ Yor ri, lah hom ma khân păng pô aơ: ‘Kôranh Brah Yêhôva lah: Khân may sa mham mpô mpa, muh măt n'gơr rlet mpeh ma rup brah khân may jêh ri ƀư nkhŭt mham, khân may mra dơi sŏk dơn bri neh aơ lĕ?

²⁶ Khân may nsing ma đao khân may ƀư lĕ nau ƀơ̆; ăp nơm tâm khân may ƀư prêng ur nơm chiau meng khân may. Khân may dơi sŏk ndơn bri neh aơ lĕ?’

²⁷ Pônây may lah hom ma khân păng pô aơ: Kôranh Brah Yêhôva lah: ‘Di ngăn tĭng nâm Gâp gŭ rêh mro mrăng, phung gŭ tâm ntŭk rlâm rai mra chôt khĭt ma đao, jêh ri Gâp mra jao phung gŭ tâm mir ăn ma mpô mpa sa kăp sa rvăn; bi ma phung gŭ tâm pôih tahan, trôm ntu mra khĭt yor nau ji tưp.

²⁸ Gâp mra ƀư bri aơ jêng rngol, rngot njăp, nau dăng ktang păng ƀư sưr rlau mra rai lôch; lĕ yôk Israel mra jêng rngol kŏ tât mâu geh du huê nuyh prot rgăn ta nây đŏng ôh.

²⁹ Rnôk nây, khân păng mra gĭt Gâp jêng Brah Yêhôva tơlah Gâp hŏ ƀư ma bri aơ jêng rngol, nsoih dơm yor lĕ rngôch nau ƀơ̆ ƀơch khân păng hŏ ƀư.’

³⁰ Hơi kon bunuyh, phung ƀon lan may gŭ n'gŏ mpêr ƀon jêh ri nkoch may tanăp mpông ngih; khân păng tâm ngơi ndrăng khân păng nơm, nơm aơ đă nơm ri: ‘Ăn văch hom iăt nau mbơh tă bơh Brah Yêhôva.’

³¹ Khân păng n'hoch lĕ rngôch mpôl văch ma may; phung ƀon lan Gâp gŭ tanăp măt may jêh ri iăt nau may ƀiălah khân păng mâu tĭng ƀư ôh. Mbung khân păng ngơi âk bêng ma nau rŏng ƀiălah nuih n'hâm knŏng joi nau mâu tâm di.

³² Aơ, khân păng uănh may nâm bu du huê nuyh blau mprơ, geh bâr ueh jêh ri blau kreh gong rêng; khân păng iăt nau may lah ƀiălah khân păng mâu tĭng ƀư ôh.

³³ Yorlah, pônây, tơlah nau mhĭk aơ geh tât, jêh ri aơ, păng dôl tât, nôk nây khân păng gĭt geh du huê nơm mbơh lor gŭ jêh ta nklang khân păng.”