Êsêkiêl 32 - Nau Brah Ndu Ngơi 2023

Nau mprơ rngot ma nau rai yot bri Êjipt

¹ Tâm năng nguay, khay jât ma bar, năm rơh jât ma bar, geh nau Brah Yêhôva lah ma gâp:

² “Hơi kon bunuyh, ƀư hom du nau mprơ rngot ma Pharaôn, hađăch Êjipt, pô aơ: ‘May tâm ban ma du mlâm yau mŭr ta nklang lĕ ntil mpôl bunuyh; Mâu êng ôh đah mpa djơh tâm dak mƀŭt, Mpât rbŭh ta nklang dak n'hor. May sŏk jâng rchŭ dak ăn rkhăl, Jêh ri ƀư lĕ dak krong bêng ma dak bŏk.’

³ Kôranh Brah Yêhôva lah: ‘Gâp mra nthăng jal Gâp ta klơ may, Ndrel du mpôl bunuyh geh âk ntil mpôl bunuyh, Jêh ri khân păng mra đŏt may tâm jal Gâp.

⁴ Gâp mra chalơi may ta klơ neh, Jêh ri klŭp may ta nklang mir hŏng. Gâp mra ƀư ăn lĕ rngôch phung sĭm klơ trôk jŭr drâm ta klơ may, Jêh ri phung mpô mpa lam bri sa puăch may kŏ tât mpay.

⁵ Gâp mra srih puăch may tâm ăp dor yôk, Jêh ri sŏk săk jăn may khĭt brôi bêng lĕ ntŭk rlŭng.

⁶ Gâp mra sŏk mham may djrah neh Kŏ tât ta lĕ rngôch dor yôk, Ăp lĕ rngôch n'hor dak bêng ma săk jăn may.

⁷ Tơlah Gâp buh nhhât may Gâp mra nkŭm lĕ ndâr trôk, Jêh ri ăn phung mănh klơ trôk jêng ngo klĕng; Nkŭm nar ma ndâr tŭk, Jêh ri khay mâu mra hôm nchrat ang đŏng ôh.

⁸ Gâp mra ƀư nau ang phung mănh ta klơ trôk, Nhhât klêm ta may, Jêh ri Gâp mra leo nau ngo nkŭm ta bri may,’ Kôranh Brah Yêhôva lah pônây.

⁹ ‘Gâp mra ƀư nuih n'hâm âk ntil mpôl bunuyh rŭng răng, Tơlah Gâp mbơh ma nau ƀư rai ma may tâm lĕ ntil mpôl bunuyh, Ta nklang lĕ bri dak may mâu hŏ mâp gĭt ôh.

¹⁰ Gâp mra ăn âk phung ƀon lan geh nau klach krit yor may, Jêh ri phung hađăch khân păng mra râm nsâr yor may, Tơlah Gâp yơr đao tanăp măt khân păng. Tâm nar may rlâm tŭp jêh, Lĕ rngôch bunuyh klach da dê ăp nar ăp mông Mĭn rvê ma nau rêh păng nơm.’

¹¹ Ngăn yơh, Kôranh Brah Yêhôva lah: ‘Đao hađăch Babilôn Mra rduh lơh may.

¹² Gâp mra ăn ma phung ƀon lan âk râk may mra chôt khĭt Tâm dâng mpiăt đao phung ƀai, Jêng phung djơh mhĭk lơn tâm lĕ rngôch phung ƀon lan. Khân păng mra dong nchah nau sưr rlau phung Êjipt Jêh ri lĕ rngôch phung ƀon lan âk păng mra rai lôch da dê.

¹³ Gâp mra ƀư rai lĕ rngôch mpô mpa rong păng Kêng kơh dak krong toyh; Dak mâu hôm geh nchŭ rkhăl yor jâng bunuyh, Mâu lah yor nchop mpô mpa đŏng ôh.

¹⁴ Rnôk nây, Gâp mra ƀư lĕ n'hor dak khân păng dơi kloh rsang, Jêh ri Gâp mra ƀư lĕ dak krong khân păng hoch nâm bu dak ngi ôlive,’ Kôranh Brah Yêhôva lah pônây.

¹⁵ ‘Tơlah Gâp ăn bri Êjipt jêng ntŭk rngol, Jêh ri nau âk rmeh ơm geh tâm bri nây bu sŏk lĕ rngôch; Tơlah Gâp lơh lĕ rngôch phung ƀon lan gŭ ta nây, Pôri khâng păng gĭt Gâp jêng Brah Yêhôva.

¹⁶ Aơ jêng nau mprơ rngot khân păng mra nhĭm vơl. Phung kon bu ur lĕ bri dak mra nhĭm vơl ma nau rngot ngăn. Khân păng mra mprơ nau nây gay nhĭm ma n'gor bri Êjipt jêh ri ma lĕ rngôch phung ƀon lan gŭ tâm păng,’ Kôranh Brah Yêhôva lah pônây.”

¹⁷ Tâm năm rơh jât bar, năng jât prăm tâm khay, geh nau Brah Yêhôva lah ma gâp:

¹⁸ “Hơi kon bunuyh, nhĭm vơl hom ma ƀon lan bĭk rơ̆ bri Êjipt. Nklơ̆ lơi hom ƀon lan nây ndrel ma phung kon bu ur lĕ rngôch bri dak geh lư n'găr jŭr tâm ntŭk jru tâm dâng neh, ăn ma khân păng ndrel mrô nal ma phung hŏ jŭr jêh ma ntu jru!

¹⁹ May ueh lơn ma bu? Pôri jŭr hom jêh ri bê̆ch ndrel ma phung mâu dơn nau koh ntâu.

²⁰ Di yơh, phung nây mra cha lôt ta nklang phung bu nkhĭt ma đao. Êjipt bu jao ăn đao jêh ri leo hăn ndrel ma lĕ rngôch phung ƀon lan âk păng!

²¹ Tă bơh ta nklang ƀon phung khĭt, phung tahan ktang ngăn ndrel ma phung kơl păng mra ngơi ma păng pô aơ: ‘Khân păng hŏ jŭr ta nây, khân păng hŏ gŭ rklăk jêh ndrel ma phung mâu hŏ dơn nau koh ntâu, jêng phung bu nkhĭt ma đao!’

²² Asiri gŭ ta nây ndrel ma lĕ rngôch phung ƀon lan păng; văr jŭm păng jêng môch da dê. Lĕ rngôch khân păng lĕ bu nkhĭt jêh jêh ri chôt khĭt yor ma đao.

²³ Môch păng ntŭk jru tâm trôm ntu jêh ri phung ƀon lan păng gŭ dâk văr jŭm môch păng. Lĕ rngôch bu nkhĭt da dê; khân păng jêng phung srih nau krit toyh tâm bri dak phung hôm rêh ƀiălah aƀaơ ri hŏ chôt khĭt yor ma đao.

²⁴ Ta nây geh phung Êlam ndrel ma lĕ rngôch phung lan âk păng gŭ văr jŭm môch păng. Lĕ rngôch lĕ bu nkhĭt da dê jêh ri chôt khĭt yor ma đao. Phung mâu hŏ dơn koh ntâu nây hŏ trŭnh tâm ntu jru tâm dâng neh, nây jêng phung srih nau nkrit toyh tâm bri dak phung hôm rêh. Khân păng geh nau bêk prêng ndrel ma phung trŭnh jêh ntŭk trôm jru.

²⁵ Sưng khân păng bu hŏ dơm jêh ta nklang phung bu nkhĭt, ndrel ma phung ƀon lan âk gŭ dâk văr jŭm môch păng. Lĕ rngôch phung mâu hŏ dơn nau koh ntâu nây hŏ khĭt yor ma đao yorlah khân păng hŏ srih nau krit toyh tâm bri phung hôm rêh. Khân păng dơn nau bêk prêng ndrel ma phung trŭnh jêh tâm trôm ntu jru, jêh ri bu dơm păng ta nklang phung bu nkhĭt jêh.

²⁶ Ta nây geh phung Mêsek, phung Tubal jêh ri lĕ rngôch ƀon lan păng; môch phung nây gŭ văr jŭm khân păng. Lĕ rngôch jêng phung mâu hŏ dơn koh ntâu bu hŏ nkhĭt jêh yor ma đao, yorlah khân păng srih nau krit toyh tâm bri dak phung hôm rêh.

²⁷ Khân păng mâu bê̆ch ôh ndrel ma phung tahan janh ktang, mâu hŏ dơn koh ntâu hŏ chôt khĭt jêh, nây jêng phung hŏ trŭnh tâm ƀon phung khĭt ndrel ma ndơ khân păng tâm lơh. Bu hŏ dơm jêh đao tâm dâng bôk khân păng nơm, jêh ri nau mhĭk khân păng bun ta klơ nting khân păng nơm yorlah khân păng lĕ tă ƀư krit ma phung tahan janh ktang tâm lam bri phung hôm rêh.

²⁸ Ƀiălah bu mra mbang nchah may ta nklang phung mâu hŏ koh ntâu jêh ri mra bê̆ch ndrel ma phung bu nkhĭt ma đao.

²⁹ Phung Êđôm gŭ ta ntŭk nây ndrel phung hađăch jêh ri lĕ rngôch phung kôranh păng; nđâp lah phung bunuyh ktang, khân păng tâm ban lĕ bu dơm ndrel ma phung bu nkhĭt ma đao. Khân păng bê̆ch ndrel phung mâu hŏ koh ntâu ôh, jêh ri ndrel phung trŭnh tâm trôm ntu jru.

³⁰ Ta nây tâm ban lĕ geh lĕ rngôch phung kôranh gŭ mpeh pa lơ, jêh ri lĕ rngôch phung ƀon lan Sidôn hăn trŭnh da dê ndrel phung bu nkhĭt, nđâp lah khân păng hŏ dŏng janh ktang ăn bu krit toyh. Khân păng lâng bê̆ch nâm bu phung mâu hŏ koh ntâu ndrel phung bu nkhĭt ma đao; khân păng bêk prêng ndrel ma phung trŭnh tâm trôm ntu jru.

³¹ Pharaôn saơ khân păng geh nau bonh leng ma lĕ rngôch phung ƀon lan păng âk râk, nây jêng Pharaôn jêh ri lĕ rngôch phung tahan păng bu nkhĭt jêh ma đao, Kôranh Brah Yêhôva lah pônây.

³² Nđâp tơlah Gâp ăn Pharaôn ƀư nau klach krit bu tâm bri phung hôm rêh, ƀiălah păng jêh ri phung ƀon lan păng mra bê̆ch ta nklang phung mâu hŏ koh ntâu jêh ri phung bu nkhĭt ma đao,” Kôranh Brah Yêhôva lah pônây.