Êsêkiêl 31 - Nau Brah Ndu Ngơi 2023

Nau mbơh lor ma ƀon Yêrusalem bu mra ƀư rai

¹ Ta năng nguay, khay pe, tâm năm rơh jât nguay, geh du nau Brah Yêhôva lah ma gâp:

² “Hơi kon bunuyh, lah hom ma Pharaôn, hađăch Êjipt, ndrel ma âk phung ƀon lan hađăch pô aơ: ‘Nau dăng ktang ma may mbu moh đah tâm rđĭl?

³ Uănh hom bri Asiri: Nar saơm păng tâm ban ma du tơm si sêdar tâm bri Liban, N'gĭng ueh reh, n'hâm nâm bu si krŏng, Tơm toyh prêh Jêh ri chiông prêh kŏ ban tŭk.

⁴ Lĕ n'hor dak siăm păng, Lĕ tu dak mŭr ƀư ăn păng văch ma prêh, Ƀư ăn ma lĕ n'hong dak krong Hoch jŭm ntŭk bu tăm păng, Jêh ri ăn lĕ n'hor dak Djrah lĕ rngôch tơm si tâm bri.

⁵ Yor ri, tơm si sêdar nây Prêh lơn ma lĕ rngôch tơm si tâm mir, N'gĭng n'ha pŭm ngăn, N'gĭng păng vơr jong ngăn Yor geh âk dak.

⁶ Lĕ rngôch phung sĭm tâm trôk Ƀư rsuăn ta n'gĭng păng; Lĕ rngôch ntil mpô mpa bri Deh kon tâm dâng n'gĭng păng, Jêh ri lĕ rngôch bri dak toyh Gŭ tâm dâng n'hâm păng da dê.

⁷ Păng ueh reh yor tơm păng toyh, N'gĭng vơr jong ngăn, Yorlah reh păng sŏr tâng Ntŭk geh âk dak.

⁸ Mâu geh ôh tơm si sêdar êng tâm n'gar Brah Ndu Dơi tâm rđĭl đah păng. Tơm n'ho mâu ban ôh n'gĭng păng, Tơm ntang ăt mâu ban lĕ đah n'gĭng păng. Mâu geh ôh tơm si tâm n'gar trao Brah Ndu Ueh reh tâm ban ma păng đŏng ôh.

⁹ Gâp hŏ ƀư jêh ăn păng ueh reh, Ndrel n'gĭng n'ha pŭm ngăn; Lĕ rngôch tơm si Êđen Jêng tơm si tâm n'gar trao Brah Ndu Tâm keh nach đah păng da dê.’

¹⁰ Yor nây, Kôranh Brah Yêhôva lah: ‘Yorlah păng toyh prêh, chiông păng prêh kŏ ban tŭk jêh ri nuih n'hâm păng sưr rlau yor nau păng toyh prêh nây,

¹¹ yor nây Gâp mra jao păng tâm ti du huê bunuyh ktang lĕ bri dak gay ƀư ma păng. Gâp lĕ mprơh jêh păng yor ma nau tih păng.

¹² Du phung djơh janh lơn tâm lĕ rngôch phung bu năch mra kăl păng jêh ri chalơi. Đơ n'gĭng păng tŭp lĕ klơ yôk jêh ri tâm lĕ rngôch rlŭng; lĕ n'gĭng păng lĕ pă ntŭk kơh dak tâm n'gor jêh ri lĕ rngôch ƀon lan ta neh ntu der ngai tă bơh n'hâm păng jêh ri chalơi păng.

¹³ Lĕ rngôch sĭm och tâm trôk mra drâm ta klơ nau rlâm rai nchah păng jêh ri lĕ rngôch mpô mpa bri mra văch nde ta nklang lĕ n'gĭng păng,

¹⁴ gay mâu geh du mlâm tơm si êng tăm dăch dak janh sưr rlau ma nau toyh prêh păng mâu lah prêh chiông kŏ ban tŭk. Gay mâu geh ôh tơm si êng lĕ n'hor dak djrah toyh prêh nâm bu pônây; lĕ rngôch khân păng bu jao ma nau khĭt, prăp ma brŏng jru tâm dâng neh ntu tâm nklang ntil mpôl bunuyh jêh ri ndrel ma phung jŭr tâm ntu jru!’

¹⁵ Kôranh Brah Yêhôva lah: ‘Tâm nar păng jŭr tâm ƀon phung khĭt, Gâp mra ăn bu nhĭm vơl ma păng; Gâp brôi lơi ntu jru, bât lơi dak krong, king âk n'hong dak toyh. Gâp ƀư ăn bri Liban nhĭm vơl yor păng jêh ri lĕ rngôch tơm si tâm bri lĕ kro yor păng.

¹⁶ Gâp ƀư ma phung ntil mpôl bunuyh râm nsâr tăng nteh păng rlâm rai, tơlah Gâp klŭp mƀăr păng ma ƀon phung khĭt ndrel ma phung jŭr tâm ntu jru! Rnôk nây, lĕ rngôch tơm si n'gar Êđen, lĕ rngôch tơm si ueh ngăn, Liban săch jêh, lĕ rngôch tơm si saơm dơi geh âk dak djrah, dơi geh nau bonh leng da dê ta ntu jru tâm dâng neh.

¹⁷ Khân păng tâm ban lĕ jŭr tâm ntŭk ƀon phung khĭt ndrel păng, gŭ dăch phung bu nkhĭt ma đao, nây jêng phung ntơm saơm ndrel ma păng jêh ri gŭ nde tâm dâng n'hâm păng ta nklang lĕ rngôch bri dak.’

¹⁸ Moh tơm si tâm n'gar Êđen tâm ban ma may yơk ma nau chrêk rmah? May tâm ban lĕ bu mra nklơ̆ tŭp ndrel ma lĕ tơm si Êđen rlet ma ntu jru tâm dâng neh nâm bu pônây; may mra lâng bê̆ch nklang phung mâu ŭch koh ntâu, ndrel ma phung bu hŏ nkhĭt jêh ma đao. Pharaôn jêh ri lĕ rngôch phung bunuyh âk ƀon lan păng mra ndrel mrô nal. Kôranh Brah Yêhôva lah pônây.”