Êsêkiêl 30 - Nau Brah Ndu Ngơi 2023

Nau mprơ rngot tâm rdâng đah n'gor Êjipt

¹ Geh nau Brah Yêhôva lah ma gâp:

² “Hơi kon bunuyh, mbơh lor hom pô aơ nau Kôranh Brah Yêhôva lah: ‘Nhĭm vơl hom! Ngăn yơh jêng nar rêh ni ngăn!

³ Yor nar nây dăch jêh, Nar Brah Yêhôva hŏ dăch jêh, Jêng nar tŭk mbâl, Rơh nau mhĭk tât ăn ma lĕ rngôch mpôl bunuyh.

⁴ Đao mra lơh ta n'gor Êjipt, Jêh ri nau rngot klâng mra tât mra bri Êthiôpi Tơlah phung bu nkhĭt mra chôt khĭt tâm n'gor bri Êjipt; Khân păng mra nhŭp leo phung ƀon lan hăn, Jêh ri bu ƀư rlâm mbon khân păng.

⁵ Êthiôpi, Put, Lut, lĕ rngôch mpôl băl bunuyh tâm rlŭk, Kup jêh ri lĕ rngôch phung ƀon lan tâm bri dak tâm rnglăp, mra chôt khĭt yor đao ndrel ma Êjipt.’”

⁶ Brah Yêhôva lah: “Phung kơl bri Êjipt mra chôt; Nau ktang păng rnơm bu mra ntrŭnh. Khân păng mra chôt khĭt yor ma đao, Ntơm bơh Mikdôl tât ma Syene. Kôranh Brah Yêhôva lah pônây.

⁷ Khân păng mra jêng rngol ta nklang lĕ rngôch bri dak jêng rngol, Jêh ri lĕ ƀon păng mra gŭ ta nklang lĕ ƀon lĕ rai jêh.

⁸ Nôk nây, khân păng mra gĭt Gâp jêng Brah Yêhôva, Tơlah Gâp su bri Êjipt ma ŭnh Jêh ri lĕ rngôch phung kơl păng rai jêh.

⁹ Tâm nar nây, lĕ rngôch phung mbơh Gâp mprơh hăn ma kumpăn mra ƀư ăn ma phung Êthiôpi dôl geh nau đăp mpăn mra klach ngăn. Phung ƀon lan mra rngot tâm nar geh nau mhĭk tât Êjipt, yorlah aơ, nar nây tât ngăn!

¹⁰ Kôranh Brah Yêhôva lah: ‘Gâp mra dŏng ti Nêbukatnetsar, hađăch Babilôn, Gay ƀư rai lơi phung bunuyh âk n'gor Êjipt.

¹¹ Hađăch nây ndrel ma phung ƀon lan păng jêng phung djơh mhĭk tâm lĕ phung mpôl băl bunuyh, Mra dơi leo lăp gay ƀư rai bri dak. Khân păng mra tŏk đao tâm lơh đah Êjipt Jêh ri ƀư ma bri dak aơ bêng ma săk jăn khĭt.

¹² Gâp mra ƀư suăt lơi dak krong Nil, Jêh ri tăch lơi bri dak nây tâm ti phung djơh. Gâp mra ăn ti phung bu năch Ƀư rai bri dak nây jêh ri nđâp ma lĕ rngôch ntil ndơ tâm nây. Gâp jêng Brah Yêhôva hŏ lah jêh.’

¹³ Brah Yêhôva lah: ‘Gâp mra ƀư rai lơi lĕ rup brah. Jêh ri nchah lơi lĕ brah bơh ƀon Nôp. Tâm n'gor bri Êjipt mâu mra hôm geh hađăch đŏng ôh, Jêh ri Gâp mra srih nau klach tâm n'gor bri Êjipt.

¹⁴ Gâp mra ƀư ma ƀon Pathrôs jêng rngol; Su ƀon Sôan ma ŭnh, Jêh ri ƀư nau phat tât ma ƀon Thêbes.

¹⁵ Gâp mra nkhŭt nau Gâp ji nuih ma ƀon Sin, Jêng pôih nâp ngăn tâm n'gor bri Êjipt, Jêh ri mra ƀư rai phung ƀon lan ƀon Thêbes.

¹⁶ Gâp mra su n'gor bri Êjipt ma ŭnh, Ƀon Sin mra geh nau rngot toyh ngăn; Ƀon Thêbes bu mra ƀư rai, Jêh ri ƀon Nôp phung rlăng mra ƀư rai ta nôk nar.

¹⁷ Phung bu klâu ndăm ƀon Ôn jêh ri ƀon Pi-Bêset mra cha lôt khĭt yor ma đao, Jêh ri phung bu ur druh ƀon nây mra hăn jêng ƀư bu nă.

¹⁸ Ta ƀon Tahpanhes nôk nar mra ngo klĕng, Tơlah Gâp nkê̆ch pă lĕ mâng mbăk phung Êjipt ta nây, Jêh ri nau dăng ktang bêng ma nau sưr rlau păng mra lôch dŭt. Păng mra geh du ndâr tŭk nkŭm ndâp, Phung kon bu ur păng mra hăn jêng bu nă.

¹⁹ Gâp mra ƀư rai nau phat dôih ma bri Êjipt, Jêh ri khân păng mra gĭt Gâp jêng Brah Yêhôva.’”

²⁰ Tâm năng pơh, khay nguay, năm rơh jât ma nguay, geh nau Brah Yêhôva lah ma gâp:

²¹ “Hơi kon bunuyh, Gâp hŏ nkê̆ch pă nting tur Pharaôn, hađăch Êjipt. Aơ, mâu geh ôh nơm put dak si gay dơi ƀư bah; mâu geh nơm put n'grêp ntŭk sôt rmanh gay păng plơ̆ sĭt dăng ktang kuăn tay đao.

²² Yor ri, Kôranh Brah Yêhôva lah: ‘Aơ, Gâp tâm rdâng đah Pharaôn, hađăch Êjipt, jêh ri mra nkê̆ch lơi bar nting tur păng, nđâp ma nting tur hôm dăng ndrel ma nting tur lĕ pă jêh ri ăn đao tŭp tă bơh ti păng.

²³ Gâp mra ƀư ăn phung Êjipt nchah rai pru pra tâm lĕ phung ƀon lan jêh ri mprơh khân păng gŭ lam lĕ bri dak.

²⁴ Gâp mra ăn nting tur hađăch Babilôn ntop nau dăng ktang, dơm đao Gâp tâm ti păng, ƀiălah Gâp nkê̆ch lơi nting tur Pharaôn. Pharaôn mra rđêng tanăp măt hađăch Babilôn tâm ban ma du huê nơm rmanh bơi ma khĭt.

²⁵ Gâp mra ƀư ăn ma bar nting tur hađăch Babilôn dăng ktang, ƀiălah bar nting tur hađăch Pharaôn mra hươi. Khân păng mra gĭt Gâp jêng Brah Yêhôva tơlah Gâp ăn đao Gâp tâm ti hađăch Babilôn, jêh ri hađăch nây mra yơr đao nây tâm lơh đah n'gor bri Êjipt.

²⁶ Gâp mra ƀư nchah rai pru pra phung Êjipt tâm phung ƀon lan, mprơh khân păng hăn du tâm lĕ bri dak jêh ri khân păng mra gĭt Gâp jêng Brah Yêhôva.’”