Êsêkiêl 3 - Nau Brah Ndu Ngơi 2023

Kôranh Brah ntĭm ma Y-Êsêkiêl

¹ Kôranh Brah lah ma gâp pô aơ: “Hơi kon bunuyh, sa hom ndơ may saơ; sa hom ndrom samƀŭt klôt aơ jêh ri hăn ngơi ma ngih Israel.”

² Gâp hă trôm mbung jêh ri Păng ăn gâp sa klôt ndrom samƀŭt nây.

³ Păng lah: “Hơi kon bunuyh, sŏk hom ndrom samƀŭt klôt Gâp ăn may sa ăn hơm, ƀư ăn bêng ndŭl.” Pônây gâp sa jêh ri tâm trôm mbung saơ nau njŭng nâm bu dak sŭt.

⁴ Păng lah tay: “Hơi kon bunuyh, hăn hom ma ngih Israel jêh ri mbơh nau Gâp ngơi ăn ma khân păng.

⁵ Gâp mâu prơh may hăn ôh ma phung bu năch ngơi nau jêr gĭt rbăng tât ma ngih Israel.

⁶ Mâu lĕ prơh may hăn ma âk phung ndŭl mpôl ngơi jêr gĭt rbăng, bâr jêr iăt, ƀư ăn may mâu dơi gĭt rbăng ôh. Lah Gâp prơh may hăn tât ma khân păng, n'hêl nanê̆ khân păng mra iăt may.

⁷ Ƀiălah ngih Israel mâu mra iăt nau may ôh yorlah khân păng mâu ŭch iăt Gâp. Yorlah lĕ rngôch ngih Israel dăng bôk dăng nuih n'hâm da dê.

⁸ Aơ Gâp mra ƀư ăn men dăng muh măt may gay tâm rdâng đah muh măt khân păng, jêh ri ndăr kleng may men dăng tâm rdâng đah ndăr kleng khân păng.

⁹ Gâp ƀư ndăr kleng may dăng nâm bu lŭ diamôn, dăng lơn ma lŭ ŭnh. Lơi ta klach đah khân păng ôh, ăt mâu lĕ râm nsâr yor muh măt khân păng yorlah khân păng jêng ngih mơng vay tâm rdâng.”

¹⁰ Păng lah đŏng ma gâp pô aơ: “Hơi kon bunuyh, dơn hom tâm nuih n'hâm jêh ri iăt ma trôm tôr lĕ rngôch nau Gâp mra ngơi ma may.

¹¹ Hăn hom tât ma phung bu mprơh jêng bu nă, tât ma phung ƀon lan may nơm jêh ri lah ma khân păng pô aơ ‘Nau Yêhôva Brah Ndu lah pô aơ,’ nđâp lah khân păng iăt mâu lah mâu.”

¹² Rnôk nây Huêng Brah chông gâp leo klơ jêh ri gâp tăng nau nteh mpât ktang ngăn pakơi gâp pô aơ: “Khư tâm rnê ma nau chrêk rmah Brah Yêhôva tă bơh tâm ntŭk Păng dôl gŭ!”

¹³ Gâp tăng đŏng nau nteh bơh rpuh nting năr mpa rêh rpuh ndrăng khân păng, nteh jâng ndeh kêng pŭng lĕ mpa rêh nây jêh ri nteh n'găr neh ntu ktang ngăn.

¹⁴ Huêng Brah chông gâp leo rlet klơ jêh ri leo gâp hăn; gâp hăn nuih n'hâm bêng ma rngot ngăn ngên, ji nuih ngăn. Ti Brah Yêhôva dơm ta klơ gâp ma nau ktang ngăn.

¹⁵ Gâp hăn tât ma phung bu mprơh jêng bu nă gŭ ta ƀon Têlavip, gŭ ta kơh dak krong Kêbar. Gâp nsrŭng ta ntŭk khân păng dôl gŭ jêh ri gŭ ta nây ndrel ma khân păng tâm pơh nar, nuih n'hâm bêng ma nau rngot.

¹⁶ Lôch pơh nar nây, geh nau Brah Yêhôva lah ma gâp kơt aơ:

¹⁷ “Hơi kon bunuyh, Gâp hŏ njêng may ƀư bunuyh kâp gak ăn ma ngih Israel. Pônây iăt hom nau ngơi tă bơh bâr mbung Gâp jêh ri tâm tang Gâp mbơh ăn ma khân păng.

¹⁸ Lah Gâp lah ma bunuyh mhĭk: ‘Nanê̆ ngăn may mra khĭt!’ Tơlah may mâu mbơh ôh ma păng, mâu ngơi đah păng, jêh ri mâu buay ôh păng chalơi trong djơh mhĭk gay ma tâm rklaih nau rêh may, pôri nơm djơh mhĭk nây mra khĭt tâm nau tih păng, ƀiălah Gâp mra ăn krêp mham păng ta ti may.

¹⁹ Ƀiălah, tơlah may lah lor ma nơm mhĭk ƀiălah păng mâu chalơi nau ƀư mhĭk ndrel trong nau djơh mhĭk păng, păng mra khĭt tâm nau tih păng, ƀiălah may mra dơi tâm rklaih huêng may nơm.

²⁰ Tâm ban lĕ, tơlah du huê bunuyh sŏng srăng chalơi nau sŏng srăng ƀư nkhơng nau tih jêh ri Gâp mra dơm nau king panăp măt păng, păng mra khĭt. Yorlah may mâu mbơh ôh ma păng yor nây păng mra khĭt yor nau tih păng, jêh ri lĕ kan sŏng srăng păng hŏ ƀư jêh gâp mâu hôm dơi kah gĭt ôh, ƀiălah Gâp mra kêh mham păng ta ti may.

²¹ Ƀiălah, tơlah may mbơh ăn nơm sŏng srăng lơi ta ƀư tih ôh, jêh ri bunuyh nây mâu ƀư tih ôh n'hêl nanê̆ bunuyh nây mra rêh yorlah iăt jêh nau mbơh lor, jêh ri may mra tâm rklaih jêh huêng may nơm.”

²² Ta nây, ti Brah Yêhôva dơm ta gâp jêh ri Păng lah ma gâp pô aơ: “Gơnh ndal hom hăn ma ntŭk neh lâng, ta nây Gâp mra lah ma may.”

²³ Pôri gâp hăn ro ma ntŭk neh lâng. Jêh ri ta nây, gâp saơ nau chrêk rmah Brah Yêhôva gŭ ta nây nâm bu nau chrêk rmah gâp hŏ saơ jêh ta kơh krong Kêbar. Gâp păn muh măt ta neh.

²⁴ Ƀiălah Huêng Brah lăp tâm gâp ƀư dâk jâng gâp. Jêh nây Păng lah ma gâp pô aơ: “Hăn hom, krŭng êng may nơm tâm ngih may.

²⁵ Hơi kon bunuyh, aơ bu mra chăp may ma rse ndrăn jêh ri may mâu dơi luh du hăn tâm mâp đah khân păng ôh.

²⁶ Gâp mra ăn mpiăt may krêp ta rmlông trôm mbung; may mra mlo, mâu dơi nduyh khân păng ôh yorlah khân păng jêng du phung vay mơng tâm rdâng.

²⁷ Ƀiălah tơlah Gâp lah ma may, Gâp mra pơk trôm mbung may jêh ri may mra lah ma khân păng pô aơ: ‘Yêhôva Brah Ndu lah kơt aơ: Mbu nơm ŭch iăt, iăt hom; mbu nơm mâu ŭch iăt, lơi ta iăt ôh! Yorlah khân păng jêng du rplay ƀon vay mơng tâm rdâng.’”