Êsêkiêl 29 - Nau Brah Ndu Ngơi 2023

Nau mbơh lor tâm rdâng đah Pharaôn jêh ri bri Êjipt

¹ Tâm năng jât ma bar, khay jât, năm rơh jât, geh nau Brah Yêhôva lah ma gâp:

² “Hơi kon bunuyh, rle hom muh măt may tâm rdâng đah Pharaôn, hađăch Êjipt, jêh ri mbơh lor nau tâm rdâng đah hađăch nây jêh ri lĕ rngôch n'gor bri Êjipt đŏng.

³ Ngơi hom: Kôranh Brah Yêhôva lah: ‘Hơi Pharaôn, hađăch Êjipt, Aơ, Gâp tâm rdâng đah may, May jêng mpa djơh toyh juat Rvel ta nklang lĕ dak krong. May lah pô aơ: “Dak krong Nil jêng ndơ Gâp nơm Gâp nơm yơh hŏ njêng jêh păng.”

⁴ Gâp mra dơm lĕ nglĕ nklĕ ta bar kang may, Jêh ri ƀư ma ka tâm lĕ dak krong may mra krêp ta rsiap may. Gâp mra đŏt may luh du tă bơh lĕ dak krong may, Ndrel ma lĕ rngôch ka tâm lĕ dak krong Hŏ krêp jêh ta rsiap may đŏng.

⁵ Gâp mra klŭp may mŭt tâm bri rdah, May jêh ri lĕ rngôch ka tâm lĕ dak krong may. May mra cha lôt ta klơ ndrêch gơ̆ hŏng, Bu mâu mra dônh mâu lah rgum tay. Gâp mra jao may ƀư mpa sông sa Ăn ma mpô mpa tâm dâng neh jêh ri phung sĭm ta klơ trôk.

⁶ Rnôk nây, lĕ rngôch phung gŭ tâm n'gor Êjipt mra gĭt Gâp jêng Brah Yêhôva, yorlah may hŏ jêng mâng jra đah rpho ăn ma ngih Israel.

⁷ Tơlah khân păng yơr ti kuăn may, may lĕ pă jêh ri ƀư hêk lĕ rngôch bar đah săng nglik khân păng. Tơlah khân păng nsing mbin ta may pôri may pă deh jêh ri ƀư rlâm gang bŭt khân păng.’

⁸ Yor nây, Kôranh Brah Yêhôva lah: ‘Aơ, Gâp mra leo đao tât tâm rdâng đah may jêh ri mra nkhĭt lĕ rngôch bunuyh nđâp ma mpô mpa.

⁹ N'gor bri Êjipt mra jêng rngol, nsoih dơm jêh ri khân păng mra gĭt Gâp jêng Brah Yêhôva.’ Yorlah Pharaôn geh lah jêh pô aơ: ‘Dak krong Nil jêng ndơ gâp, gâp hŏ njêng jêh păng.’

¹⁰ ‘Yor nây, aơ, Gâp tâm rdâng đah may jêh ri đah lĕ dak krong may. Gâp mra ăn n'gor bri Êjipt jêng nâm bu bri rdah jêng rngol, ntŭk nsoih ntơm bơh Mikdôl tât ma Syene jêh ri kŏ tât ta n'har neh n'gor bri Êthiôpi.

¹¹ Mâu mra geh mpang jâng bunuyh hăn rgăn ta nây, mâu lĕ geh mpô mpa hăn rgăn đŏng ôh. Păng mâu mra geh bunuyh gŭ ta nây tâm puăn jât năm.

¹² Gâp mra ăn n'gor bri Êjipt jêng rngol ta nklang bri jêng rngol jêh ri lĕ rngôch ƀon păng mra rngot njăp gŭ ta nklang lĕ ƀon rngot njăp tâm puăn jât năm. Gâp mra ƀư ma phung Êjipt pru pra tâm lĕ phung ƀon lan jêh ri mprơh lơi khân păng du gŭ tâm lĕ bri dak.’

¹³ Yorlah Kôranh Brah Yêhôva lah: ‘Lôch jêh puăn jât năm, Gâp mra rgum tay phung Êjipt tă bơh ta nklang phung ƀon lan tâm khân păng hŏ lĕ tă nchah rai.

¹⁴ Gâp mra ƀư ma phung bu mprơh jêng bu nă ma n'gor bri Êjipt plơ̆ sĭt jêh ri njŭn khân păng plơ̆ sĭt tâm bri Pathrôs jêng n'gor phung che khân păng nơm, ƀiălah khân păng knŏng ndâk njêng du bri knŏng huơi dơm.

¹⁵ Bri dak Êjipt mra jêng du rplay bri huơi lơn tâm lĕ rngôch bri dak, jêh ri mâu mra dơi n'hao păng nơm ta klơ phung bri dak êng đŏng ôh. Gâp mra ăn khân păng huơi gay ma khân păng mâu hôm dơi chiă uănh lĕ bri dak đŏng ôh.

¹⁶ Bri dak nây mâu hôm ƀư jêng ntŭk rnơm ăn ma ngih Israel đŏng ôh, ƀiălah Israel mra kah gĭt tay nau tih khân păng dôl khân păng plơ̆ dăn kơl ma bri dak nây. Nôk nây khân păng mra gĭt Gâp jêng Kôranh Brah Yêhôva.’”

¹⁷ Ta năng nguay, khay nguay, năm rơh bar jât ma pơh, geh nau Brah Yêhôva lah ma gâp:

¹⁸ “Hơi kon bunuyh, Nêbukatnetsar, hađăch Babilôn, hŏ ăn phung tahan păng pah kan hŏt rgănh gay tâm rdâng đah ƀon Tyre; ăp bôk bu poih plưn da dê, ăp săng nglik lĕ rplưch da dê. Ƀiălah, hađăch nây jêh ri phung tahan mâu lĕ geh drăp ndơ tă bơh Tyre gay nkhôm nau hŏt rơah hŏ lơh jêh ƀon nây.

¹⁹ Yor nây, Kôranh Brah Yêhôva lah pô aơ: ‘Gâp mra jao n'gor bri Êjipt ăn ma Nêbukatnetsar, hađăch Babilôn; hađăch nây mra veng leo phung ƀon lan, pit in jêh ri djôt lĕ drăp ndơ nâm bu prăk nkhôm ăn ma phung tahan hađăch.

²⁰ Gâp hŏ jao jêh n'gor Êjipt ăn ma hađăch nây gay nkhôm nau hŏt rơah khân păng yorlah khân păng hŏ pah kan jêh ma Gâp.’ Kôranh Brah Yêhôva lah pônây.

²¹ Tâm nar nây, Gâp mra ăn ngih Israel hon du nke, jêh ri Gâp mra ăn may hă mbung ta nklang khân păng jêh ri khân păng mra gĭt Gâp jêng Brah Yêhôva.”