Êsêkiêl 28 - Nau Brah Ndu Ngơi 2023

Nau mbơh lor jêh ri nau mprơ rngot ma hađăch Tyre

¹ Geh nau Brah Yêhôva lah ma gâp:

² “Hơi kon bunuyh, lah hom ma hađăch Tyre pô aơ: Kôranh Brah Yêhôva lah: ‘Yorlah nuih n'hâm may sưr ngăn, May lah pô aơ: “Gâp jêng du huê brah, Gâp gŭ ta sưng hađăch lĕ brah, Ta nklang dak mƀŭt.” Ƀiălah may knŏng jêng bunuyh mâu di jêng brah ôh, Nđâp tơlah n'hao êng nuih n'hâm may nơm Tâm ban ma nuih n'hâm brah kloh ueh.

³ May blau mĭn rlau lơn ma Y-Daniel lĕ? Mâu geh ôh hĕ nau khlay ndâp dơi pôn ndâp đah may?

⁴ May hŏ dơi ndrŏng jêh Yor nau gĭt blau jêh ri nau gĭt rbăng may nơm; May hŏ prăp bun jêh prăk mah Tâm ngih prăp drăp may.

⁵ Yor nau gĭt mĭn tâm nau tăch drăp, May hŏ n'hao jêh nau ndrŏng may, Jêh ri nuih n'hâm may sưr yor nau ndrŏng may.’

⁶ Yor nây, Kôranh Brah Yêhôva lah: ‘Yorlah may n'hao êng nuih n'hâm may Nâm bu nau mĭn brah kloh ueh.

⁷ Yor nây, Gâp mra ƀư ăn ma phung bu năch djơh lơn tâm lĕ bri dak Dâk tâm rdâng đah may; Khân păng mra tăk đao tâm rdâng đah nau gĭt rbăng nau ueh may, Ƀư ƀơ̆ nau chrêk rmah may.

⁸ Khân păng mra nklơ̆ may tŭp tâm ntu, May mra khĭt tâm trôm dak mƀŭt Nâm bu ma bunuyh bu nkhĭt.

⁹ Tanăp phung nkhĭt may, May dơi janh lah pô aơ lĕ “gâp jêng brah”? Dôl may gŭ tâm ti phung ƀư rmanh may Pôri may jêng bunuyh đŏng mâu di hĕ jêng brah.

¹⁰ May mra khĭt yor ma ti phung bu năch Nâm bu phung mâu hŏ ŭch bu koh ntâu. Kôranh Brah Yêhôva lah, Gâp nơm yơh hŏ lah nâm bu pônây.’”

¹¹ Geh nau Brah Yêhôva lah ma gâp:

¹² “Hơi kon bunuyh, ƀư hom du nau mprơ rngot ma hađăch Tyre jêh ri ngơi ma hađăch nây pô aơ: Kôranh Brah Yêhôva lah: ‘May jêng du ntil nau rup, Ma nau blau mĭn jêh ri nau ueh rah vah ngăn.

¹³ May lĕ gŭ tâm n'gar Êđen, jêng n'gar Brah Ndu. May hŏ geh ăp ntil lŭ khlay, Jêng lŭ karnêlian, lŭ tôpas, lŭ diamôn, Lŭ krisôlit, lŭ êmêrôt, lŭ saphir, Lŭ beril, lŭ ĭr, lŭ chăng jêh ri mah đŏng. Nơm rhăk gâr jê̆ jêh ri dĭng n'hôm jêng ndơ may, Ntơm bơh nar may mhe ndâk njêng bu hŏ ndrăp ơm jêh.

¹⁴ May jêng du huê Chêrub dơi tŏ dak ƀâu kah dôl nkŭm nking; Gâp hŏ ndâk may ta klơ yôk kloh ueh Brah Ndu; May hŏ hăn nsong ta nklang rplay lŭ ang nâm bu ŭnh.

¹⁵ Trong may nŭm rĭng, Ntơm bơh nar bu rhăk njêng may, Kŏ tât saơ nau djơh mhĭk tâm may.

¹⁶ Tơlah tăch rgâl drăp ndơ geh âk rmeh rmai, May bêng ma nau ƀai, jêh ri ƀư tih; Yor nây, Gâp mra nklơ̆ may jêng nâm bu ndơ ƀơ̆ ƀơch jŭr tă bơh yôk Brah Ndu; Hơi Chêrub nkŭm nking ri, Gâp ƀư rai may ta nklang lĕ glo lŭ ang nâm bu ŭnh!

¹⁷ Nuih n'hâm may sưr rlau yor nau ueh may, Jêh ri yor nau chrêk rmah may ƀư ăn djơh nau blau mĭn may nơm. Gâp nklơ̆ may tâm neh, Dơm may panăp măt phung hađăch, Ƀư nau pâl ăn khân păng uănh.

¹⁸ May hŏ ƀư ƀơ̆ ƀơch ntŭk kloh ueh may, Yor nau mhĭk may âk ngăn, Jêh ri yor nau may tăch rgâl drăp ndơ mâu geh sŏng ôh. Yor ri, Gâp hŏ ƀư ăn ŭnh du luh bơh ta nklang may Su rvăn may, Jêh ri Gâp hŏ ƀư ăn may jêng ŭnh buh ta neh Panăp măt lĕ rngôch phung uănh saơ.

¹⁹ Lĕ rngôch phung gĭt năl may tâm phung ƀon lan Mra geh nau krit ngăn ma may. May jêng du ntil nau krit toyh, Jêh ri may mra n'ho ro mâu hôm đŏng ôh.’”

Nau mbơh lor ma nau rlâm ƀon Sidôn

²⁰ Geh nau Brah Yêhôva lah ma gâp:

²¹ “Hơi kon bunuyh, rle hom muh măt may mpeh ma ƀon Sidôn jêh ri mbơh lor nau tâm rdâng đah păng.

²² May ngơi hom: Kôranh Brah Yêhôva lah: ‘Hơi ƀon Sidôn, aơ Gâp tâm rdâng đah may; Gâp ŭch ƀư ang amoh Gâp ta nklang may. Khân păng mra gĭt Gâp jêng Brah Yêhôva Tơlah Gâp mra ƀư nau phat dôih, Jêh ri mpơl nau kloh ueh Gâp ta nklang păng.

²³ Gâp mra njuăl nau ji tưp tât tâm ƀon, Jêh ri nau pling mham tâm lĕ trong sâng păng. Đơ phung rmanh mra cha lôt ta nklang păng, Yor ma đao tă bơh puăn mpeh mra rduh leo păng. Nôk nây, khân păng mra gĭt yơh Gâp jêng Brah Yêhôva.

²⁴ Ngih Israel mâu hôm geh tôt lok nau djơh mâu lah lok mplanh ƀư ji đŏng ôh, nây jêng lĕ bri dak chiau meng ơm ƀư đah păng ma nau mưch rmot. Rnôk nây, khân păng mra gĭt Gâp jêng Kôranh Brah Yêhôva.’”

²⁵ Kôranh Brah Yêhôva lah: “Tơlah Gâp rgum ngih Israel tă bơh nklang phung ƀon lan khân păng hŏ ƀư nchah rai pru pra jêh, Gâp mra mpơl nau kloh ueh Gâp ta nklang khân păng panăp măt lĕ phung ƀon lan. Nôk nây, khân păng mra gŭ tâm bri Gâp hŏ ăn jêh ma oh mon Gâp jêng Y-Yakôb.

²⁶ Khân păng mra gŭ đăp mpăn ta ntŭk nây, mra ndâk ngih jêh ri tăm play krăk ƀâu. Khân păng gŭ ta nây đăp mpăn tơlah Gâp hŏ ƀư jêh nau phat dôih Gâp tâm rdâng đah bri dak chiau meng khân păng, jêng phung hŏ ƀư jêh đah khân păng ma nau tâm rmot. Nôk nây, khân păng mra gĭt Gâp yơh jêng Yêhôva Brah Ndu khân păng.”