Êsêkiêl 27 - Nau Brah Ndu Ngơi 2023

Nau mprơ rngot ma ƀon Tyre

¹ Geh nau Brah Yêhôva lah ma gâp:

² “Hơi kon bunuyh, ƀư hom du nau mprơ rngot ma ƀon Tyre.

³ Lah hom ma ƀon Tyre: ‘May jêng ƀon gŭ ta mbŏng dak mƀŭt, tăch rgâl đah phung ƀon lan ta âk ntŭk gôl dak mƀŭt,’ Kôranh Brah Yêhôva lah: Hơi ƀon Tyre, may lah jêh: ‘Gâp jêng nau ueh rah vah ngăn.’

⁴ N'har bri may gŭ ta nklang dak mƀŭt; Phung rdâk njêng may hŏ ƀư ăn may lĕ jêng ueh rah vah ngăn.

⁵ Khân păng sŏk ma tơm si chiprơ tă bơh n'gor Sênir Ƀư kađar pâng kumpăn; Sŏk tơm si sêdar tă bơh bri Liban Ƀư meh n'gâng bok drơ sail ma may.

⁶ Sŏk tơm si guyh tă bơh bri Basan Ƀư rnai vah ma may; Sŏk tơm si n'ho tă bơh gôl dak Kitim Ƀư kađar ntă, Jêh ri mblum ma la rveh.

⁷ Sŏk bok mhay rhên bu cheh chiăk bơh bri Êjipt ƀư bok drơ sial, Jêh ri ƀư n'ha kơ ăn may; Sŏk bok chăng krăk, ĭr tă bơh gôl dak mƀŭt Êlisa Ƀư bok nching nkŭm ăn may.

⁸ Phung gŭ tâm ƀon Sidôn jêh ri ƀon Arvat Jêng phung sâm vah plŭng ăn may; Hơi ƀon Tyre, lĕ phung blau mĭn Ƀư jêng phung ƀĭt gai ăn may.

⁹ Phung kôranh bu ranh gŭ ta ƀon Gêbal jêh ri phung bunuyh njêh n'gor nây Kơl may nkra lĕ ntŭk djơh kumpăn. Lĕ rngôch phung Kumpăn tâm dak mƀŭt ndrel ma bunuyh ƀĭt kumpăn gŭ ndrel may da dê Gay tăch rgâl drăp ndơ ăn may.

¹⁰ Phung Persi, phung Lut, phung Put Ƀư tahan tâm lơh tâm phung tahan may; Khân păng yông khêl jêh ri môk tâm lơh ta klơ may, Jêh ri ƀư ăn ma may jêng nau chrêk rmah.

¹¹ Phung bu klâu ƀon Arvat ndrel phung tahan may Gak njrăng văr jŭm mpêr ƀon may, Phung bu klâu ƀon Gamat gŭ ta klơ lĕ ngih tŭm may; Khân păng yông khêl văr jŭm mpêr ƀon may, Jêh ri ƀư ăn nau ueh may ntop rah vah ngăn.

¹² Phung gŭ tâm ƀon Tarsis tăch rgâl đah may geh âk drăp ndơ ăp ntil; khân păng rgâl prăk, loih, thao, ndrak, gay tâm rgâl drăp ndơ may tăch.

¹³ Lĕ phung gŭ ta ƀon Javan, gŭ ta ƀon Tubal jêh ri gŭ ta ƀon Mêsek tăch rgâl đah may; khân păng rgâl dĭk bu jêh ri ndơ dŏng ma kông gay tâm rgâl ndô ndơ may tăch.

¹⁴ Phung Bet-Tôgarma djôt seh, seh tâm lơh, seh bri, gay tâm rgâl đah ndô ndơ may tăch.

¹⁵ Phung bunuyh Dêdan jêng bunuyh tăch drăp ma may; geh âk gôl dak mƀŭt jêng ngih tăch drăp đah may, khân păng chê̆ pi ma may la rveh jêh ri tơm si khlay.

¹⁶ Yorlah may geh âk ngăn ndô ndơ yor ri phung Aram tăch drăp đah may; khân păng tăch lŭ khlay jaspidi, bok chăng, bok bu cheh chiăk, bok mhay rhên, lŭ tâm dâng dak mƀŭt, jêh ri lŭ rubi tâm rgâl drăp ndơ đah may.

¹⁷ N'gor Yuđa jêh ri n'gor Israel ăt tăch rgâl đah may tâm ban lĕ; khân păng djôt ba ƀlê tă bơh Minnit, ƀănh njŭng, dak sŭt, dak ngi ôlive jêh ri dak si ƀâu kah tâm rgâl đah ndrăp ndơ đah may.

¹⁸ Yorlah may geh âk ntil ndơ, drăp ndơ rmeh rmai yor ri yơh phung Damas sŏk ndrănh krăk ƀâu tă bơh Helbôn jêh ri rsau biăp nglang tâm rgâl đah may.

¹⁹ Phung Vêdan jêh ri Javan bơh Usan văch tâm rgâl drăp ndơ đah may; khăn păng djôt loih bu krĕt, tơm si kasia, jêh ri tơm si calamôs gay ma rgâl ndrăp ndơ.

²⁰ Phung Dêdan djôt bok kao nkŭm ta klơ seh gay tăch ma may.

²¹ Phung Arabi jêh ri lĕ rngôch phung kôranh gŭ tâm Kêdar nsong tăch drăp đah may jêh ri djôt tât tăch ma may phung biăp kon, biăp nkuăng jêh ri be nkuăng.

²² Phung tăch drăp tă bơh bri Sêba jêh ri bri Rama tăch ngâl đah may; khân păng sŏk lĕ ntil ndơ ƀâu kah ueh lơn, lĕ ntil lŭ khlay jêh ri mah tâm rgâl drăp ndơ đah may.

²³ Charan, Kannê, jêh ri Êđen, ndrel phung bunuyh tăch drăp gŭ ta Sêba, Asur jêh ri Kilmat jêng phung tăch rgâl đah may da dê.

²⁴ Tâm lĕ ngih tăch drăp, khân păng tăch rgâl đah may bok ao ueh ngăn, ao dak sut chăng jêh ri bok bu cheh chiăk, ao rvanh ăp ntil dak jêh ri rse brăt păch nâp ngăn.

²⁵ Lĕ kumpăn tă bơh n'gor bri Tarsis rdeng leo drăp ndơ rgăn đah aơ đah ri, Jêh ri may dơi bun bêng jâk ngăn Gŭ ta nklang dak mƀŭt.

²⁶ Ƀiălah phung vah kumpăn may hŏ leo may Rgăn ta klơ dak toyh, Jêh ri sial tă luh nar hŏ nchah lơi hăch rhên may Ta nklang dak mƀŭt.

²⁷ Tât nar ƀư rai yot may, Drăp ndơ, ndơ may tăch, nau may tâm tăch ngâl, Kôranh jêh ri bunuyh ƀĭt Kumpăn may, Phung sâm nkra kumpăn ma may, Phung tăch rgâl drăp ndơ đah may, Lĕ rngôch phung tahan may, Jêh ri lĕ rngôch phung ƀaƀă gŭ ta klơ kumpăn, Mra tŭp tâm nklang klŏng dak mƀŭt da dê.

²⁸ Yor tăng bâr phung ƀĭt gai may nter, Lĕ ndrêch gơ̆ chiau meng may râm nsâr da dê.

²⁹ Lĕ rngôch phung vah kumpăn, phung kôranh kumpăn, Lĕ rngôch phung ƀĭt gai kumpăn tâm dak mƀŭt, Jŭr bơh kumpăn khân păng nơm da dê Jêh ri gŭ dâk ta klơ neh.

³⁰ Khân păng mra nhĭm vơl ma may, Jêh ri nter huy rngot klâng yor ma may; Khân păng sui neh muy ta klơ bôk khân păng nơm, Jêh ri rlă tâm ŭnh buh.

³¹ Khân păng poih bôk plưn yor may, Jêh ri nsoh ao ƀau. Khân păng mra nhĭm vơl may, Jêh ri nuih n'hâm bêng ma rngot klâng.

³² Tơlah khân păng krit rngot nhĭm nhhiăng yor may, Khân păng ƀư du nau mprơ rngot ma may pô aơ: ‘Mbu moh jêng rngot rjăp nâm bu ƀon Tyre Ta nklang dak mƀŭt?

³³ Tơlah drăp ndơ may tăch luh tă bơh dak mƀŭt, May hŏ ƀư ma phung ƀon lan hơm mpay; Yor drăp ndơ jêh ri ndơ tăch ƀrư̆ nar geh âk rmeh, May hŏ ƀư ndrŏng ăn ma phung hađăch ta neh ntu.

³⁴ Rnôk nây, may lĕ rai yor ma dak mƀŭt, Ngâm tâm dâng dak jru; Ndơ tăch jêh ri phung ƀon lah may Ngâm tâm dak mƀŭt ndrel may da dê.

³⁵ Lĕ rngôch phung ƀon lan gŭ tâm lĕ gôl dak mƀŭt Hih rhâl da dê yor may; Lĕ hađăch khân păng klach ngăn, Muh măt rgâl yor nau rvê.

³⁶ Phung bunuyh tăch drăp gŭ ta nklang phung ƀon lan suai rak may. May jêng nau klach krit ngăn; Jêh ri bu ƀư rai n'ho ro!’”