Êsêkiêl 26 - Nau Brah Ndu Ngơi 2023

Nau mbơh lor ma ƀon Tyre

¹ Tâm năm rơh jât ma nguay, năng nguay tâm khay, geh nau Brah Yêhôva lah ma gâp pô aơ:

² “Hơi kon bunuyh, ƀon Tyre hŏ ngơi jêh ma ƀon Yêrusalem pô aơ: ‘Ha ha! Ƀon ƀư mpông mpêr ma phung ƀon lan lĕ rlâm rai jêh! Tât jêh ma gâp, gâp mra dơi geh nau chăt jêng, bi păng aƀaơ plăch jêng rngol jêh.’

³ Yor nây, Kôranh Brah Yêhôva lah: ‘Hơi ƀon Tyre! Aơ, Gâp mra tâm rdâng đah may. Gâp mra leo âk bri dak dâk tâm lơh đah may nâm bu dak mƀŭt geh âk rbuh ktang.

⁴ Khân păng mra ƀư rai lĕ rngôch mpêr ƀon Tyre jêh ri ƀư klưh rlâm lĕ ngih tŭm păng. Gâp mra koch lơi neh ăn păng jêng du lŭ chrêk.

⁵ Păng mra jêng du ntŭk gay bu ih nhuăl ta nklang dak mƀŭt, yorlah Gâp hŏ lah jêh.’ Kôranh Brah Yêhôva: ‘Păng mra jêng ndơ ma phung bri dak bu pit in.

⁶ Phung kon bu ur păng dôl gŭ tâm mir bu mra nkhĭt ma đao, jêh ri khân păng mra gĭt Gâp jêng Brah Yêhôva.’

⁷ Yorlah Kôranh Brah Yêhôva lah: ‘Aơ, Gâp mra njŭn leo Nêbukatnetsar, hađăch Babilôn, jêng hađăch ma phung hađăch, nđâp ma phung seh, ndeh seh, phung tahan ncho seh, ndrel ma phung tahan âk râk, ktang tă bơh bri lơ văch tât lơh ƀon Tyre.

⁸ Hađăch nây mra djôt đao nkhĭt kon bu ur may dôl gŭ tâm mir; mra ndâk pôih jêh ri yơr khêl tâm rdâng đah may.

⁹ Păng mra dŏng loih ƀư klưh rlâm lơi mpêr may jêh ri sŏk me nôp ƀư rlâm lĕ ngih tŭm may.

¹⁰ Seh păng âk râk ngăn kŏ tât ndruyh neh nkŭm may. Lĕ mpêr ƀon may n'gơ yor nteh n'găr phung tahan ncho seh, ndeh nđuih jêh ri ndeh seh tơlah păng lăp ta ƀon rgăn tâm lĕ mpông pêr nâm bu lăp du ƀon lĕ bu kuar bluh jêh.

¹¹ Ma nchop seh păng mra jot nchah lĕ rngôch trong sâng may; păng mra nkhĭt phung ƀon lan may jêh ri lĕ meh n'gâng nâp may bu mra klŭp ta neh.

¹² Phung rlăng may mra pit in drăp ndơ may, sŏk pit ndô ndơ may geh, ƀư klưh rlâm lơi mpêr may. Khân păng mra ƀư rai ngih may jêh ri mƀăr lŭ, tơm si, jêh ri neh may trŭnh tâm dak mƀŭt.

¹³ Gâp mra ăn rlu lơi bâr may mpât mprơ, jêh ri bu mâu mra tăng đŏng ôh bâr gong rêng may kreh.

¹⁴ Gâp mra njêng may jêng lŭ chrêk; may mra jêng du ntŭk bu ih nhuăl jêh ri mâu hôm rdâk njêng đŏng ôh, yorlah Gâp jêng Brah Yêhôva hŏ lah jêh.’ Kôranh Brah Yêhôva lah pônây.”

¹⁵ Kôranh Brah Yêhôva lah ma ƀon Tyre pô aơ: “Mâu di hĕ dôl tăng n'găr may tŭp, bunuyh rmanh rđêng nđor, dôl nau bu tâm nkhĭt ta nklang may, pôri lĕ gôl dak mƀŭt tăng n'găr mpât lĕ?

¹⁶ Lĕ rngôch phung kôranh tâm nkual dak mƀŭt mra trŭnh tă bơh sưng hađăch khân păng nơm da dê, doh lơi ao jâr jêh ri doh lơi ao cheh chiăk. Khân păng geh nau klach nchueng jŭm jêh ri gŭ rvel ta neh. Khân păng râm nsâr ƀaƀơ, jêh ri klach ngăn yor may.

¹⁷ Khân păng mra mprơ ma may nau mprơ rngot ma may pô aơ: ‘Mâm dĭng bu ƀư rai may, roh tă bơh dak mƀŭt? Hơi ƀon toyh geh nau lư n'găr, Jêh ri nâp ngăn gŭ ta nklang dak mƀŭt Jêng ntŭk may hăn gŭ tâm dak mƀŭt. May ndrel ma phung gŭ tâm may Ƀư ăn ma lĕ rngôch bunuyh klach krit ngăn.

¹⁸ Aƀaơ ri, lĕ gôl dak mƀŭt râm nsâr Tâm nar may lĕ rlâm rai nchah Jêh ri lĕ gôl dak mƀŭt mra klach krit ngăn Ma nau may rai lôch!’”

¹⁹ Ngăn yơh, Kôranh Brah Yêhôva lah: “Tơlah Gâp mra ƀư may jêng rngol nâm bu ƀon bu mâu geh bunuyh gŭ, tơlah Gâp mra ƀư rbuh dak tă bơh brŏng jru nkŭm ta klơ may, jêh ri phung n'hor dak toyh brôi lơi may;

²⁰ rnôk nây, Gâp mra ăn may ndrel ma phung hŏ jŭr hăn ma brŏng jru, tât ma phung ƀon lan rnôk kăl e. Gâp mra ăn may gŭ tâm neh ntu tâm dâng, tâm ntŭk rngol ntơm bơh rnôk kăl e ndrel ma phung hŏ jŭr hăn ma brŏng jru gay may mâu hôm geh nuyh gŭ tâm may đŏng ôh, ƀiălah Gâp mra n'gân nau chrêk rmah tâm neh bunuyh hôm gŭ rêh.

²¹ Gâp mra dŏng may ƀư du ntil nau krit ngăn. May mâu mra hôm đŏng ôh, jêh ri nđâp lah bu tĭng joi may ăt mâu mra saơ may,” Kôranh Brah Yêhôva lah pônây.