Êsêkiêl 25 - Nau Brah Ndu Ngơi 2023

Nau mbơh lor ma phung bu năch ( 25:1 – 32:32 ) Nau mbơh lor ma phung Ammôn

¹ Geh nau Brah Yêhôva lah ma gâp:

² “Hơi kon bunuyh, n'gĭl hom muh măt may rlet phung Ammôn jêh ri mbơh lor tâm rdâng đah khân păng.

³ May lah hom ma phung kon sau Ammôn: ‘Iăt hom nau Brah Yêhôva. Kôranh Brah Yêhôva lah pô aơ yorlah may lah: “Ha ha!” ma ntŭk kloh ueh Gâp tơlah păng ƀư ƀơ̆, ma bri neh Israel tơlah bu ƀư păng jêng rngol jêh ri ngih Yuđa tơlah bu nhŭp njŭn păng jêng bu nă;

⁴ yor nau nây, aơ, Gâp mra jao may ma phung tă bơh mpeh Luh Nar ƀư drăp ndơn. Khân păng mra ƀư pôih jêh ri ƀư ngih khân păng gŭ ta nklang may; khân păng mra sa kao play jêh ri nhêt dak toh ndrôk may.

⁵ Gâp mra ăn ƀon Raba ƀư jêng ndrêch gơ̆ ăn ma seh samô jêh ri neh ƀon phung Ammôn ƀư jêng ntŭk rlu ăn ma phung biăp. Rnôk nây, khân may mra gĭt Gâp jêng Brah Yêhôva.’

⁶ Yorlah Brah Yêhôva lah: ‘Yorlah may hŏ tap ti, ntrâm jâng, nuih n'hâm bêng ma nau gơm mưch jêh ri răm maak tâm rdâng đah bri neh Israel,

⁷ yor nây, aơ, Gâp hŏ yơr jêh ti Gâp tâm rdâng đah may. Gâp mra jao may jêng ndơ pit in ăn ma lĕ rngôch bri dak; Gâp mra ngluh lơi may tă bơh phung ƀon lan; Gâp mra ƀư rai may tă bơh bri dak. Gâp mra ƀư rai lơi may jêh ri may mra gĭt Gâp jêng Brah Yêhôva.’”

Nau mbơh lor ma phung ƀon lan Môap

⁸ Kôranh Brah Yêhôva lah: “Yorlah Môap jêh ri Sêir geh ngơi pô aơ: ‘Ri, ngih Yuđa tâm ban ma lĕ rngôch bri dak êng,’

⁹ yor nây, aơ, Gâp mra ƀư rai lĕ ƀon ntŭk n'har bri Môap, nây jêng lĕ rngôch ƀon ƀư nau chrêk rmah ma n'gor bri nây nâm bu ƀon Bet-Jêsimôt, ƀon Baal-Mêon jêh ri ƀon Kiriathaim.

¹⁰ Gâp mra jao n'gor Môap jêh ri n'gor phung Ammôn ăn ma phung ƀon mpeh Luh Nar ƀư drăp ndơn gay ma phung ƀon lan Ammôn mâu hôm dơi kah gĭt ôh ta nklang lĕ rngôch bri dak đŏng ôh.

¹¹ Tâm ban lĕ Gâp mra ƀư nau phat dôih ma bri Môap jêh ri khân păng mra gĭt Gâp jêng Brah Yêhôva.”

Nau mbơh lor ma bri Êđôm

¹² Brah Yêhôva lah: “Yorlah phung ƀon lan Êđôm plơng har jêh ma ngih Yuđa jêh ri păng hŏ ƀư tih glăm lơn dôl plơng har đah ngih nây, yor nây Kôranh Brah Yêhôva lah pô aơ:

¹³ ‘Gâp mra yơr ti tâm rdâng đah bri Êđôm, mra ƀư rai lơi bunuyh jêh ri mpô mpa gŭ tâm nây; Gâp mra ƀư ma ƀon nây jêng rngol; ntơm bơh Têman tât ma Dêdan, khân păng mra chôt khĭt yor ma đao.

¹⁴ Gâp mra dŏng ti phung ƀon lan Israel gay plơng har ma Êđôm jêh ri khân păng mra ƀư ma phung ƀon lan Êđôm tĭng nâm nau ji nuih jêh ri nau Gâp nuih ngăn. Rnôk nây, khân păng mra gĭt mâm nau Gâp plơng har, Kôranh Brah Yêhôva lah pônây.’”

Nau mbơh lor ma phung Philistin

¹⁵ Kôranh Brah Yêhôva lah: “Yorlah ƀon lan Philistin ma nau mưch rmot jêh ri nau rlăng jŏ jong hŏ har plơng tâm nau mhĭk ngăn gay nkhĭt n'gor bri Yuđa,

¹⁶ yor nây, Kôranh Brah Yêhôva lah: ‘Aơ, Gâp mra yơr ti tâm rdâng đah phung Philistin, ƀư rai lơi phung Kêrêthit jêh ri nkhĭt lĕ phung hôm e klen n'gŏ kơh dak mƀŭt.

¹⁷ Gâp mra ƀư nau plơng bôk toyh tâm rdâng đah khân păng, sŏk nau ji nuih gay phat dôih khân păng. Rnôk nây, khân păng mra gĭt Gâp jêng Brah Yêhôva, tơlah Gâp har plơng ma khân păng.’”