Êsêkiêl 24 - Nau Brah Ndu Ngơi 2023

Nau ƀư rai ƀon Yêrusalem

¹ Tâm năm rơh sĭn, khay jât, năng jât, geh nau Brah Yêhôva lah ma gâp:

² “Hơi kon bunuyh, nchih hom amoh nar aơ, nar aơ yơh, yor hađăch Babilôn hŏ dăch tât jêh ma ƀon Yêrusalem tâm nar aơ yơh.

³ Nkoch hom du nau ngơi ntĭt ma phung ƀon lan vay tâm rdâng jêh ri lah ma khân păng pô aơ: ‘Kôranh Brah lah: N'gân hom glah, n'gân hom glah Jêh ri troch hom dak.

⁴ Chê̆ hom tâm glah âk mlay puăch, Lĕ rngôch mlay puăch ueh, nglu, nglik Jêh ri nting dŭt ueh chê̆ ăn bêng.

⁵ Săch hom du mlâm biăp ueh ngăn tâm phung Jêh ri bun long tâm dâng glah gay gâm nting. Gâm hom ăn khuh Gay krĕt nting tâm glah.’

⁶ Yor nây, Brah Yêhôva lah: ‘Rêh ni ngăn ma ƀon pung mham, Rêh ni ma glah lĕ ek găm Ek găm nây mâu jut kloh ôh! Sŏk hom du mlay du mlay ăn kŏ tât lĕ, Mâu sŏk tâm nchroh mâu lah săch ôh.

⁷ Yorlah mham păng pling jêh hôm e ta nklang păng; Păng pling mham nây ta klơ lŭ chrêk Mâu pling ôh ta neh Gay ăn ma ndruyh neh brôi lơi.

⁸ Yor nau nây yơh gay ăn hao ji nuih jêh ri har plơng bôk Gâp lĕ pling jêh mham păng ta klơ lŭ chrêk, Kŏ tât păng mâu hôm dơi nkŭm đŏng ôh.’

⁹ Yor ri, Brah Yêhôva lah: ‘Rêh ni ngăn ma ƀon phung pling mham! Gâp tâm ban lĕ mra bun long ăn âk.

¹⁰ Bun hom long, sŭnh ŭnh ăn hĭt, Gâm ăn rmuk puăch, tât suăt dak, Jêh ri ăn kŏ ŭnh sa nting lĕ.

¹¹ Jêh nây, dơ glah dơm ta klơ ŭnh rnga, Kŏ tât glah nây păng dŭm jêh ri ŭnh sa Gây nau ƀơ̆ ƀơch tâm trôm păng lêk lĕ, jêh ri ek găm păng rai lĕ.

¹² Păng pah kan hŏt rgănh dơm dam, Yorlah ek găm âk ngăn, mâu dơi ƀư kloh ôh, Nđâp tơlah tê̆ tâm ŭnh jêh, ek găm nây mâu du luh lĕ!

¹³ Nau ƀơ̆ ƀơch may jêng nau tih văng tĭr. Yorlah Gâp hŏ ƀư kloh jêh may ƀiălah may mâu ŭch dơi ƀư kloh, rĭ dĭng may mâu mra dơi ƀư kloh đŏng ôh, kŏ tât nau Gâp ji nuih đah may mâu hôm.

¹⁴ Gâp, Brah Yêhôva, hŏ lah jêh nau nây mra geh tât. Gâp mra ƀư, Gâp mâu mra plơ̆ rŭch ôh, mâu yô̆ ôh, mâu tâm rgâl nau mĭn ôh. Bu mra phat dôih may tĭng nâm trong jêh ri kan may pah,’ Kôranh Brah Yêhôva lah pônây.”

¹⁵ Geh nau Brah Yêhôva lah ma gâp:

¹⁶ “Hơi kon bunuyh, ma nau tât ndal, Gâp mra sŏk lơi tă bơh may nau măt may ŭch kơnh ƀiălah mâu dơi lŭng nter ôh, mâu dơi nhhiăng nhĭm jêh ri mâu dơi hor dak măt ôh.

¹⁷ Vơl êng hom lơi ta nhĭm ăn ma nơm khĭt; mpân hom bok ta klơ bôk may jêh ri nsoh ntâu jot tâm jâng; lơi ta rdêp ôh têp trôm mbung jêh ri lơi sa piăng let bu njăt.”

¹⁸ Pônây ơm ôi gâp ngơi ma ƀon lan, tât kêng mhaơ ur gâp khĭt. Kah ôi taơ, gâp ƀư tĭng nâm nau hŏ lah jêh ma gâp.

¹⁹ Rnôk nây phung ƀon lan lah ma gâp: “May mâu ŭch mbơh ăn ma hên gĭt đơ nau may ƀư aơ geh nau khlay lĕ?”

²⁰ Gâp plơ̆ sĭt lah: “Geh nau Brah Yêhôva ngơi ma gâp:

²¹ ‘Lah hom ma ngih Israel pô aơ: Kôranh Brah Yêhôva lah: Aơ Gâp mra ƀư ƀơ̆ ntŭk kloh ueh Gâp, jêng ntŭk khân may ƀư sŏk nau khư ma nau ktang khân may, trôm măt khân may ŭch kơnh, nuih n'hâm khân may rŏng. Kon bu ur, kon bu klâu khân may hŏ chalơi jêh mra cha lôt khĭt yor ma đao.

²² Rnôk nây, khân may mra ƀư nâm bu gâp hŏ ƀư jêh; khân may mâu mra rdêp ôh têp trôm mbung, mâu lĕ sa piăng let bu njăt.

²³ Bok khân may mra dơm ta klơ bôk mro, ntâu jot khân may mra nsoh mro tâm jâng; khân may mâu kuăl nhĭm ôh, nhhiăng nhĭm ƀiălah mra huănh hươi yor nau tih khân ay may nơm, jêh ri khân may tâm vơl ndrel ndrăng nơm dơm.

²⁴ Y-Êsêkiêl mra jêng du nau mbên ma khân ay may; khân may mra ƀư nâm bu păng hŏ ƀư jêh. Tơlah lĕ rngôch nau nây mra tât, khân ay may mra gĭt Gâp jêng Kôranh Brah Yêhôva.’

²⁵ Hơi kon bunuyh, bi ma may, tâm nar Gâp mra sŏk lơi nau ktang tă bơh khân păng, nau maak, nau chrêk rmah, nau măt khân păng ŭch kơnh, nuih n'hâm khân păng rŏng, phung kon bu ur jêh ri kon bu klâu khân păng,

²⁶ Tâm nar nây, mra geh nơm du klaih văch mbơh ăn ma may tăng.

²⁷ Tâm nar nây, trôm mbung may mra hă jêh ri ngơi ma nơm du klaih. May mra ngơi jêh ri mâu hôm jêng mlo đŏng ôh. May mra jêng du ntil ndơ tâm mbên ma khân păng jêh ri khân păng mra gĭt ma Gâp jêng Brah Yêhôva.”