Êsêkiêl 23 - Nau Brah Ndu Ngơi 2023

Nau phat dôih ma ƀon Samari jêh ri ƀon Yêrusalem

¹ Geh nau Brah Yêhôva lah ma gâp:

² “Hơi kon bunuyh, geh bar hê bu ur jêng kon du me bă.

³ Khân păng văng tĭr ta Êjipt, ƀư nau văng tĭr dôl khân păng druh mom; ta nây, toh khân păng lĕ bu pet jêh ri roh ndŭl druh.

⁴ Amoh nur jêng H'Ôhôla jêh ri amoh oh păng jêng H'Ôhôliba. Khân păng jêng ndơ ma Gâp jêh ri deh kon bu ur, kon bu klâu. H'Ôhôla jêng ƀon Samari, bi ma H'Ôhôliba jêng ƀon Yêrusalem.

⁵ H'Ôhôla ƀư nau văng tĭr dôl păng jêng ndơ ma Gâp. Păng hăn tĭng tĭr păng jêng ƀon lan Asiri, phung chiau meng păng.

⁶ Khân păng nsoh ao chăng, jêng phung kôranh tahan jêh ri kôranh chiă uănh, lĕ rngôch jêng bu klâu ndăm ueh da dê, phung tahan ncho seh.

⁷ Păng ƀư văng tĭr ma phung bu klâu ndăm ueh ngăn phung Asiri; păng ƀư ƀơ̆ êng păng nơm ma phung păng rŏng ndrel ma lĕ rngôch rup brah khân păng.

⁸ Păng mâu lơi ôh nau văng tĭr păng djôt leo ntơm bơh n'gor bri Êjipt jêng ntŭk bu hŏ ƀư bêk păng dôl rnôk hôm druh mom, ƀư ăn roh ndŭl druh păng jêh ri nkhŭt nau văng tĭr ta khân păng.

⁹ Yor ri, Gâp jao jêh păng tâm ti phung tĭr păng, jêng tâm ti phung Asiri ma phung păng rŏng.

¹⁰ Khân păng doh rhôk păng, sŏk phung bu ur phung kon bu klâu păng jêh ri nkhĭt păng nơm ma đao. Păng hŏ jêng nau ngơi hôr tâm phung bu ur jêh ri nau phat dôih hŏ ăn jêh ma păng.

¹¹ Oh bu ur păng H'Ôhôliba saơ lĕ rngôch nau nây; nđâp lơ lah păng jêng ka n'hong tih lơn ma nur păng, jêh ri păng văng tĭr âk lơn.

¹² Păng rŏng ma phung Asiri, phung kôranh tahan jêh ri phung kôranh chiă uănh, jêng phung chiau meng păng; khân păng nkrơ̆ nsoh ăp ntil kho ao, rŏng ncho seh, lĕ rngôch jêng bu klâu ueh.

¹³ Gâp saơ păng hŏ ƀư ƀơ̆ êng păng nơm tâm ban lĕ jêh ri lĕ bar hê oh nur chuat hăn du trong dơm.

¹⁴ Păng lơ hô ƀư nau văng tĭr lơn đŏng dôl păng saơ lĕ rup bunuyh trah jêh ta klơ mpêr ƀon, lĕ rup brah phung Kaldê mhĭng ma dak chăng,

¹⁵ khân păng vân rse bŭt jêh ri mpân kưn rjai ta klơ bôk, bu uănh ma khân păng nâm bu phung kôranh. Lĕ rngôch khân păng tâm ban phung Babilôn geh jêng tă bơh bri Kaldê.

¹⁶ Dôl saơ khân păng pôri păng rŏng jêh jêh ri prơh hăn bunuyh mbơh ma khân păng ta Kaldê.

¹⁷ Phung Babilôn văch ma păng, hao klơ sưng bê̆ch ndrel jêh ri khân păng ƀư ƀơ̆ păng yor nau văng tĭr păng nơm. Lôch nau ƀư ƀơ̆ đah khân păng pôri nuih n'hâm păng tâm rmot.

¹⁸ Păng hŏ mpơl jêh nau văng tĭr păng, doh rhôk păng nơm pôri nuih n'hâm Gâp dĭl păng tâm ban lĕ nâm bu hŏ dĭl jêh ma nur păng.

¹⁹ Ƀiălah păng ntop âk nau văng tĭr dôl kah gĭt tay ma rnôk păng hôm druh mom, rnôk păng ƀư nau văng tĭr tâm n'gor bri Êjipt.

²⁰ Păng rŏng ma phung tĭr ơm păng, jêng phung ŭch nau nglay săk nâm bu seh bri, nau văng tĭr nâm bu seh.

²¹ Yorlah ay ŭch rŏng ma nau văng tĭr dôl ay druh mom, rnôk phung Êjipt pet rvơ toh ay jêh ri ƀư roh ndŭl druh ay.

²² Yor nây, Hơi H'Ôhôliba, Kôranh Brah Yêhôva lah: ‘Aơ, Gâp mra nsônh phung tĭr nây nuih n'hâm ay lĕ dĭl jêh, tâm rdâng đah ay jêh ri Gâp leo khân păng văch rduh lơh ay tă bơh puăn mpeh:

²³ nây jêng phung Babilôn, lĕ rngôch phung Kaldê, phung Pêkôt, phung Sôa, jêh ri Kôa ndrel ma lĕ rngôch phung Asiri dôl gŭ ndrel ma khân păng, jêng phung bu klâu ndăm ueh, lĕ rngôch phung kôranh chiă uănh jêh ri phung kôranh tahan, lĕ rngôch phung kôranh chiă uănh jêh ri phung kôranh tahan toyh, lĕ rngôch ncho seh da dê.

²⁴ Khân păng ndrăp ndơ tâm lơh, ndeh seh, ndeh rdeng ndơ, jêh ri du phung tahan âk râk văch tâm rdâng đah ay; khăn păng sŏk khêl toyh, khêl jê̆, jêh ri ndô môk loih nchueng jŭm ay. Gâp mra jao nau phat dôih khân păng jêh ri khân păng mra phat dôih tĭng nâm nau vay ƀư khân păng.

²⁵ Gâp mra hao ntôn tâm rdâng đah ay jêh ri khân păng mra phat dôih ay tâm nau ji nuih ngăn. Khân păng mra koh trôm muh jêh ri ti ay; bi phung hôm e klen tâm ay mra cha lôt yor ma đao. Khân păng mra nhŭp kon bu ur kon bu klâu ay; phung ay hôm e klen tâm ay ŭnh mra sa rvăn.

²⁶ Khân păng mra doh kho ao ay jêh ri sŏk pit ndơ nkrơ̆ khlay ay.

²⁷ Pôri, Gâp mra mƀăr lơi nau ay văng tĭr jêh ri nau ka n'hong ay djôt leo jêh tă bơh n'gor bri Êjipt. Ay mâu mra n'gơr măt uănh khân păng jêh ri mâu hôm kah gĭt ma Êjipt đŏng ôh.’

²⁸ Yorlah Kôranh Brah Yêhôva lah: ‘Aơ Gâp mra jao ay tâm ti phung ay tâm rmot, jêh ri tâm ti phung ay dĭl jêh.

²⁹ Khân păng mra ƀư ma ay ma nau tâm rmot jêh ri sŏk pit play n'hâm suan ay pah kan. Khân păng mra ăn ay gŭ rhôk, săk hưl jêh ri nau ka n'hong, nau ay văng tĭr bu mra mpơl lĕ.

³⁰ Bu mra ăn ay tâm ban pônây yorlah ay ƀư nau văng tĭr ăn ma lĕ bri dak jêh ri ƀư ƀơ̆ ma ay nơm ma lĕ rup brah khân păng.

³¹ Ay tĭng jêh trong nur ay yor ri Gâp mra ăn kachok păng nhêt tâm ti ay.’

³² Kôranh Brah Yêhôva lah: ‘Ay mra nhêt kachok nur ay Jêng kachok jru jêh ri toyh Dơi prăp âk ngăn; Bu mra gơm mưch ntêh rmot ay.

³³ Ay mra bêng ma nau nhŭl ndrănh jêh ri rngot rvê, Yor kachok nur ay Samari Jêng kachok tâm nau krit toyh jêh ri rai lĕ.

³⁴ Ay mra nhêt kachok nây jêh ri nhêt lĕ, Ay mra dong kachok hăch rhên jêh ri gĭnh păng, Jêh nây ay hêk êng toh ay nơm; Nâm bu Gâp hŏ lah jêh,’ Kôranh Brah Yêhôva lah pônây.

³⁵ Yor nây, Kôranh Brah Yêhôva lah: ‘Yorlah ay lĕ chuêl Gâp jêh, chalơi Gâp pakơi ay, yor nây ay dơn nau tât geh yor nau ƀơ̆ nau ka n'hong ay!’”

³⁶ Brah Yêhôva lah ma gâp pô aơ: “Hơi kon bunuyh, may phat dôih lĕ ma H'Ôhôla jêh ri H'Ôhôliba? Mbơh hom ma khân păng gĭt lĕ nau mhĭk khân păng.

³⁷ Khân păng hŏ ƀư tih văng tĭr jêh ri ti khân păng krêp mham. Khân păng hŏ ƀư tih văng tĭr jêh đah phung rup brah khân păng; nđâp ma lĕ rngôch phung khân păng deh ăn ma Gâp, tâm ban lĕ khân păng nhhơr rgăn ta ŭnh gay ƀư ndơ sông sa ăn ma rup brah!

³⁸ Khân păng ăt hôm ƀư nau aơ đŏng: Ndrel tâm du nar khân păng hŏ ƀư ƀơ̆ jêh ntŭk kloh ueh Gâp jêh ri ƀư tih lĕ rngôch nar saƀat Gâp!

³⁹ Jêh khân păng nkhĭt lơi kon păng nơm nhhơr ma rup brah, tâm nar nây, khân păng lăp tâm ntŭk kloh ueh Gâp gay ƀư ƀơ̆ ƀơch ntŭk nây! Nây jêng nau khân păng ƀư ta nklang ngih Gâp!

⁴⁰ Khân may hŏ prơh hăn phung mbơh gay jă kuăl phung bunuyh tă bơh bri ngai văch ma păng. Nôk khân păng hŏ tât, yor phung ay ŭm rao, nchih kach trôm măt ay nơm, jêh ri văn ndơ nkrơ̆ săk.

⁴¹ Ay gŭ ta klơ sưng bê̆ch ueh; panăp sưng nây geh du mlâm sưng sông jêh ri dơm ta klơ nây ndơ ƀâu kah jêh ri dak ngi ôlive Gâp.

⁴² Tăng bâr drơu drơu phung âk gŭ jŭm ta nây; geh bunuyh dêh rhêt ndrel phung nhŭl ndrănh njŭn leo tă bơh bri rdah; khân păng dok kông ta ti bar hê oh nur ay jêh ri ndô đon hađăch lơp rmah ta klơ bôk.

⁴³ Gâp lah ma bunuyh hŏ nchah rai yor nau văng tĭr pô aơ: ‘Aƀaơ, khân păng dôl ƀư nau văng tĭr ndrăng khân păng nơm’

⁴⁴ Khân păng văch tât ma păng nâm bu văch ma bu ur văng tĭr nđâp lah kơt nây tâm ban lĕ khân păng tât ma H'Ôhôla jêh ri H'Ôhôliba jêng bu ur văng tĭr pônây.

⁴⁵ Ƀiălah phung bunuyh sŏng srăng mra phat dôih khân păng nâm bu phat dôih bu ur văng tĭr jêh ri bu ur ƀư pling mham, yorlah khân păng ƀư tih văng tĭr jêh ri ti khân păng krêp mham.

⁴⁶ Yor ri, Kôranh Brah Yêhôva lah: ‘Gâp mra leo du phung âk tâm rdâng đah khân păng jêh ri mra jao khân păng tâm nau klach krit jêh ri bu tâm pit.

⁴⁷ Phung âk nây mra klŭp lŭ ma khân păng; sŏk đao ntâp khân păng, nkhĭt kon bu ur, bu klâu khân păng jêh ri sŏk ŭnh su ngih vâl khân păng.

⁴⁸ Pônây yơh, Gâp mra nkhĭt lĕ nau văng tĭr tâm bri dak gay ăn ma lĕ rngôch phung bu ur gĭt nau mbơh lơi tĭng ƀư nau văng tĭr ay đŏng ôh.

⁴⁹ Bu mra nkhŭt tay nau văng tĭr khân ay may ta khân ay may nơm; khân ay may mra anh nau tih rup brah khân ay jêh ri ay may mra gĭt Gâp jêng Kôranh Brah Yêhôva.’”