Êsêkiêl 22 - Nau Brah Ndu Ngơi 2023

Nau tih toyh ƀon Yêrusalem

¹ Geh nau Brah Yêhôva lah ma gâp:

² “Hơi kon bunuyh, di lĕ may mra phat dôih, di lĕ may mra phat dôih ma ƀon pling mham aơ? Pôri ƀư hom ăn păng gĭt lĕ rngôch nau mhĭk păng.

³ Lah hom ma păng: ‘Kôranh Brah Yêhôva lah: Du rplay ƀon ƀư pling mham gŭ ta nklang păng tât năng tâm nal; păng ƀư jêh lĕ rup brah gay ƀư nau ƀơ̆ ƀơch êng păng nơm!

⁴ May jêng tih jêh yor nau may ƀư pling mham, jêh ri jêng ƀơ̆ ƀơch ma yor lĕ rup brah may hŏ ƀư jêh. Pônây may hŏ ƀư ăn lĕ nar may dăch lơn jêh ri lĕ năm may mra tât gơnh lơn. Yor ri, Gâp hŏ ƀư jêh ăn may jêng ndơ prêng ma ntil mpôl bunuyh, ƀư ăn lĕ rngôch bri dak bu gơm mưch.

⁵ Phung gŭ dăch tâm ban phung gŭ ngai mra gơm mưch ma may, jêng ƀon prêng, bêng ma nau drơu drơu.

⁶ Uănh hom, phung kôranh Israel gŭ tâm may, ăp nơm sŏk tĭng nau dơi chiă uănh da dê ƀư pling mham.

⁷ Ta ntŭk may, bu tâm rmot mê̆ mbơ̆; ta ntŭk may, bu tŭn jot ma nơm njơh ƀât lât; ta ntŭk may, bu tŭn jot ma phung kon đơi ndrel phung ndrô.

⁸ May mưch ma ndơ kloh ueh Gâp jêh ri ƀư tih lĕ nar saƀat Gâp!

⁹ Ta ntŭk may, geh phung ngơi nchơt njêng nau ŭch pling mham; ta ntŭk may, geh phung ndrăp sông sa ta klơ lĕ rngôch yôk; ta nklang may, geh bunuyh ƀư tih văng tĭr.

¹⁰ Ta ntŭk may, geh bunuyh pơk mpơl nau rhôk phung mbơ̆ khân păng nơm; ta ntŭk may, geh bunuyh ƀư ƀơ̆ đah bu ur dôl geh săk bu ur.

¹¹ Ta ntŭk may, bunuyh aơ ƀư nau ƀơ̆ đah ur chiau meng păng, bunuyh êng ƀư ƀơ̆ đah ƀăn păng nơm, bunuyh êng đŏng ƀư prêng oh ruh păng jêng kon bu ur mbơ̆ păng.

¹² Ta ntŭk may, bu dơn ndơ blŏl gay ƀư pling mham, may sŏk jêh prăk sa kao jêh ri n'hao prăk sa kao, may tŭn jot phung chiau meng gay geh ndơ jêh ri lĕ chuêl jêh Gâp, Kôranh Brah Yêhôva lah pônây.

¹³ Ri, Gâp mpang ti Gâp tâm ndơ mâu di may hŏ ƀư jêh ri ta mham hŏ hoch tâm nklang may.

¹⁴ Tât nar Gâp mra phat dôih, dơi lĕ nuih n'hâm may dơi dơn đŏng jêh ri ti may ăt hôm jêng ktang lĕ? Gâp, Brah Yêhôva, hŏ ngơi jêh pôri Gâp mra ƀư ngăn nau nây.

¹⁵ Gâp mra ƀư ma may chah rai pru pra du ta nklang ntil mpôl bunuyh êng, mprơh may lam bri dak êng, jêh ri Gâp mra ƀư rai lơi nau ƀơ̆ ƀơch tă bơh nklang may.

¹⁶ Rnôk nây, bu mra mưch may tanăp măt phung ntil mpôl bunuyh jêh ri may mra gĭt Gâp jêng Brah Yêhôva.’”

¹⁷ Geh nau Brah Yêhôva lah ma gâp:

¹⁸ “Hơi kon bunuyh, bi ma Gâp, ngih Israel hŏ jêng jêh nâm bu ndơ djah; lĕ rngôch khân păng jêng prăk, kông, loih, ndrak tâm ŭnh năk; khân păng jêng ndơ djah prăk.

¹⁹ Yor ri, Kôranh Brah Yêhôva lah: ‘Yorlah lĕ rngôch khân may jêng ndơ djah, yor nây Gâp mra rgum khân may ta nklang ƀon Yêrusalem.

²⁰ Tâm ban bu rgum prăk, kông, loih, ndrak gay krĕt tâm ŭnh năk jêh ri khôm ŭnh ta klơ ăn mâm nau lêk, pôri nau Gâp ji nuih, tâm ban nây lĕ Gâp mra rgum khân may jêh ri mƀăr khân may tâm ŭnh năk gay ƀư lêk tâm ban lĕ.

²¹ Nanê̆ ngăn Gâp mra rgum khân may jêh ri khôm ŭnh nau Gâp ji nuih ta klơ khân may pôri khân may mra lêk tâm nklang ŭnh nây.

²² Nâm bu prăk lêk tâm ŭnh năk tâm ban nây lĕ khân may mra lêk ta nklang ƀon nây jêh ri khân may mra gĭt Gâp, Brah Yêhôva, hŏ nkhŭt jêh nau Gâp ji nuih ta khân may.’”

²³ Geh nau Brah Yêhôva lah đŏng ma gâp:

²⁴ “Hơi kon bunuyh, lah hom ma păng pô aơ: ‘May jêng bri mâu geh kloh ôh, tâm nar Gâp nuih mâu geh dak mih ôh.

²⁵ Phung kôranh mbơh lor păng njêng nchră ta nklang păng nâm bu du mlâm yau mŭr gŭ ngrông dôl grang hêk mpa păng kăp; khân păng sa rvăn lĕ huêng, sŏk ntŭng drăp ndơ jêh ri ndơ khlay; ƀư ăn phung ndrô ntop âk tâm ƀon.

²⁶ Lĕ rngôch phung kôranh ƀư brah păng ƀư tih đah nau vay Gâp jêh ri ƀư ƀơ̆ ndơ kloh ueh Gâp; khân păng mâu kơp rnglah êng ôh moh ndơ jêng kloh ueh, moh ndơ jêng ƀơ̆; mâu lĕ nti bu gĭt rnglah êng moh ndơ jêng ƀơ̆ ƀơch, moh ndơ jêng kloh; khân păng nhêp măt mâu chrê ôh ma lĕ nar saƀat Gâp, ƀư ƀơ̆ Gâp ta nklang khân păng.

²⁷ Phung kôranh chiă uănh ta nklang păng nâm bu so bri hêk sa mpa; khân păng knŏng ŭch ƀư pling mham, ƀư roh lơi huêng gay geh drăp ndơ mâu sŏng.

²⁸ Phung nơm mbơh lor păng nsut ma klo mhĭng âk ta klơ khân păng ma nau tâm saơ dơm dam jêh ri ƀư nau n'hŭm pol mƀruh. Khân păng ngơi pô aơ: “Aơ jêng nau Kôranh Brah Yêhôva lah” tâm dôl Brah Yêhôva mâu mâp lah ôh.

²⁹ Phung ƀon lan tâm n'gor bri ƀư nau dăng ktang, ƀư tih nau ntŭng ndô ndơ bu, rkhŭk phung o ach, phung mâu geh ndơ jêh ri tŭn jot bunuyh gŭ njơh ƀât lât, mâu ƀư nau tâm di.

³⁰ Gâp joi jêh du huê bunuyh ta nklang khân păng gay ndâk tay mpêr ƀon toyh, yorlah neh gŭ dâk ta ntŭk lĕ đang chah tanăp Gâp gay ma Gâp mâu ƀư rai păng ôh; ƀiălah Gâp joi mâu dơi geh du huê bunuyh.

³¹ Yor ri Gâp nkhŭt jêh nau ji nuih ta klơ khân păng, jêh ri Gâp sŏk ŭnh ji nuih su khân păng. Gâp hŏ ƀư jêh trong khân păng nkhŭt ta klơ bôk khân păng, Kôranh Brah Yêhôva lah pônây.’”