Êsêkiêl 21 - Nau Brah Ndu Ngơi 2023

Nau phat dôih ma phung ƀon lan Israel jêh ri ma phung ƀon lan Ammôn

¹ Geh nau Brah Yêhôva lah ma gâp:

² “Hơi kon bunuyh, rle hom muh măt may leo rđŭng pa dâng jêh ri nti nau tâm rdâng mpeh pa dâng. Mbơh lor hom nau tâm rdâng đah bri krŏng ntŭk n'gor bri lâng Nêgep.

³ Ngơi hom ma bri krŏng Nêgep pô aơ: ‘Iăt hom nau Brah Yêhôva! Kôranh Brah Yêhôva lah: Aơ, Gâp mra sŭnh ŭnh tâm may, ŭnh nây mra sa lĕ rngôch tơm si ndrêh jêh ri nđâp tơm si kro ta ntŭk may. Mpiăt ŭnh hit mâu mra nhhât ôh, lĕ rngôch muh măt păng bu mra su ntơm bơh mpeh pa dâng tât mpeh pa lơ.

⁴ Lĕ rngôch bunuyh mra saơ Gâp nơm, Brah Yêhôva, sĭnh jêh ŭnh jêh ri ŭnh nây mâu mra nhhât ôh.’”

⁵ Rnôk nây gâp ngơi: “Ơ Kôranh Brah Yêhôva, khân păng lah ma gâp pô aơ: Mâu di păng jêng phung ƀư nau ngơi ntĭt hĕ?”

⁶ Geh nau Brah Yêhôva lah ma gâp:

⁷ “Hơi kon bunuyh, rle hom muh măt leo ma Yêrusalem, nti nau tâm rdâng lĕ rngôch ntŭk kloh ueh; ngơi mbơh lor hom đah bri Israel.

⁸ Ngơi hom ma bri Israel pô aơ: ‘Brah Yêhôva lah: Aơ, Gâp tâm rdâng đah may. Gâp mra tŏk đao luh bơh ndrop gay nkhĭt bunuyh sŏng srăng ndrel ma bunuyh djơh mhĭk tă bơh may.

⁹ Yorlah Gâp mra ƀư rai bunuyh sŏng srăng ndrel ma bunuyh djơh mhĭk tă bơh may pôri đao Gâp mra tŏk bơh ndrop tâm ban lĕ gay ma nkhĭt lĕ rngôch bunuyh ntơm bơh pa dâng tât pa lơ.

¹⁰ Jêh ri lĕ bunuyh mra gĭt Gâp, Brah Yêhôva, hŏ tŏk jêh đao bơh ma ndrop pôri mâu mra plơ̆ ntrŭp tâm ndrop đŏng ôh!’

¹¹ Hơi kon bunuyh, may lŭng nter ma nuih n'hâm rngot; di ngăn, lŭng nter hom tanăp măt khân păng ma nau rngot ngăn.

¹² Tơlah khân păng lah ma may: ‘Mâm ƀư may lŭng nter?’ Pôri may plơ̆ lah pô aơ: ‘Yorlah mbơh tât lam ntŭk ƀư ma lĕ nuih n'hâm rung răng da dê, lĕ rngôch ti mâu geh n'hâm suan, lĕ rngôch nau mĭn huăr rgănh, lĕ rngôch kômâk ra ai nâm bu dak. Aơ, nau nây dăch geh tât mra jêng nau ngăn, Kôranh Brah Yêhôva lah pônây!’”

¹³ Geh nau Brah Yêhôva lah ma gâp:

¹⁴ “Hơi kon bunuyh, ngơi mbơh lor hom pô aơ: ‘Brah Yêhôva lah: Ngơi hom pô aơ: Du mlâm đao, du mlâm đao mplanh jêh ri chrêk!

¹⁵ Păng mplanh gay ma sreh nkhĭt; păng chrêk ral nâm bu lơp nglaih. He dơi maak răm lĕ? Mâng jra kon bu klâu Gâp tâm rmot đah lĕ rngôch mâng jra êng.

¹⁶ Bu hŏ jao đao aơ gay ma tôl ăn chrêk, gay ma djôt tâm ti; nây jêng đao mplanh jêh ri chrêk dơm ta ti phung sreh nkhĭt.

¹⁷ Hơi kon bunuyh, kuăl hom jêh ri lŭng nter yor ma đao gŭ ta klơ phung ƀon lan Gâp, gŭ ta klơ lĕ rngôch phung kôranh chiă uănh Israel jêng phung hŏ jao jêh ăn ma đao ndrel ma phung ƀon lan Gâp. Yor ri, tap hom tơm blu!

¹⁸ Sek uănh hom, tơlah may mưch ma mâng jra, klăp lah nau mâu mra geh tât lĕ? Kôranh Brah Yêhôva lah pônây.’

¹⁹ Hơi kon bunuyh, pôri ngơi hom nau mbơh lor! Tap hom ti, kdŏ đao bar pe tơ̆. Nây jêng mlâm đao ƀư nkhĭt, du mlâm đao sreh nkhĭt âk bunuyh, dôl gŭ jŭm chiau meng

²⁰ gay ăn nuih n'hâm khân păng rai lêk jêh ri ƀư chêh prah. Gâp ăn dơm jêh đao rduh lơh tâm lĕ rngôch mpông khân păng. Vơ! mlâm đao dơi ƀư lơp nglaih, hơr mplanh gay ma nkhĭt bunuyh!

²¹ May hăn hom rduh lơh mpeh pa ma jêh ri dăp tahan mpeh pa chiau tĭng nâm ntŭk măt may rle.

²² Tâm ban lĕ Gâp tap bar đah ti ƀư bah nau Gâp ji nuih. Gâp nơm yơh, Brah Yêhôva, lah pônây.”

²³ Geh nau Brah Yêhôva lah ma Gâp:

²⁴ “Hơi kon bunuyh, tâm ban lĕ may ƀư ăn ma may bar trong gay ăn mlâm đao hađăch bri Babilôn hăn rgăn. Bar trong nây ntơm bơh ma du n'gor da dê. Ta ăp tơm trong, may ăt ƀư hom du mlâm n'gâng gay ntĭm trong lăp tâm ƀon.

²⁵ May treh hom du mlâm trong ăn ma đao hăn rgăn rlet ma Raba, ƀon phung kon sau Ammôn, jêh ri du mlâm trong rlet ma Yuđa ta Yêrusalem jêng ƀon geh pôih nâp.

²⁶ Yorlah hađăch Babilôn gŭ ta nglah pe jêng ntŭk lăp bar trong nây gay ƀư pol. Hađăch nsŭng nchroh hăr, ôp ma rup brah jêh ri sek uănh klơm.

²⁷ Tâm ti ma hađăch geh ndơ pol ma ƀon Yêrusalem đă sŏk ndơ ƀư rai ƀon, sreh nkhĭt, nter huy rduh tâm lơh, dŏng ndơ ƀư rai ƀon gay ma rduh lơh lăp ta mpông ƀon, n'hao bun neh jêh ri ndâk pôih nchueng jŭm ƀon.

²⁸ Đơ phung hŏ ton jêh uănh nau pol knŏng jêng nau mƀruh dơm, ƀiălah hađăch mra nkah ăn khân păng gĭt nau mhĭk khân păng nơm ƀư khân păng hăn jêng bu nă.

²⁹ Pôri yor Kôranh Brah Yêhôva lah: ‘Yor khân may lĕ nkah jêh gay kah gĭt tay nau mhĭk khân may nơm, bu mra mpơl nau tih khân may, nau tih tâm lĕ rngôch nau ƀư bu mra mpơl; yorlah khân may dơi nkah nau tih nây yor ri bu mra nhŭp khân may.

³⁰ Bi ma may jêng hađăch kôranh Israel, nơm djơh mhĭk di ma khĭt ri, nar may lĕ tât, nôk tâm rmal hŏ dăch jêh.’

³¹ Kôranh Brah Yêhôva lah: ‘Prăp hom đon, doh lơi đon hađăch; lĕ rngôch ndơ aơ mâu hôm nâm bu kơt saơm đŏng ôh! Moh ndơ dêh mra n'hao ăn prêh, moh ndơ prêh bu mra ntrŭnh lơi ăn dêh.

³² Rai yot, rai yot, rai yot! Gâp mra ƀư nau nây. Nau nây mâu mra geh kŏ tât ndah jŏ Nơm khư dơi phat dôih tât pôri Gâp mra ăn ma păng.’

³³ Hơi kon bunuyh, ngơi hom nau mbơh lor ma phung kon Ammôn jêh ri nau mưch khân păng pô aơ Kôranh Brah Yêhôva lah: ‘Ngơi hom: Pêh đao, pêh đao lĕ tŏk jêh gay sreh nkhĭt, dơi tôl nâm lơp nglaih gay nkhĭt lĕ!

³⁴ Dôl khân păng uănh nau tâm saơ mâu di, nau pol mƀruh ăn may pôri khân păng dơm may ta klơ trô ko phung djơh mhĭk khư ma bu ƀư rai; nar khân păng lĕ tât jêh, rnôk phat dôih khân păng kêng nglĕ dŭt dăch jêh.

³⁵ Nsro hom đao may tâm ndrop! Gâp mra phat dôih may tâm ntŭk may ndâk jêh, tâm bri bu deh ma may.

³⁶ Gâp nkhŭt nau Gâp ji nuih ta klơ may; sŏk ŭnh nau Gâp ji nuih khôm ta klơ may jêh ri Gâp mra jao may tâm ti phung ƀai, phung blau nkhĭt.

³⁷ May mra ƀư long sŭnh ŭnh; may mra pling mham ta bri may jêh ri bu mâu hôm kah gĭt may ôh yorlah Gâp nơm, Brah Yêhôva lah.’”