Êsêkiêl 20 - Nau Brah Ndu Ngơi 2023

Nau nduyh lah Israel jêh ri nau ton ma nar kăndơ̆

¹ Tâm năm rơh pơh, năng jât khay prăm, geh bar pe nuyh kôranh bu ranh Israel văch ôp ma Brah Yêhôva, jêh ri khân păng gŭ panăp gâp.

² Rnôk nây, geh nau Brah Yêhôva lah ma gâp:

³ “Hơi kon bunuyh, ngơi hom ma phung bu ranh Israel jêh ri lah ma khân păng Pô aơ: ‘Brah Yêhôva lah: Di lĕ khân may văch ŭch ôp ma Gâp hĕ?’ Brah Yêhôva lah: ‘Tĭng nâm Gâp gŭ rêh mro mrăng, Gâp mâu mra ăn khân may ôp ma Gâp ôh.’

⁴ Hơi kon bunuyh, may ŭch phat dôih khân păng, may ŭch phat dôih khân păng lĕ? May lah hom ăn khân păng gĭt nau ƀơ̆ phung chô yau khân păng.

⁵ May lah hom ma khân păng pô aơ: Kôranh Brah Yêhôva lah: ‘Tâm nar Gâp săch Israel, Gâp yơr ti ton ma kon sau ngih Yakôb jêh ri mpơl săk Gâp nơm ăn ma khân păng gĭt tâm n'gor bri Êjipt. Gâp lah ma khân păng pô aơ: Gâp jêng Yêhôva Brah Ndu khân may.’

⁶ Tâm nar nây, Gâp ton ma khân păng pô aơ Gâp mra djôt leo luh tă bơh n'gor bri Êjipt gay ma lăp tâm du n'gor bri Gâp joi rơm ndrăp ăn ma khân păng, du n'gor bri, jêng bri geh dak toh jêh ri dak sŭt, bri ueh lơn tâm lĕ rngôch bri.

⁷ Gâp lah ma khân păng: ‘Ăn ăp nơm khân may mƀăr lơi ăn ngai khân may bơh nau ƀơ̆ măt khân may ŭch uănh jêh ri lơi ta ƀư ƀơ̆ ôh khân may nơm ma lĕ rup brah bri Êjipt! Gâp jêng Yêhôva Brah Ndu khân may.’

⁸ Ƀiălah khân păng ŭch tâm rdâng đah Gâp jêh ri mâu ŭch iăt Gâp ôh; ăp nơm mâu mƀăr ôh lĕ nau ƀơ̆ măt khân may jêh ri mâu chalơi phung rup brah bri Êjipt. Rnôk nây, Gâp lah pô aơ Gâp mra nkhŭt nau Gâp ji nuih ta klơ khân păng, nkhŭt lĕ nau ji nuih Gâp mra tâm rdâng ma khân păng ta nklang bri Êjipt.

⁹ Ƀiălah Gâp ƀư yor ma amoh Gâp nơm, gay ăn amoh nây bu mâu mưch ôh tanăp măt lĕ phung bu năch, ntŭk khân păng dôl gŭ. Tanăp măt phung ndŭl mpôl nây, Gâp mpơl jêh Gâp nơm ma khân păng gĭt dôl leo khân păng du luh tă bơh n'gor bri Êjipt.

¹⁰ Pôri, Gâp hŏ leo jêh khân păng du luh tă bơh n'gor bri Êjipt jêh ri lăp tâm bri rdah.

¹¹ Gâp ăn jêh ma khân păng nau vay dăp Gâp jêh ri ƀư ăn ma khân păng gĭt nau vay ƀư bơh Gâp gay ma bunuyh tĭng nau ƀư nây, ri mơ dơi rêh.

¹² Gâp ăn đŏng ma khân păng nar saƀat Gâp tâm ban du nau mbên ta nklang Gâp jêh ri khân păng, gay khân păng gĭt pô aơ Gâp jêng Brah Yêhôva prăp jêh khân păng jêng kloh ueh.

¹³ Ƀiălah ngih Israel, tâm rdâng đah Gâp tâm bri rdah. Khân păng mâu ŭch chuat tĭng ôh nau vay dăp bơh Gâp, dun lơi nau vay ƀư bơh Gâp jêng nau ăn ma mbu nơm tông mra yor nau nây dơi rêh; khân păng ƀư tih rlau keh lĕ rngôch nar saƀat Gâp. Rnôk nây, Gâp lah Gâp mra nkhŭt nau Gâp ji nuih ta klơ khân păng jêh ri ƀư rai tâm bri rdah.

¹⁴ Ƀiălah Gâp hŏ ƀư yor amoh Gâp gay ma amoh nây bu mâu ƀư ƀơ̆ tanăp phung ƀon lan êng, jêng phung ƀon lan hŏ saơ jêh Gâp leo khân păng du luh tă bơh khân păng.

¹⁵ Gâp yơr ti ton jêh ma khân păng tâm bri rdah pô aơ Gâp mâu mra leo khân păng lăp ôh tâm n'gor bri Gâp hŏ ăn ma khân păng, jêng n'gor bri bêng ma dak toh jêh ri dak sŭt, bri ueh lơn tâm lĕ rngôch bri.

¹⁶ Yorlah khân păng dun jêh nau vay ƀư bơh Gâp, mâu tông nau vay dăp Gâp jêh ri ƀư ƀơ̆ jêh ma lĕ nar saƀat Gâp, yorlah nuih khân păng rle mpeh ma rup brah khân păng nơm.

¹⁷ Nđâp tơlah pônây, măt Gâp uănh yô̆ jêh ma khân păng, mâu ƀư rai ôh khân păng mâu lah ƀư rai lĕ khân păng tâm bri rdah.

¹⁸ Gâp lah ma phung kon sau khân păng tâm bri rdah pô aơ: ‘Lơi ta khân may tĭng nau vay dăp mbơ̆ khân may, lơi djôt prăp nau vay ƀư mbơ̆ khân may, mâu lĕ djôt prăp nau khân păng ntĭnh mâu lah ƀư ƀơ̆ khân may nơm ma yor phung rup brah khân păng.

¹⁹ Gâp jêng Yêhôva Brah Ndu khân may; ƀư hom tĭng nau vay dăp Gâp, djôt prăp nau vay ƀư Gâp jêh ri tĭng ƀư.

²⁰ Prăp hom lĕ nar Saƀat Gâp jêng kloh ueh; păng mra ƀư du nau mbên ta nklang Gâp đah khân may gay ăn khân păng dơi gĭt Gâp jêng Yêhôva Brah Ndu khân may.’

²¹ Ƀiălah phung kon sau khân păng tâm rdâng jêh đah Gâp, khân păng mâu hăn tĭng nau vay dăp Gâp, mâu djôt prăp ôh nau vay ƀư bơh Gâp, jêng ntil nau bunuyh tông dơi rêh, jêh ri khân păng ƀư tih lĕ nar saƀat Gâp đŏng. Rnôk nây, Gâp lah Gâp mra nkhŭt nau Gâp ji nuih ta klơ khân păng, nkhŭt lĕ nau Gâp ji nuih tâm rdâng đah khân păng tâm bri rdah.

²² Ƀiălah, Gâp rŭch lơi jêh ti Gâp jêh ri ƀư jêh yor amoh Gâp gay ăn amoh nây bu mâu ƀư ƀơ̆ ôh tanăp phung ƀon lan êng, jêng phung ƀon lan saơ Gâp hŏ leo khân păng luh tă bơh khân păng.

²³ Tâm ban lĕ Gâp hŏ yơr ti ton đah khân păng tâm bri rdah pô aơ Gâp mra ƀư ma khân păng chah rai pru pra ta nklang lĕ rngôch phung ƀon lan jêh ri mprơh du tâm âk bri dak,

²⁴ yorlah khân păng mâu tông ôh ma nau vay ƀư Gâp ƀiălah chalơi jêh nau vay dăp Gâp, ƀư ƀơ̆ lĕ nar Saƀat Gâp jêh ri măt khân păng treng uănh ma lĕ rup brah phung chô yau khân păng.

²⁵ Tâm ban lĕ Gâp hŏ ăn jêh ma khân păng lĕ rngôch nau vay dăp mâu ueh ôh jêh ri lĕ rngôch nau vay ƀư mâu yor tă bơh nây dơi rêh.

²⁶ Gâp hŏ ƀư jêh ăn khân păng jêng ƀơ̆ jêh yor ndơ ƀư brah dôl khân păng nhhơr lĕ rngôch kon bôk rah tâm ŭnh, gay yor nây, Gâp ƀư ăn ma khân păng jêng rngol ŭch ma khân păng gĭt pô aơ Gâp jêng Brah Yêhôva.

²⁷ Yor ri, hơi kon bunuyh, ngơi hom ma ngih Israel jêh ri lah ma khân păng: ‘Kôranh Brah Yêhôva lah: Phung chô yau khân may ngơi sưr jêh ma Gâp yorlah khân păng mâu răp jăp đah Gâp.

²⁸ Dôl Gâp hŏ leo jêh khân păng lăp neh Gâp ton ăn jêh ma khân păng, rnôk nây khân păng saơ jêh lĕ yôk prêh, lĕ rngôch tơm si dŭt pŭm jêh ri nhhơr ndơ ƀư brah ma khân păng nơm ta nây. Khân păng hŏ mpơl ta nây ndơ ƀư brah gay nsônh Gâp ji nuih; khân păng su ndơ n'hôl geh ƀâu kah jêh ri ƀư ndơ nhhơr nhêt ta nây.

²⁹ Rnôk nây Gâp ôp ma khân păng: “Ntŭk prêh khân may hăn moh ndơ nây?”’ Pôri ntŭk prêh nây bu ntơ jêng Bama kŏ tât ma nar aơ.

³⁰ Yor nây, lah hom ma ngih Israel: ‘Kôranh Brah Yêhôva lah: Khân may mra ƀư ƀơ̆ êng khân may nơm tĭng nau phung chô yau khân may jêh ri khân may ƀư nau văng tĭr tĭng nau ƀơ̆ ƀơch khân păng lĕ?

³¹ Tơlah nhhơr ndơ jêh ri nhhơr kon khân may gŭch ma ŭnh, khân may ƀư ƀơ̆ ma lĕ rngôch rup brah khân may kŏ tât ma nar aơ. Hơi ngih Israel, di lĕ Gâp ăn khân may ôp mro hĕ? Brah Yêhôva lah: Tĭng nâm Gâp gŭ rêh mro mrăng, Gâp mâu ăn khân may ôp ma Gâp ôh!

³² Khân may lah pô aơ: “Hên ŭch tâm ban ma lĕ ntil mpôl bunuyh, lĕ rngôch bri dak ta klơ neh, mbah ma brah tơm si jêh ri lŭ.” Ƀiălah nau khân may ŭch mĭn nây mâu mra geh tât ôh.’

³³ Kôranh Brah Yêhôva lah: ‘Tĭng nâm Gâp gŭ rêh mro mrăng, Gâp mra sŏk ti ktang jêh ri yơr nting tur ti, nkhŭt nau ji nuih gay chiă uănh khân may!

³⁴ Gâp mra leo khân may du luh tă bơh phung ƀon lan êng; Gâp mra sŏk ti ktang, yơr nting tur ti jêh ri nau ji nuih nkhŭt gay rgum khân may tă bơh lĕ rngôch bri dak khân may nchah rai pru pra jêh tâm nây.

³⁵ Gâp mra leo khân may njŭn lăp tâm bri rdah lĕ rngôch phung ƀon lan êng jêh ri ta nây Gâp mra ăn gŭ panăp phat dôih khân may.

³⁶ Nâm bu Gâp phat dôih jêh phung chô yau khân may tâm bri rdah n'gor bri Êjipt tâm ban pônây lĕ Gâp mra phat dôih khân may,’ Kôranh Brah Yêhôva lah pônây.

³⁷ Gâp mra ƀư ma khân may rgăn tâm dâng mâng jra jêh ri mra leo khân may lăp tâm rse ma nau tâm rnglăp.

³⁸ Gâp mra mprơh du bơh khân may lĕ rngôch phung vay tâm rdâng jêh ri phung hao tâm rdâng đah Gâp. Gâp mra njŭn khân păng du luh tă bơh bri ntŭk khân păng gŭ njưh ƀât lât ƀiălah khân păng mâu mra dơi lăp tâm bri Israel ôh. Tâm ban pônây, khân may mra gĭt Gâp jêng Brah Yêhôva.

³⁹ Hơi ngih Israel, bi ma khân may Kôranh Brah Yêhôva lah: ‘Hăn hom, ăp nơm tâm phung khân may hăn mbah ma rup brah khân may nơm! Ƀiălah jêh nau nây, n'hêl nanê̆ khân may mra iăt nau Gâp jêh ri mâu mra ƀư ƀơ̆ amoh Gâp đŏng ôh, ma yor ndơ khân may ƀư brah jêh ri ma rup brah khân may.’

⁴⁰ Kôranh Brah Yêhôva lah: ‘Yorlah ta klơ yôk kloh Gâp, ta klơ yôk prêh Israel, ta nây lĕ rngôch ngih Israel mra pah kan ma Gâp tâm bri nây. Ta nây, Gâp mra dơn khân păng jêh ri ta nây đŏng Gâp mra kêh ndơ ƀư brah khân may jêh ri lĕ rngôch ndơ nhhơr ma play bôk yan khân may ndrel ma lĕ rngôch ndơ nhhơr kloh ueh.

⁴¹ Gâp mra vơt dơn khân may nâm bu ndơ n'hôl ƀâu kah tơlah Gâp djôt leo khân may luh bơh phung mpôl băl êng jêh ri tâm rgum khân may tă bơh lĕ bri dak khân may hŏ nchah rai pru pra, jêh ri nau kloh ueh Gâp mra dơi tâm mpơl ta nklang khân may tanăp măt phung bu năch.

⁴² Khân may mra gĭt Gâp jêng Brah Yêhôva tơlah Gâp njŭn khân may lăp tâm n'gor bri Israel jêng n'gor Gâp hŏ yơr ti ton ăn jêh ma phung chô yau khân may.

⁴³ Ta nây, khân may mra kah gĭt tay trong khân may jêh ri lĕ rngôch nau khân may hŏ ƀư ƀơ̆ khân may nơm. Khân may mra nduyh êng ma khân may nơm yor lĕ rngôch nau mhĭk khân may hŏ ƀư tih jêh.

⁴⁴ Khân may mra gĭt Gâp jêng Brah Yêhôva tơlah Gâp mra yor amoh Gâp nơm gay vơt khân may mâu tĭng ôh trong mhĭk jêh ri kan pah mhĭk khân may ƀư. Hơi ngih Israel, Kôranh Brah Yêhôva lah pônây.’”