Êsêkiêl 2 - Nau Brah Ndu Ngơi 2023

Kôranh Brah kuăl Y-Êsêkiêl

¹ Kôranh Brah lah ma gâp pô aơ: “Hơi kon bunuyh, jâng may dâk hom ăn nâp, Gâp mra ngơi ma may.”

² Păng lah ma gâp pônây Huêng Brah lăp gŭ tâm gâp, ƀư ăn jâng gâp dâk jêh ri gâp tăng Nơm dôl ngơi ma gâp.

³ Păng lah ma gâp: “Hơi kon bunuyh, Gâp prơh may hăn tât ma phung ƀon lan Israel, hăn tât ma phung vay mơng tâm rdâng đah Gâp. Khân păng jêh ri phung chô yau khân păng ƀư tih vay mơng tâm rdâng đah Gâp kŏ tât nar aơ.

⁴ Nây jêng phung kon sau sưr dăng bôk Gâp prơh may hăn tât ma khân păng. Lah hom đah khân păng pô aơ: ‘Nau Yêhôva Brah Ndu lah pô aơ!’

⁵ Nđâp lah khân păng iăt mâu lah mâu iăt nau may yorlah khân păng jêng ngih mơng vay tâm rdâng, khân păng mra gĭt geh jêh du huê nơm mbơh lor ta nklang khân păng.

⁶ Ƀiălah hơi kon bunuyh, lơi may klach khân păng ôh jêh ri mâu lĕ klach ma nau khân păng ngơi, nđâp lah rtau lok gŭ jŭm may jêh ri may gŭ tâm nklang ndŭr vơng kđôi lĕ. Lơi ta klach ôh ma nau khân păng ngơi jêh ri klach krit dôl tâm mâp măt đah khân păng yorlah khân păng jêng ngih vay mơng tâm rdâng.

⁷ Pôri may mbơh hom nau Gâp lah ma khân păng nđâp lah khân păng iăt mâu lah mâu, yorlah khân păng jêng phung tâm rdâng.

⁸ Ƀiălah hơi kon bunuyh, iăt hom nau Gâp lah ma may. Lơi tâm rdâng ôh nâm bu ngih mơng vay tâm rdâng nây. Hă hom trôm mbung sa ndơ Gâp ăn ma may.”

⁹ Gâp n'gơr uănh jêh ri saơ du ti djôt du ndrom samƀŭt ndơ̆ let gâp.

¹⁰ Păng pơk du ndrom samƀŭt nây tanăp gâp. Nây jêng ndrom samƀŭt geh nau nchih tâm trôm nđâp padih, nchih jêh ta nây nau ngơi nhĭm nhhiăng, nau klâng rvê, jêh ri nau rêh ni.