Êsêkiêl 19 - Nau Brah Ndu Ngơi 2023

Nau mprơ rngot Y-Êsêkiêl ma phung kôranh chiă uănh Israel

¹ Pôri may rŏ hom nau mprơ rngot ma phung kôranh chiă uănh Israel

² jêh ri lah: “Mê̆ may kăl e ri mâm păng jêng? Jêng yau mŭr me gŭ kuen ta nklang phung yau mŭr nkuăng; Gŭ kuen ta nklang phung yau mŭr kon Jêh rong phung kon păng.

³ Păng rong du mlâm yau mŭr kon tâm phung păng, Păng jêng du mlâm yau mŭr rah, Nti kăp mpa Jêh ri păng sa puăch bu.

⁴ Phung mpôl băl bunuyh tăng nteh ma păng; Bu nhŭp păng tâm trôm ntu. Khân păng sŏk nglĕ nklĕ leo hăn Têk păng tât ma n'gor Êjipt.

⁵ Tơlah yau mŭr me gŭ kâp hŏ jŏ Jêh ri nau kâp gân lĕ roh jêh, Păng nhŭp kon êng tâm phung păng ri đŏng Jêh ri mât rong jêng du mlâm yau mŭr rah.

⁶ Păng hăn nsong ta nklang phung yau mŭr, Jêng du mlâm yau mŭr rah, Nti kăp mpa Jêh ri sa puăch bu.

⁷ Păng ƀư rlâm pôih nâp khân păng Jêh ri ƀư rai lĕ ƀon toyh khân păng; Bri jêh ri lĕ rngôch mpô mpa gŭ tâm nây jêng rngol da dê, Yor tăng bâr păng rđuh ngrông khân păng.

⁸ Lĕ rngôch bri dak gŭ ăp ntŭk jŭm păng Hao tâm rdâng đah păng, Drăng nhuăl ta klơ păng; Bu nhŭp păng tâm trôm ntu.

⁹ Khân păng sŏk nglĕ nklĕ mphâk păng krŭng tâm ndrung Têk leo tât ma hađăch n'gor bri Babilôn; Khân păng nklăch păng tâm ndrung Gay mâu hôm tăng bâr păng đŏng ôh, Ta klơ yôk Israel.

¹⁰ Mê̆ may jêng nâm bu du tơm krăk ƀâu tâm mir Tăm jêh dăch n'hor dak. Âk n'gĭng play glet, Yor geh âk dak.

¹¹ Lĕ n'gĭng păng nâp ngăn, Tât jêng mâng jra ma kôranh chiă uănh. Tơm păng prêh ngăn Ta nklang tơm si pŭm. Ăp nơm saơ păng da dê, Yorlah tơm prêh, n'gĭng n'ha âk.

¹² Ƀiălah bu rôk lơi jêh yor nau ji nuih Jêh ri bu mƀăr tâm neh. Sial tă bơh lŭ nar ƀư kro jêh păng, Play păng rŭng ƀhiau. Đơ n'gĭng dŭt toyh păng lĕ kro jêh; Ŭnh sa lơi lĕ rngôch păng!

¹³ Aƀaơ ri bu tăm tay păng tâm bri rdah, Tâm neh sơh jêh ri mâu geh dak.

¹⁴ Ŭnh luh tă bơh tơm păng, Sa lĕ n'gĭng jêh ri play păng Kŏ tât mâu hôm geh n'gĭng nâp ktang đŏng, Gay ƀư mâng jra ăn ma ngih kôranh chiă uănh. Nây jêng nau mprơ rngot gay dŏng nhĭm vơl.”