Êsêkiêl 18 - Nau Brah Ndu Ngơi 2023

Moh ndơ srih mra rek ndơ nây

¹ Geh nau Brah Yêhôva lah đŏng ma gâp kơt aơ:

² “Moh nau khân may ngơi dôl ngơi tay nau hôr aơ ma bri Israel: ‘Phung mbơ̆ sa play krăk ƀâu srat Phung kon nkhơng kĭr sêk’?

³ Kôranh Brah Yêhôva lah: ‘Tĭng nâm Gâp gŭ rêh mro mrăng, khân may mâu mra dŏng nau hôr nây tâm bri Israel đŏng ôh.’

⁴ Aơ, lĕ rngôch huêng jêng ndơ Gâp; huêng mbơ̆ tâm ban ma huêng kon jêng ndơ Gâp da dê; moh huêng ƀư tih mra khĭt.

⁵ Tơlah mbu nơm rêh sŏng srăng, ƀư tĭng nau sŏng jêh ri nau di,

⁶ mâu sa ôh ndơ nhhơr ta klơ yôk mâu lah kâp gân ma phung rup brah ngih Israel; mâu ƀư bêk prêng ôh ur chiau meng păng mâu lah mâu gŭ êp ôh ma du huê bu ur dôl geh săk bu ur;

⁷ mâu tŭn jot bu ôh ƀiălah mplơ̆ sĭt ndơ nchăm ăn ma nơm geh rnon; mâu ntŭng ôh ndơ bu ƀiălah ăn piăng let ma nơm ji ngot jêh ri sâm nsoh bok ao ăn ma nơm rhôk;

⁸ mâu ăn bu manh prăk gay sa kao, mâu lah n'hao prăk sa kao ôh; rhuăt ti mâu ƀư nau djơh mhĭk ôh, ƀư nau di nơm aơ đah nơm ri;

⁹ chuat tĭng nau vay dăp Gâp, djôt prăp nau vay ƀư bơh Gâp jêh ri gŭ ngau tâm nau nanê̆ ngăn, bunuyh nây jêng sŏng srăng jêh ri n'hêl nanê̆ păng mra rêh, Kôranh Brah Yêhôva lah pônây.

¹⁰ Tơlah du huê bunuyh deh kon jêng nơm ntŭng, ƀư pling mham mâu lah ƀư du ntil nau ƀai hŏ lah jêh ta nây;

¹¹ nđâp lah mbơ̆ păng mâu ƀư ôh nau nây; ƀiălah păng sa ndơ nhhơr ta klơ yôk, ƀư bêk ur chiau meng păng;

¹² tŭn jot phung o ach mâu geh ndô ndơ, ntŭng ndơ bu, mâu mplơ̆ ôh ndơ nchăm ăn ma nơm geh rnon, kâp gân ma phung rup brah jêh ri ƀư ma nau ƀơ̆ ƀơch,

¹³ ăn manh gay sa kao jêh ri n'hao prăk sa kao, pôri du huê kon nây mra dơi rêh lĕ? Mâu, păng mâu mra rêh ôh! Yorlah păng ƀư jêh lĕ rngôch nau ƀơ̆; n'hêl nanê̆ păng mra khĭt jêh ri mham păng mra nkhŭt ta klơ păng nơm.

¹⁴ Ƀiălah tơlah bunuyh nây deh kon bu klâu jêh ri kon nây saơ lĕ rngôch nau tih mbơ̆ păng hŏ ƀư jêh pôri păng klach mâu hôm ƀư ôh nau ƀai tâm ban pônây;

¹⁵ tơlah kon nây mâu sa ndơ ƀư brah ta klơ yôk mâu lah mâu kâp gân ma rup brah ngih phung Israel; tơlah mâu ƀư prêng ma ur phung chiau meng păng;

¹⁶ mâu tŭn jot bu, mâu sŏk ndơ nchăm phung geh rnon, mâu lĕ ntŭng ndơ bu, ƀiălah ăn piăng let ma phung ji ngot jêh ri sâm nsoh bok ao ma nơm rhôk;

¹⁷ rhuăt ti mâu ƀư mhĭk ôh ma phung o ach, mâu sa kao mâu lah n'hao prăk sa kao, ƀiălah djôt prăp nau vay ƀư bơh Gâp jêh ri djôt tĭng nau vay dăp Gâp, pôri du huê kon nây mâu mra khĭt ôh yor nau djơh mhĭk mbơ̆ păng, n'hêl nanê̆ păng mra rêh.

¹⁸ Bi tơlah ma mbơ̆ păng hŏ dŏng nau ƀai tŭn jot, ntŭng ndơ oh nâu păng, jêh ri ƀư nau mâu ueh ta nklang phung ƀon lan păng, pôri mbơ̆ păng mra khĭt yor nau tih păng nơm.

¹⁹ Khân may hôm e ngơi pô aơ: ‘Mâm ƀư kon păng mâu anh nau tih mbơ̆ păng?’ Yorlah kon păng nây hŏ ƀư tĭng nau di, djôt prăp nau sŏng jêh ri ƀư tĭng lĕ rngôch nau vay dăp Gâp. N'hêl nanê̆ păng mra rêh.

²⁰ Moh huêng ƀư tih mra khĭt. Kon mâu mra anh nau tih mbơ̆ păng jêh ri mbơ̆ ăt mâu lĕ anh nau tih kon păng. Nau sŏng srăng bunuyh sŏng srăng mra dơi prăp ăn ma bunuyh sŏng srăng; nau ƀai du huê bunuyh ƀai bu mra prăp ăn ma bunuyh ƀai.

²¹ Ƀiălah tơlah bunuyh ƀai chalơi lĕ rngôch nau tih păng hŏ ƀư jêh, djôt prăp lĕ rngôch nau vay Gâp; tơlah păng ƀư nau sŏng, nau di, păng mra rêh mâu khĭt ôh.

²² Mâu geh du ntil nau tih păng hŏ ƀư mra kah gĭt tay gay ma tâm rdâng đah păng. Păng mra rêh yor nau sŏng srăng păng hŏ ƀư jêh.

²³ Kôranh Brah Yêhôva lah: ‘Di lĕ Gâp geh nau maak yor nau khĭt phung ƀai? Mâu di Gâp maak yor păng chalơi trong păng gay dơi rêh lĕ?

²⁴ Ƀiălah tơlah bunuyh sŏng srăng chalơi nau sŏng srăng păng jêh ri ƀư tih, ƀư nau ƀơ̆ ƀơch nâm bu phung ƀai hŏ ƀư, bunuyh nây dơi geh nau rêh lĕ? Mâu, mâu geh du ntil nau sŏng srăng păng hŏ ƀư dơi kah gĭt tay. Yor nau mâu răp jăp jêh ri nau tih păng hŏ ƀư yor nây păng mra khĭt.’

²⁵ Khân may lah tay pô aơ: ‘Trong Kôranh Brah mâu sŏng ôh.’ Pônây hơi ngih Israel, iăt hom: Trong Gâp mâu sŏng ôh hĕ? Mâu di trong khân may hĕ mâu sŏng ôh?

²⁶ Tơlah bunuyh sŏng srăng chalơi nau sŏng srăng păng jêh ri ƀư tih, pôri păng mra khĭt; yor nau ƀai păng hŏ ƀư jêh ri bunuyh nây mra khĭt.

²⁷ Tơlah du huê bunuyh mhĭk chalơi lĕ nau mhĭk păng hŏ ƀư jêh ri păng ƀư tĭng nau sŏng nau di pôri păng mra tâm rklaih huêng păng nơm.

²⁸ Yorlah păng gĭt mĭn rvê jêh ri chalơi lĕ rngôch nau tih păng hŏ ƀư jêh n'hêl nanê̆ păng mra rêh, mâu khĭt ôh.

²⁹ Ƀiălah ngih Israel lah: ‘Trong Kôranh Brah mâu sŏng ôh.’ Hơi ngih Israel, di lĕ trong Gâp jêng mâu sŏng ôh hĕ? Mâu di trong khân may hĕ jêng mâu sŏng ƀơh?

³⁰ Yor nây, Kôranh Brah Yêhôva lah: ‘Hơi ngih Israel, Gâp mra phat dôih khân may, ăp nơm tĭng nâm kan păng ƀư. Rmal hom jêh ri chalơi lĕ rngôch nau tih khân may! Tâm ban pônây, nau nây mâu mra jêng ndơ chêh prah ăn ma khân may.

³¹ Mƀăr ngai hom đah khân may lĕ rngôch nau tih khân may ƀư jêh. Ƀư hom ma khân may nơm nuih n'hâm mhe jêh ri huêng brah mhe! Hơi ngih Israel, mâm ƀư khân may ŭch khĭt?’

³² Kôranh Brah Yêhôva lah: ‘Ngăn yơh, Gâp mâu maak djê̆ lê̆ ôh ma nau khĭt phung mra khĭt. Pôri khân may rmal hom gay ma rêh!’”