Êsêkiêl 17 - Nau Brah Ndu Ngơi 2023

Bu tâm rmal ma hađăch Y-Sêdêkia

¹ Geh nau Brah Yêhôva lah ma gâp:

² “Hơi kon bunuyh, mbơh hom du ntil nau hôr, nkoch nau ntĭt ma ngih Israel.

³ Lah hom pô aơ: ‘Kôranh Brah Yêhôva lah: Geh du mlâm klang lêl, tĭng năr huy, rsau nting năr jong, săk bêng ma rsau âk ntil dak, tât ma n'gor bri Liban jêh ri nkê̆ch chiông tơm si sêdar.

⁴ Păng nkê̆ch n'gĭng nse prêh klơ leo tât ma du n'gor bri tăch rgâl jêh ri dơm tâm du ƀon ma phung tăch drăp.

⁵ Jêh nây, păng sŏk ntil bơh bri nây djôt tăm tâm neh ueh, dơm dăch ntŭk âk dak jêh ri tăm nâm bu tơm si yôr.

⁶ Păng chăt hon jêng du mlâm tơm krăk ƀâu pŭm ngăn, dêh dơm. Đơ n'gĭng păng hung mpeh ma klang, reh păng sŏr jru jŭr tâm dâng neh. Pônây păng jêng du tơm krăk ƀâu geh âk n'gĭng jêh ri nkeh nse.

⁷ Ƀiălah geh đŏng du mlâm klang toyh êng, geh nting năr toyh, rsau âk. Jêh ri tơm krăk ƀâu sŏr reh rlet păng nơm jêh ri n'gĭng vơr rlet ma păng gay ma păng dơi djrah dak.

⁸ Tơm krăk ƀâu dơi tăm tâm neh ueh dăch ntŭk âk dak gay ma gơnh geh n'gĭng âk play, jêh ri jêng du tơm krăk ƀâu ueh reh.’

⁹ Lah hom ma khân păng: ‘Kôranh Brah Yêhôva lah: Tơm krăk ƀâu chăt hao ueh lĕ? Klang nây mâu hĕ păng rôk lơi reh, grăch lơi play jêh ri ƀư kro lĕ ƀhiau n'ha nse păng mhe chăt lĕ? Mâu ŭch ôh geh nting tur dăng ktang, mâu lah âk bunuyh ri mơ ƀư rôk reh păng.

¹⁰ Ri tơlah păng dơi tăm, păng geh nau chăt nse lĕ? Tơlah sial puh tât ta păng, păng mâu kro lĕ rngôch lĕ? Di yơh, păng mra kro ro păng prêh jêh ta klơ mbon neh.’”

¹¹ Rnôk aơ, geh nau Brah Yêhôva lah ma gâp:

¹² “Lah hom ma ngih tâm rdâng nây pô aơ: ‘Khân may mâu gĭt nau nây mâm nau rblang?’ Đă hom ma khân păng: ‘Ri, hađăch Babilôn tât jêh ta ƀon Yêrusalem, nhŭp hađăch jêh ri lĕ rngôch phung ndrŏng djôt leo ma Babilôn ndrel ma păng.

¹³ Hađăch Babilôn hŏ săch jêh du huê bunuyh tâm noi deh ndŭl mpôl hađăch jêh ri ƀư nau tâm rnglăp đah bunuyh nây, ăn bunuyh nây ton. Hađăch nhŭp phung geh nau ktang tâm n'gor djôt leo hăn ndrel ma păng

¹⁴ gay ăn ƀon bri hađăch geh nau hươi rdja, mâu hôm n'hao đŏng ôh; ƀiălah yor djôt prăp nau tâm rnglăp nây ri mơ ƀon bri hađăch dơi hôm gŭ ƀaƀơ.

¹⁵ Ƀiălah, hađăch nây hŏ tâm rdâng đah hađăch Babilôn, mprơh nơm hăn mbơh tât ma n'gor bri Êjipt gay ma phung Êjipt ăn seh gay tâm lơh jêh ri du phung tahan âk. Păng mra dơi lĕ? Du huê bunuyh dơi klaih lĕ dôl ƀư pônây? Dơi lĕ păng chalơi rlau nau hŏ tâm rnglăp mâm dơi klaih lĕ?’

¹⁶ Kôranh Brah Yêhôva lah: ‘Tĭng nâm gâp gŭ rêh mro mrăng, hađăch nây mra khĭt ta bri Babilôn, tâm ntŭk păng hŏ njêng hađăch jêh, yorlah păng tâm rmot nau ton jêh ri chalơi rlau nau tâm rnglăp.

¹⁷ Pharaôn mâu mra djôt du phung tahan ktang jêh ri du phung tahan âk kơl tâm lơh tơlah bu njêng pôih ƀư mpêr nchueng jŭm ƀon gay nkhĭt âk bunuyh.

¹⁸ Ngăn pônây yơh, Sêdêkia tâm rmot ma nau ton, chalơi rlau nau tâm rnglăp. Yorlah păng hŏ sŏk ti ƀư nau tâm rnglăp ƀiălah ăt hôm ƀư lĕ rngôch nau nây yor ri n'hêl nanê̆ păng mâu mra klaih ôh!’

¹⁹ Yor nây, Kôranh Brah Yêhôva lah: ‘Tĭng nâm Gâp gŭ rêh mro mrăng, păng hŏ tâm rmot jêh nau ton Gâp, chalơi nau Gâp tâm rnglăp yor nây Gâp mra nkhŭt lĕ rngôch ta klơ bôk păng.

²⁰ Gâp mra drăng nhuăl Gâp ta klơ păng, jêh ri păng mra geh văk ta nhuăl Gâp. Gâp mra leo păng rlet ma Babilôn, ta nây, Gâp mra phat dôih păng ma nau tih păng mâu răp jăp đah Gâp.

²¹ Lĕ rngôch phung tahan păng nchuăt du mra chôt khĭt tâm dâng đao; phung hôm e klen mra chah-rai pru pra du tĭng lĕ rngôch rlong sial. Rnôk nây, khân may mra gĭt Gâp nơm, jêng Brah Yêhôva lah jêh pônây.’

²² Kôranh Brah Yêhôva lah: ‘Gâp nơm mra sŏk chiông tơm si sêdar prêh klơ jêh ri Gâp mra tăm. Ta ntŭk dăch dŭt n'gĭng păng, Gâp mra nkê̆ch lơi du nkeh nse jêh ri Gâp nơm mra tăm păng ta yôk dŭt prêh klơ.

²³ Nanê̆, Gâp mra tăm păng ta klơ yôk prêh Israel; păng mra chăt n'gĭng, geh play jêh ri mra jêng du tơm si sêdar ueh reh. Lĕ rngôch phung sĭm mra văch nde tâm dâng păng jêh ri lĕ rngôch ntil geh năr mra nde tâm dâng gui lĕ n'gĭng păng.

²⁴ Lĕ rngôch tơm si tâm bri mra gĭt ma Gâp, Brah Yêhôva, hŏ njŭr tơm si prêh jêh ri n'hao tơm si dêh klơ. Gâp hŏ ƀư kro lơi tơm si ndrêh jêh ri ƀư ăn tơm si lĕ kro dơi nse ueh. Gâp, Brah Yêhôva, hŏ lah jêh ri ƀư dơi jêng nau nây ro.’”