Êsêkiêl 16 - Nau Brah Ndu Ngơi 2023

Ƀon Yêrusalem nâm bu du huê ur gŭ mâu răp jăp

¹ Geh nau Brah Yêhôva ngơi ma gâp:

² “Hơi kon bunuyh, ăn phung ƀon lan Yêrusalem gĭt nau mhĭk khân păng hŏ ƀư jêh.

³ May lah hom: ‘Kôranh Brah Yêhôva lah ma ƀon Yêrusalem: Ntŭk ntơm saơm jêh ri nau deh ay jêng ta n'gor Kanaan; mbơ̆ ay jêng du huê bunuyh Amôrit, mê̆ ay jêng bunuyh Hitit.

⁴ Rnôk bu deh ay, nar ay mhe deh, klŏ ay ê hŏ bu koh, Gâp ăt mâu hŏ lĕ rao ay tâm dak kloh, mâu hŏ rao ma dak boh, mâu hŏ put ma bok.

⁵ Mâu geh ôh nơm uănh ma ay gay ŭch ƀư du ntil tâm lĕ nau kan nây ăn ay yor nuih n'hâm yô̆ ma ay, ƀiălah bu hŏ mƀăr ay ta nklang mir hŏng tâm nar bu deh ma ay yorlah bu tâm rmot ma ay.

⁶ Tơlah Gâp hăn rgăn, saơ ay mpât pung tâm mham ay nơm. Gâp lah ma ay pô aơ: “Nđâp tơlah gŭ ta nklang mham, ay rêh hom!” Nanê̆ ngăn, Gâp lah ma ay: “Nđâp tơlah gŭ ta nklang mham ay rêh hom!”

⁷ Gâp hŏ ƀư ăn ma ay ntop âk nâm bu tơm si hon tâm mir. Ay hŏ chăt jêng, văch ma toyh jêh ri jêng druh ueh ngăn. Toh ay bŭt jêh, sŏk ay lĕ jong ƀiălah ay ăt hôm e rhôk.

⁸ Tơlah Gâp hăn rgăn jêh ri uănh ma ay, saơ ay lĕ toyh, tât năm gĭt tâm rŏng jêh. Gâp sŏk ao padih nkŭm ta klơ ay gay ma ndâp nau rhôk ay. Di yơh, Gâp lĕ ton jêh ma ay, ƀư tâm rnglăp đah ay jêh ri ay jêng ndơ Gâp jêh,’ Kôranh Brah Yêhôva lah pônây.

⁹ ‘Gâp rao ay tâm dak, ƀư ăn kloh mham krêp ta klơ săk ay jêh ri mhĭng dak ƀâu kah ăn ma ay.

¹⁰ Gâp nsoh ăn ma ay ao bu cheh, ntrŭp ntô jot ntâu ma ay, vân bŭt ay ma bok mhay rhên, jêh ri mpân ay ma bok ek ndrŭng.

¹¹ Gâp sŏk ndơ nkrơ̆ ăn ay ma drăp ndơ ueh, dok rvang tâm ti ay, văn nhong tâm trô ko,

¹² nsro rgên ta trôm muh ay, mblo thek ta tôr ay, jêh ri ndô ta klơ bôk ay du mlâm đon hađăch ueh.

¹³ Tâm ban pônây, ay dơi nkrơ̆ ma mah ma prăk; kho ao ay ma bok mhay rhên, ma bok ek ndrŭng, ma ndơ bu cheh. Ay mât săk ma rnih môi, dak sŭt jêh ri dak ngi ôlive. Ay văch ma toyh ma nau ueh ngăn jêh ri nau ngơi hao kŏ tât jêng ur hađăch.

¹⁴ Nau lư n'găr ay bu rnê hâu ngăn tâm lam bri dak yor nau ueh ay jêh ri yor nau chrêk rmah Gâp ăn jêh ma ay, ƀư nau ueh ay ntop rah vah ngăn,’ Kôranh Brah Yêhôva lah pônây.

¹⁵ ‘Ƀiălah ay nsing ma nau ueh ay, nsing nau lư n'găr ay nơm gay lăp nau vay văng tĭr jêh ri ƀư nau văng tĭr ăn ma phung bu năch rgăn trong.

¹⁶ Ay sŏk kho ao ay ƀư jêng ntŭk prêh nkrơ̆ ueh gay ma ƀư nau văng tĭr ta nây. Lĕ nau tâm ban pônây tâm rnôk kăl e jêh ri pakơi aơ taơ mâu mra geh ôh.

¹⁷ Ay lĕ saơ ndơ nkrơ̆ ueh ƀư ma mah jêh ri ma prăk Gâp hŏ ăn jêh ma ay gay ƀư rup phung bu klâu, jêh nây ƀư nau văng tĭr ma khân păng.

¹⁸ Ay sŏk kho bu cheh ay nkŭm ăn ma khân păng, sŏk dak ngi ôlive jêh ri ndơ ƀâu kah Gâp mpơl tanăp khân păng.

¹⁹ Ƀănh Gâp hŏ ăn jêh ma ay, rnih môi, dak ngi ôlive jêh ri dak sŭt Gâp ăn ay sa pôri ay djôt nhhơr nâm bu n'hôl ƀâu kah ăn ma khân păng. Ngăn yơh nau nây hŏ geh jêh,’ Kôranh Brah Yêhôva lah pônây.

²⁰ ‘Ay sŏk phung kon bu klâu, phung kon bu ur ay deh ăn ma Gâp jêh djôt nhhơr ƀư mpa ƀư brah ăn ma khân păng gay ma khân păng sa rvăn lơi. Lĕ nau văng tĭr nây jêng ntil nau jê̆ lĕ?

²¹ Ay hŏ nkhĭt kon sau Gâp jêh ri njŭn ta ŭnh gay nhhơr ma khân păng.

²² Tâm lĕ nau ƀơ̆ jêh ri nau văng tĭr nây, ay mâu kah gĭt ôh ma rnôk ay hôm jê̆, dôl ay gŭ rhôk, pung tâm mham ay nơm.’

²³ Kôranh Brah Yêhôva lah: ‘Rêh ni, rêh ni ngăn ma ay! Pakơi lĕ rngôch ƀư nau ƀai nây,

²⁴ ay ndâk nơng ƀư brah jêh ri ndâk lĕ ntŭk prêh ma ay nơm tâm lĕ rngôch trong toyh.

²⁵ Ta lĕ rngôch tơm trong, ay ndâk ntŭk prêh jêh ri ƀư ƀơ̆ ma nau nkrơ̆ ueh ay, tăch săk ma bu năch rgăn trong jêh ri nau văng tĭr ay hao âk ƀaƀơ.

²⁶ Ay ƀư jêh nau văng tĭr đah phung Êjipt, jêng phung chiau meng geh săk jăn ktang, jêh ri nsônh nau ji nuih Gâp ma nau văng tĭr nar âk lơn.

²⁷ Yor ri, Gâp hŏ yơr ti Gâp tâm rdâng ma ay; ƀư n'hŭch n'har bri ay jêh ri jao ay ăn ma phung rlăng ay, jêng phung kon bu ur Philistin, jêh ri khân păng bêk prêng ma nau văng tĭr ay.

²⁸ Ay hŏ ƀư nau văng tĭr đah phung Asiri yorlah ay mâu hŏ mpay ôh. Pakơi ƀư tih văng tĭr đah khân păng, ay ê hŏ mpay ôh.

²⁹ Ay ƀư jêh nau văng tĭr ăp ntŭk kŏ tât ma Kaldê jêng n'gor blau tăch rgâl, ƀiălah ay ê hŏ mpay đŏng!’

³⁰ Kôranh Brah Yêhôva lah: ‘Mâm nuih n'hâm ay rŏng ir kơt nây! Lĕ nau ay ƀư tih lĕ rngôch nau nây jêng nau bu ur văng tĭr mâu gĭt bêk prêng

³¹ dôl ay ndâk nơng ƀư brah ta ntŭk lĕ rngôch tơm trong, ƀư ntŭk prêh klơ tâm ăp nkual toyh. Knŏng êng ay bu ur văng tĭr tăch săk mâu sŏk prăk ôh.

³² Ay jêng du huê ur văng tĭr, ŭch gŭ đah bu năch ntrok ma sai ay nơm.

³³ Lĕ rngôch phung bu ur văng tĭr dơn prăk nkhôm da dê, ƀiălah ay ăn ndơ ma lĕ rngôch tĭr ay, ndơ blŏl ăn ma khân păng gay khân păng tă bơh lam ntŭk văch tât ƀư nau văng tĭr đah ay.

³⁴ Ay hŏ ƀư rlơ̆ ma phung bu ur êng tâm nau ay ƀư văng tĭr: mâu geh nơm joi ay gay ma ƀư nau văng tĭr ôh, ƀiălah ay ăn prăk nkhôm ma bu năch đah nau bu năch mplơ̆ prăk nkhôm ma ay. Nây jêng nau rêh rlơ̆ ngăn!

³⁵ Yor nây hơi bu ur văng tĭr, iăt hom nau Brah Yêhôva lah.’

³⁶ Kôranh Brah Yêhôva lah: ‘Yorlah ay hŏ nkhŭt jêh nau ƀơ̆, mpơl nau rhôk dôl tăch săk ăn ma tĭr ay; yor lĕ rngôch rup brah ƀơ̆ ƀơch bơh ay, jêh ri mham phung kon ay hŏ nhhơr jêh ma rup brah nây,

³⁷ yor nây, aơ, Gâp mra rgum lĕ rngôch phung tĭr ay, đah phung nây ay geh nau maak, lĕ rngôch phung ay rŏng tâm ban ma lĕ rngôch phung ay tâm rmot. Gâp mra rgum khân păng tă bơh ăp ntŭk gay ma tâm rdâng đah ay, jêh ri Gâp mra mpơl nau ay rhôk ma khân păng ăn lĕ rngôch khân păng saơ.

³⁸ Gâp mra tâm rmal ay nâm bu tâm rmal ma phung bu ur ƀư tih đah sai jêh ri ƀư pling mham. Gâp mra sŏk mham nau Gâp ji nuih jêh ri ntôn grang ƀư pling mham ta klơ bôk ay.

³⁹ Gâp ăt jao ay tâm ti khân păng; khân păng mra ƀư rai lơi nơng ƀư brah jêh ri tŭn jot lĕ ntŭk prêh ay; doh lơi bok ao, ndơ ay nkrơ̆ gay ma ay gŭ săk hưl, rhôk.

⁴⁰ Khân păng mra leo du mpôl phung âk tâm rdâng đah ay, klŭp ma lŭ jêh ri ntâp ay ma đao.

⁴¹ Khân păng mra su ngih vâl ay, phat dôih ay tanăp măt âk phung bu ur. Gâp mra ƀư ma ay mâu hôm văng tĭr ôh jêh ri mâu hôm đŏng ăn prăk ma bu năch.

⁴² Nôk nây, nau ji nuih Gâp mra dŭt, nau Gâp ntôn mra du bơh ay jêh ri nau ji nuih Gâp lĕ djoh, mâu hôm ji nuih đŏng ôh.

⁴³ Yorlah ay mâu kah gĭt ôh ma rnôk ay druh mom, ƀiălah duh nuih tâm rdâng đah Gâp tâm ăp ntil kan, yor ri, di yơh, Gâp mra ƀư ăn trong ay nkhŭt ta klơ bôk ay nơm,’ Kôranh Brah Yêhôva lah pônây. Mâu di hĕ ay ntop jêh nau tih văng tĭr tâm lĕ rngôch nau Gâp tâm rmot ma ay?

⁴⁴ Bunuyh vay dŏng nau ngơi hôr mra sŏk nau ngơi nau hôr aơ gay lah ma ay: ‘Mâm me leo, phung kon pônây lĕ!’

⁴⁵ Ay jêng kon bu ur ma mê̆ ay, mê̆ ay tâm rmot ma kon ma sai; ay ăt tâm ban ma phung nur ay, jêng phung tâm rmot ma kon ma sai. Mê̆ ay jêng du huê bu ur Hitit jêh ri mbơ̆ ay jêng du huê bu klâu Amôrit.

⁴⁶ Nur ay jêng Samari ndrel ma phung kon bu ur păng gŭ mpeh pa chiau ay; oh ay jêng Sôdôm ndrel ma phung kon bu ur păng gŭ mpeh pa ma ay.

⁴⁷ Bi ay mâu knŏng chuat hăn tâm trong khân păng jêh ri hôm ƀư nau mhĭk tâm ban ma khân păng. Ay kơp nau nây jêng jê̆ lê̆ hĕ? Ay hŏ ƀư êng ma ay nơm mhĭk lơn tâm lĕ rngôch trong ay hăn.

⁴⁸ Kôranh Brah Yêhôva lah: ‘Tĭng nâm Gâp gŭ rêh mro mrăng, ƀon Sôdôm, oh ay, păng yơh jêh ri phung kon bu ur păng mâu mâp ƀư ôh nâm bu ay jêh ri phung kon bu ur ay ƀư jêh.

⁴⁹ Aơ jêng nau djơh mhĭk oh bu ur ay jêng ƀon Sôdôm: Păng jêh ri phung kon bu ur păng geh nau sưr, ndơ sông sa rlau keh, jêh ri kơr ƀlao, ƀiălah păng mâu kơl ôh phung o ach jêh ri phung mâu geh ndô ndơ.

⁵⁰ Khân păng jêng n'hao êng nơm, ƀư nau ƀơ̆ ƀơch tanăp Gâp; yor nây Gâp hŏ ƀư rai khân păng tơlah Gâp saơ nau nây.

⁵¹ Ƀon Samari mâu mâp ƀư du n'gul nau tih ay ƀư jêh. Ay ƀư jêh nau ƀơ̆ ƀơch âk lơn ma păng, jêh ri tâm rđĭl nau mhĭk ay đah oh nur ay jêng sŏng srăng lơn ma ay.

⁵² Ay phat dôih phung oh nur ay knŏng dơn nau bêk prêng ăn ma ay nơm dơm. Yorlah nau tih ay mhĭk lơn ma khân păng yor nây khân păng jêng sŏng srăng lơn ma ay. Pônây dơn hom nau tâm rmot, nau bêk prêng yor ay ƀư jêh ăn ma oh nur ay dơi kơp jêng sŏng srăng!

⁵³ Gâp mra njŭn leo phung tă bơh nau jêng bu nă ma ƀon Sôdôm jêh ri ma phung kon bu ur păng plơ̆ sĭt, njŭn leo phung tă bơh nau jêng bu nă ma ƀon Samari jêh ri phung kon bu ur păng plơ̆ sĭt, jêh ri tâm ban lĕ njŭn leo phung tă bơh jêng bu nă ay gŭ ta nklang khân păng plơ̆ sĭt đŏng,

⁵⁴ gay ma ay dơn nau djơh mhĭk, bêk prêng ma lĕ nau ay hŏ ƀư, jêh ri tâm ban pônây lĕ ay jêng du nau bonh leng ăn ma khân păng.

⁵⁵ Oh nur ay jêng ƀon Sôdôm jêh ri kon bu ur păng mra dơi nau njêng tay nâm bu kăl e; ƀon Samari ndrel ma kon bu ur păng ăt mra dơi nau njêng nâm bu kăl e, jêh ri ay ndrel ma kon bu ur ay ăt mra dơi njêng tay nâm bu kăl e.

⁵⁶ Tâm nar nau hưn, bâr mbung ay mâu nkah ôh amoh ƀon Sôdôm, oh ay.

⁵⁷ Dôl nây nau janh ƀai ay ê hŏ mpơl ôh, ay ê hŏ plơ̆ jêng du ntil nau phung tâm rmot ma kon bu ur Aram, ma lĕ rngôch phung chiau meng, jêh ri phung kon bu ur Philistin gŭ jŭm ay bu tâm rmot ma ay da dê.

⁵⁸ Ay mra dơn nau tâm rmal yor nau tih văng tĭr jêh ri nau mhĭk ay ƀư jêh,’” Brah Yêhôva lah pônây.

Nau tâm rnglăp n'ho ro

⁵⁹ Yorlah Brah Yêhôva lah pô aơ: “Ay hŏ tâm rmot jêh nau ay ton ƀư rai lơi nau tâm rnglăp Gâp, yor nây Gâp mra ƀư ma ay tâm di đah ay ƀư jêh.

⁶⁰ Nđâp tơlah pônây, ăt Gâp mra kah gĭt tay nau tâm rnglăp Gâp nơm ƀư jêh đah ay tâm rnôk ay hôm druh mom, jêh ri Gâp mra ƀư nau tâm rnglăp đah ay du nau tâm rnglăp n'ho ro.

⁶¹ Tơlah sŏk dơn phung nur ay jêh ri oh ay, ay mra kah gĭt ma trong ay hăn mra bêk prêng ngăn. Rnôk nây, Gâp mra jao khân păng ƀư kon bu ur ay ƀiălah mâu tĭng ôh nau tâm rnglăp đah ay.

⁶² Gâp mra ƀư nau tâm rnglăp Gâp đah ay, jêh ri ay mra gĭt Gâp jêng Brah Yêhôva.

⁶³ Ay mra kah gĭt ma nau bêk prêng, jêh ri yor nau bêk prêng ngăn ay mâu hôm dơi hă mbung ngơi du ntil nau đŏng ôh tơlah Gâp yô̆ an nau tih ay ƀư jêh,” Kôranh Brah Yêhôva lah pônây.