Êsêkiêl 15 - Nau Brah Ndu Ngơi 2023

Ƀon Yêrusalem nâm bu tơm krăk ƀâu mâu khlay

¹ Geh nau Brah Yêhôva ngơi ma gâp:

² “Hơi kon bunuyh, mâm rtau tơm krăk ƀâu tâm rđĭl đah tơm si êng geh nau ueh rlau lơn lĕ? Jêh ri n'gĭng rtau tơm krăk ƀâu tâm rđĭl đah tơm si tâm krŏng geh nau rlau lĕ?

³ Dơi lĕ bu sŏk tơm si păng gay ƀư du ntil ndơ? Geh mâp ƀư dŏng pâng gay yông ndô ndơ?

⁴ Mâu, bu mƀăr păng tâm ŭnh gay ƀư long, jêh ri tơlah ŭnh sa tă bơh bar đah ding chiông jêh ri ta nklang ăt ŭnh sa pôri păng hôm dơi dŏng ma du ntil ndơ lĕ?

⁵ Aơ, tơlah ŭnh ê hŏ sa păng kŏ mâu dơi dŏng ma du ntil ndơ rlau ma nĕ lah lĕ ŭnh de sa rvăn jêh ri păng lĕ lêk rai jêh, moh ndơ bu hôm dơi dŏng ƀư ma du ntil ndơ?”

⁶ Yor ri, Kôranh Brah Yêhôva lah: “Nâm bu rtau tơm krăk ƀâu ta nklang tơm si tâm krŏng Gâp sŏk ƀư long mƀăr tâm ŭnh, Gâp mra jao phung gŭ tâm ƀon Yêrusalem tâm ban pônây lĕ.

⁷ Gâp mra rle muh măt tâm rdâng đah khân păng. Khân păng mra luh tă bơh ŭnh ƀiălah ŭnh mra sa khân păng, jêh ri tơlah Gâp rle muh măt tâm rdâng đah khân păng, pôri khân may mra gĭt Gâp jêng Brah Yêhôva.

⁸ Gâp mra ƀư ăn ma bri aơ jêng rngol yorlah khân păng hŏ ƀư tih jêh đah Gâp,” Kôranh Brah Yêhôva lah pônây.