Êsêkiêl 14 - Nau Brah Ndu Ngơi 2023

Nau tâm rmal phung mbah rup brah

¹ Geh ƀaƀă kôranh bu ranh Israel văch ta gâp jêh ri gŭ panăp gâp.

² Rnôk nây geh nau Brah Yêhôva lah ma gâp:

³ “Hơi kon bunuyh, phung aơ prăp rup brah tâm nuih n'hâm jêh ri dơm nau mhĭk panăp khân păng nơm ƀư chêh prah. Di lĕ Gâp lŏ ăn khân păng ôp Gâp?

⁴ Yor ri, lah hom ma khân păng pô aơ: Brah Yêhôva Brah lah: Mbu nơm tâm ngih Israel prăp rup brah tâm nuih n'hâm păng jêh ri dơm nau mhĭk panăp măt păng nơm ƀư ăn chêh prah, jêh ri bunuyh nây văch tât mra nơm mbơh lor, pôri Gâp nơm jêng Brah Yêhôva mra plơ̆ sĭt lah ma păng yorlah rup brah păng âk ngăn ngên.

⁵ Tâm ban pônây, Gâp dơi sŏk ăn nuih n'hâm ƀon lan Israel phung nkhah du jêh tă bơh Gâp yor ma khân păng mbah rup brah.

⁶ Yor nây, lah hom ma ngih Israel pô aơ: ‘Kôranh Brah Yêhôva lah: Plơ̆ sĭt hom, chalơi rup brah khân may, rle muh măt du tă bơh lĕ nau mhĭk Gâp tâm rmot khân may.

⁷ Yorlah lĕ rngôch phung tâm ngih Israel, mâu lah bu năch gŭ njơh tâm n'gor bri Israel du ngai jêh đah Gâp prăp rup brah păng tâm nuih n'hâm jêh ri dơm nau djơh mhĭk panăp măt păng ƀư ăn chêh prah, jêh nây văch tât ma nơm mbơh lor gay ôp Gâp, Gâp nơm yơh jêng Brah Yêhôva mra plơ̆ lah ma păng.

⁸ Gâp mra tâm rdâng đah nơm nây, ƀư ma păng du nau mbên jêh ri nau hôr. Gâp mra ngroh lơi păng bơh ta nklang phung ƀon lan Gâp. Rnôk aơ, khân may mra gĭt Gâp jêng Brah Yêhôva.

⁹ Tơlah nơm mbơh lor geh nau ntrôl jêh ri ngơi du bâr, Gâp nơm yơh, Brah Yêhôva, mra ăn bu ntrôl nơm mbơh lor nây jêh ri Gâp mra yơr ti tâm rdâng đah păng, jêh ri ƀư rai lơi păng bơh ta phung ƀon lan Gâp Israel.

¹⁰ Lĕ bar mra dơn nau tâm rmal; nau tâm rmal prăp ma nơm mbơh lor jêh ri nau tâm rmal prăp ma nơm joi ôp jêng tâm ban da dê.

¹¹ Yor ma nây, ngih Israel mâu hôm nkhah du đah Gâp đŏng jêh ri mâu lĕ hôm ƀư ƀơ̆ ma khân păng nơm đŏng ôh ma lĕ rngôch nau ƀư tih, ƀiălah khân păng mra ƀư jêng phung ƀon lan Gâp jêh ri Gâp ƀư Brah Ndu khân păng, Kôranh Brah Yêhôva lah pônây.’”

¹² Geh nau Brah Yêhôva lah ma gâp:

¹³ “Hơi kon bunuyh, moh bri dak mâu ƀư răp jăp ôh jêh ri ƀư tih tâm rdâng đah Gâp, jêh ri Gâp mra yơr ti tâm rdâng đah păng, mâu hôm ăn ndơ sông sa păng, ăn nau sât ji ngot jêh ri nkhĭt lĕ bunuyh ndrel mpô mpa bri tâm bri nây,

¹⁴ nđâp lah tâm bri nây geh pe nuyh aơ jêng Y-Nôê, Y-Daniel jêh ri Y-Yôp, khân păng dơi tâm rklaih knŏng huêng khân păng nơm yor nau sŏng srăng khân păng, Brah Yêhôva lah pônây.

¹⁵ Tơlah Gâp ăn mpa bri janh hăn ăp ntŭk ƀư rai lơi jêh ri ƀư ăn ma bri nây jêng rngol, kŏ tât mâu hôm geh bunuyh hăn prot yorlah klach mpô mpa nây;

¹⁶ jêh ri tơlah tâm n'gor bri geh pe bunuyh nây, Kôranh Brah Yêhôva lah, ngăn nâm bu Gâp gŭ rêh mro mrăng, khân păng ăt mâu dơi tâm rklaih ôh kon bu ur mâu lah kon bu klâu khân păng ƀiălah khân păng knŏng dơi tâm rklaih êng săk khân păng nơm yơh, bi ma bri mra jêng rngol.

¹⁷ Mâu lah tơlah Gâp ăn đao văch tât ta bri nây, jêh ri lah: ‘Đao mra rgăn ta bri nây jêh ri Gâp mra ƀư rai lơi bunuyh jêh ri mpô mpa tâm nây,’

¹⁸ nđâp lah tâm n'gor nây geh pe bunuyh nây, Kôranh Brah Yêhôva lah, ngăn nâm bu Gâp gŭ rêh mro mrăng, khân păng ăt mâu dơi tâm rklaih ôh kon bu ur mâu lah kon bu klâu khân păng, ƀiălah knŏng dơi rklaih êng săk khân păng nơm dơm.

¹⁹ Mâu lah tơlah Gâp njuăl nau ji tưp tât tâm bri nây, tơlah Gâp nkhŭt nau ji nuih ƀư pling mham, nkhĭt lơi lĕ rngôch bunuyh jêh ri mpô mpa tâm bri bơh păng

²⁰ nđâp lah geh Y-Nôê, Y-Daniel jêh ri Y-Yôp gŭ tâm bri nây, Kôranh Brah Yêhôva lah, ngăn nâm bu Gâp gŭ rêh mro mrăng, khân păng tâm ban lĕ mâu dơi tâm rklaih ôh du huê kon bu ur mâu lah kon bu klâu khân păng, ƀiălah knŏng dơi tâm rklaih nau rêh khân păng nơm yor nau sŏng srăng khân păng dơm.

²¹ Pônây Kôranh Brah Yêhôva lah: ‘Gâp sŏk puăn ntil nau tâm rmal jru rlau lơn ma nây jêng gưm đao, nau sa sât ji ngot, mpô mpa bri janh jêh ri nau ji tưp nkhĭt ăn ma ƀon Yêrusalem gay ƀư rai lơi bunuyh jêh ri mpô mpa tâm bri tâm nây.

²² Ƀiălah, aơ, phung hôm klen, nđâp ma phung kon bu ur, kon bu klâu, mra dơi djôt leo bơh tâm n'gor jêh ri khân păng mra hăn tât ma khân may. Jêh ri khân may mra saơ trong jêh ri nau khân păng ƀư pôri khân may mra bonh leng êng ma khân may ma nau mhĭk Gâp ăn jêh ta ƀon Yêrusalem, nây jêng ăp ntil ndơ Gâp hŏ ăn jêh ta păng.

²³ Di ngăn yơh, khân păng mra ƀư ăn ma khân may geh nau bonh leng tơlah khân may saơ trong jêh ri nau kan khân păng ƀư, jêh ri khân may mra gĭt Gâp mâu ƀư ôh lĕ rngôch nau nây tâm ƀon Yêrusalem tơlah mâu geh nau,’” Brah Yêhôva lah pônây.