Êsêkiêl 13 - Nau Brah Ndu Ngơi 2023

Phung nơm mbơh lor nklă

¹ Geh nau Brah Yêhôva lah ma gâp:

² “Hơi kon bunuyh, mbơh lor hom nau tâm rdâng đah phung nơm mbơh lor Israel jêng phung dôl mbơh lor, jêh ri lah hom ma phung mbơh lor tĭng nâm khân păng mĭn pô aơ: ‘Iăt hom nau Brah Yêhôva ngơi!’

³ Kôranh Brah Yêhôva lah: ‘Rêh ni ngăn ma phung nơm mbơh lor rluk tĭng brah êng khân păng nơm jêh ri mâu saơ du ntil ndơ ôh!

⁴ Hơi phung Israel, phung nơm mbơh lor khân may jêng nâm bu phung mpik tâm ntŭk rngot njăp!

⁵ Phung khân may ê hŏ hăn hao ôh lĕ ntŭk pêch đang jêh ri nkra tay mpêr ƀon ma ngih Israel gay dơi nâp dâk tâm lơh tâm nar Brah Yêhôva.

⁶ Khân păng hŏ saơ jêh nau dơm dam jêh ri ƀư nau ƀŭk rƀên mƀruh. Khân păng lah pô aơ: “Brah Yêhôva lah”, ƀiălah Brah Yêhôva mâu mâp prơh khân păng hăn ôh, pôri khân păng ŭch ma Păng ƀư ăn nau khân păng ngơi jêng nau tât ngăn.

⁷ Mâu di hĕ khân may hŏ saơ jêh nau tâm saơ dơm dam jêh ri nau ƀŭk rƀên mƀruh tơlah khân may lah pô aơ: “Brah Yêhôva lah”, mâm di lĕ Gâp mâu mâp lah?’

⁸ Yor ri, Kôranh Brah Yêhôva lah: ‘Yorlah khân may ngơi lĕ nau dơm dam, saơ jêh nau mƀruh yor nây Gâp tâm rdâng đah khân may,’ Kôranh Brah Yêhôva lah pônây.

⁹ Ti Gâp mra tâm rdâng đah phung nơm mbơh lor tâm saơ dơm dam, nau ƀŭk rƀên mƀruh. Khân păng mâu mra gŭ ôh tâm nau phung ƀon lan Gâp tâm rƀŭn đŏng ôh, mâu geh nchih tâm ndrom samƀŭt ngih Israel đŏng ôh, jêh ri mâu chuat lăp tâm bri Israel. Rnôk nây, khân may mra gĭt Gâp jêng Kôranh Brah Yêhôva.

¹⁰ N'hêl nanê̆ ngăn, yorlah khân păng ndơm phung ƀon lan Gâp, lah pô aơ: ‘Đăp mpăn’, ƀiălah mâu geh nau đăp mpăn ôh. Tơlah geh bunuyh ndâk mpêr, pôri, khân păng mhĭng ma klo nglang!

¹¹ Lah hom ma phung mhĭng klo nglang mpêr nây mra rlâm. Dak mih toyh mra tât. Hơi dak mih pler toyh, may mra tŭp jêh ri phŭt chuănh ktang mra hêk sat mpêr nây!

¹² Tơlah mpêr klưh rlâm, mâu di hĕ bu mra ôp khân may pô aơ: ‘Abaơ ntŭk êp gŭ klo khân may hŏ mhĭng jêh ta klơ mpêr?’

¹³ Yor nây Kôranh Brah Yêhôva lah: ‘Tâm nau ji nuih, Gâp mra ƀư phŭt sial hêk sat păng; tâm nau ji nuih, Gâp mra prơh dak mih tât; jêh ri tâm nau ji nuih ngăn, Gâp ăn dak mih tŭp pler toyh ƀư rai păng.

¹⁴ Gâp mra ƀư rlâm lơi mpêr khân may lĕ mhĭng ma klo nglang, ntrŭnh păng êp kêng neh, kŏ tât rlơk knŏng hôm mpơl mbon mpêr. Tơlah mpêr lĕ rlâm, bu mra ƀư rai khân may ta nây jêh ri khân may mra gĭt Gâp jêng Brah Yêhôva.

¹⁵ Gâp mra nkhŭt nau ji nuih ta klơ mpêr jêh ri ma phung mhĭng klo nglang ta klơ păng. Gâp mra lah ma khân may pô aơ: “Mâu hôm geh mpêr ôh, phung mhĭng klo nglang tâm ban lĕ.

¹⁶ Khân păng jêng phung nơm mbơh lor Israel mbơh lor lah ma Yêrusalem jêh ri uănh nau tâm saơ đăp mpăn ma ƀon nây ƀiălah mâu geh nau nđăp mpăn ôh, Kôranh Brah Yêhôva lah pônây.”’

¹⁷ Hơi kon bunuyh, rle muh măt may mpeh ma phung kon bu ur ƀon lan may, jêng phung mbơh lor tĭng nâm nau khân păng nơm mĭn, jêh ri may mbơh lor hom nau tâm rdâng đah khân păng.

¹⁸ Đă hom khân păng pô aơ: ‘Kôranh Brah Yêhôva lah: Rêh ni ngăn ma phung bu ur jĭm bok rƀên dok ta ti jêh ri tĭng kơt jong gleh dŏng ƀư bok nkŭm bôk âk ntil gay nchron nhŭp huêng bunuyh. Khân may mra joi nhŭp huêng bunuyh phung ƀon lan Gâp gay ma king n'gang huêng khân may nơm lĕ?

¹⁹ Khân may ƀư bêk jêh Gâp ta nklang phung ƀon lan Gâp yor lĕ mbăt ba ôrgơ jêh ri lĕ rlat piăng let. Khân may ndơm phung ƀon lan Gâp jêng phung ŭch iăt lĕ nau mƀruh nây gay ŭch nkhĭt bunuyh mâu khư đah nau khĭt ôh jêh ri om rêh phung mâu khư ma nau rêh ôh.’

²⁰ Yor nây, Kôranh Brah Yêhôva lah: ‘Aơ Gâp tâm rmot ma lĕ bok rƀên khân may ma ndơ nây khân may dŏng gay nchron nhŭp huêng bunuyh nâm bu sân dăk sĭm. Gâp mra rhuăt lơi luh tă bơh ti khân may jêh ri mƀơk lơi huêng phung khân may nhŭp jêh nâm bu sĭm nây.

²¹ Gâp mra khêk đŏng bok khân may jêh ri rklaih phung ƀon lan Gâp tă bơh ti khân may. Khân păng mâu mra gŭ tâm ti khân may tâm ban ndơ sa đŏng ôh. Rnôk nây, khân may mra gĭt Gâp jêng Brah Yêhôva.

²² Yorlah khân may sŏk nau nchơt mƀruh ƀư rngot nuih n'hâm phung sŏng srăng nđâp lah Gâp mâu mâp ƀư rdja nuih khân păng ôh. Ƀiălah khân may ƀư ma ti phung ƀai ktang lơn gay ma khân păng mâu chalơi ôh bơh trong nau mhĭk păng gay dơi geh nau rêh.

²³ Khân may mâu mra hôm saơ ôh nau tâm saơ ndơm jêh ri mâu lĕ ƀư đŏng nau rƀên. Gâp mra tâm rklaih phung ƀon lan Gâp klaih bơh ti khân may jêh ri rnôk aơ khân may mra gĭt Gâp jêng Brah Yêhôva.’”