Êsêkiêl 12 - Nau Brah Ndu Ngơi 2023

Lĕ nau mbên ma nau hăn jêng bu nă

¹ Nau Brah Yêhôva lah đŏng ma gâp:

² “Hơi kon bunuyh, may gŭ ta nklang phung ƀư nau tâm rdâng. Khân păng geh trôm măt gay ma saơ ƀiălah mâu saơ ôh, geh tôr gay ma tăng ƀiălah mâu ŭch iăt ôh, yorlah khân păng jêng ngih tâm rdâng.

³ Pônây hơi kon bunuyh, ndrăp hom ndô ndơ may djôt leo du hăn jêng bu nă jêh ri du trơn nôk nar tanăp măt khân păng. Ƀư hom nâm ƀư bu nă, hăn tă bơh ntŭk may gŭ tât du ntŭk êng tanăp măt khân păng. Ndâp tơlah khân păng jêng ngih tâm rdâng kđôi, ƀiălah gĭt khân păng mra mĭn tay.

⁴ Ăn may mra djôt leo ndô ndơ may nâm bu ndô ndơ phung jêng bu nă panăp măt khân păng dôl nôk nar. Jêh nây kêng mhaơ, may yơh mra hăn du nâm bu du huê bunuyh ƀư bu nă tanăp măt khân păng.

⁵ May lôk du mlâm trôm tâm mpêr tanăp măt khân păng, jêh nây tă tâm trôm nây may djôt leo ndô ndơ luh padih.

⁶ Tanăp măt khân păng, may ăn ndô ndơ klơ săng nglik jêh ri djôt leo hăn dôl bri măng. May nkŭm lơi muh măt gay lơi hôm may saơ ôh n'gor bri aơ; yorlah Gâp hŏ njêng may ƀư du nau mbên ma ngih Israel.”

⁷ Gâp ƀư tĭng nau Kôranh Brah hŏ ntĭnh jêh. Gâp djôt leo ndô ndơ gâp nâm bu ndô ndơ bunuyh ƀư bu nă hăn dôl nôk nar, jêh ri tât kêng mhaơ ma ti gâp nơm lôk êng du trôm tâm mpêr. Gâp mbăk ta klơ săng nglik jêh ri hăn du tâm bri măng tanăp măt khân păng.

⁸ Ang ôi taơ, geh nau Brah Yêhôva lah ma gâp pô aơ:

⁹ “Hơi kon bunuyh, mâu di ngih Israel jêng ngih tâm rdâng mra ôp ma may pô aơ: ‘Moh ndơ may ƀư nây’ mâm ƀư?

¹⁰ Plơ̆ lah hom ma khân păng: ‘Kôranh Brah Yêhôva lah: Nau mbơh aơ di ma hađăch ƀon Yêrusalem jêh ri ma lĕ rngôch ngih Israel gŭ tâm ƀon nây.’

¹¹ May lah hom: ‘Gâp jêng nau mbên ma khân may. Khân păng mra mâp nau nâm bu gâp hŏ ƀư jêh; khân păng mra hăn jêng bu nă jêh ri bu krŭng.’

¹² Hađăch tă bơh nklang khân păng mra mbăk ndô ndơ klơ săng nglik păng du luh dôl bri măng. Khân păng mra lôk trôm ta mpêr gay djôt ndơ du luh padih; hađăch mra put muh măt yor măt hađăch mâu dơi saơ ôh bri aơ.

¹³ Gâp mra nthăng jal ta klơ hađăch, jêh ri păng mra geh tâm dăk Gâp. Gâp mra njŭn leo hađăch ma Babilôn jêng bri phung Kaldê. Ƀiălah păng mâu mra saơ bri nây ôh nđâp lah mra khĭt ta nây.

¹⁴ Phung gŭ jŭm hađăch gay kơl păng jêh ri phung tahan gâp mra ƀư chah rai pru pra tĭng phŭt sial jêh ri Gâp mra tŏk đao tĭng khân păng.

¹⁵ Dôl Gâp ƀư chah rai ăn khân păng nhhơt tâm phung mpôl băl bunuyh jêh ri srih khân păng tâm ăp bri dak khân păng mra gĭt Gâp jêng Brah Yêhôva.

¹⁶ Nđâp tơlah, Gâp mra om lơi ƀaƀă tâm phung khân păng klaih tă bơh tak đao, nau sa sât ji ngot, nau ji tưp nkhĭt gay ma khân păng dơi mbơh tay lĕ nau ƀơ̆ ƀơch khân păng ăn ma phung mpôl băl bunuyh khân păng mra hăn gŭ, jêh ri khân păng mra dơi gĭt Gâp jêng Brah Yêhôva.”

¹⁷ Brah Yêhôva lah đŏng ma gâp:

¹⁸ “Hơi kon bunuyh, sa hom piăng let tâm nau râm nsâr, nhêt hom dak tâm nau rŭng răng, nau klach.

¹⁹ May mbơh hom ma ƀon lan tâm n'gor pô aơ: ‘Aơ jêng nau Brah Yêhôva lah ma phung gŭ tâm ƀon Yêrusalem, jêh ri tâm bri Israel: Khân păng sa piăng let khân păng ma nau klach jêh ri nhêt dak tâm nau klach krit, yorlah bri aơ geh ndơ sông sa mra jêng rngot njăp yor nau ƀai lĕ rngôch phung gŭ ta nây.

²⁰ Ƀon toyh geh âk bunuyh gŭ mra jêng rai, bri dak mra jêng rngol jêh ri khân may mra gĭt Gâp jêng Brah Yêhôva.’”

²¹ Geh nau Brah Yêhôva lah đŏng ma gâp:

²² “Hơi kon bunuyh, geh du nau hôr ma khân may tâm n'gor bri Israel pô aơ: ‘Nar khay jêng jŏ jong, lĕ rngôch nau tâm saơ mpơl mâu geh tâm di ôh.’ Mâm bu rblang nau nây?

²³ Yor nây, mbơh hom ma khân păng: ‘Kôranh Brah Yêhôva lah: Gâp mra ƀư ăn lôch nau hôr nây, bu mâu mra dŏng păng đŏng ôh ƀư du nau hôr tâm bri Israel.’ Ƀiălah ngơi hom ma khân păng pô aơ: ‘Lĕ nar dăch tât jêh, lĕ nau tâm saơ mra jêng n'hêl nanê̆ ngăn!’

²⁴ Yorlah mâu mra hôm geh đŏng ôh du nau tâm saơ dơm dam mâu lah gru rƀên nau mâu di đŏng ôh tâm ngih Israel.

²⁵ Yorlah Gâp jêng Brah Yêhôva, Gâp mra lah jêh ri nau Gâp lah mra jêng nau ngăn, mâu mra jŏ đŏng ôh. Hơi ngih phung dăng tâm rdâng! Tâm nar khân may nơm Gâp mra mbơh lor jêh ri păng mra jêng nau ngăn, Kôranh Brah Yêhôva lah pônây.”

²⁶ Geh nau Brah Yêhôva lah đŏng ma gâp:

²⁷ “Hơi kon bunuyh, ngih Israel lah pô aơ: ‘Nau păng tâm saơ hôm jŏ ri mơ mra jêng nau ngăn jêh ri nau păng mbơh lor ma du nar kăndơ̆ hôm ngai ngăn.’

²⁸ Pôri, lah hom ma khân păng: ‘Kôranh Brah Yêhôva lah: Mâu geh du rplay ngơi Gâp mra jŏ ôh ƀiălah nau Gâp lah mra tât ngăn, Yêhôva Brah Ndu lah.’”