Êsêkiêl 11 - Nau Brah Ndu Ngơi 2023

Kôranh Brah phat dôih phung kôranh chiă uănh Israel

¹ Huêng Brah chông gâp leo klơ jêh ri njŭn tât mpông pêr Pa lơ ngih Brah Yêhôva mpeh luh nar. Aơ, ntŭk lăp mpông pêr, gâp saơ geh bar jât ma prăm nuyh, tâm nây geh Y-Jasania, kon bu klâu Y-Asur, jêh ri Y-Pêlatia, kon bu klâu Y-Bênaya, jêng phung kôranh chiă uănh ƀon lan da dê.

² Păng lah ma gâp: “Hơi kon bunuyh, nây jêng phung bu klâu ŭch mĭn ƀư nau kue, ndâk njêng nau mhĭk tâm ƀon aơ.

³ Khân păng lah: ‘Aƀaơ ri ê-tât ôh rnôk ndâk ngih! Ƀon aơ jêng glah ƀŭng, he jêng nglay puăch.’

⁴ Yor ri, mbơh lor hom nau tâm rdâng đah khân păng. Hơi kon bunuyh, mbơh lor hom!”

⁵ Huêng Brah Yêhôva jŭr ta gâp jêh ri lah: “Lah hom! Aơ jêng nau Brah Yêhôva lah: ‘Hơi ngih Israel! Khân may hŏ ngơi jêh tâm ban pônây yorlah Gâp gĭt lĕ nau tât tâm nau mĭn khân may.

⁶ Khân may hŏ nkhĭt âk râk ngăn bunuyh tâm ƀon aơ jêh ri ƀư bêng ma bunuyh khĭt tâm lam ăp trong sâng.’

⁷ Yor nây, Yêhôva Brah Ndu lah: ‘Đơ bunuyh khĭt khân may hŏ dơm jêh ta nklang ƀon aơ jêng puăch, ƀon jêng glah ƀŭng, bi khân may gâp mra mprơh du luh tă bơh ƀon aơ.

⁸ Khân may klach ma đao ƀiălah Gâp mra ăn đao tât ma khân may, Yêhôva Brah Ndu lah pônây.

⁹ Gâp mra ngluh khân may tă bơh ƀon aơ jêh ri jao khân may tâm ti phung bu năch gay ma tâm rmal khân may.

¹⁰ Khân may mra cha lôt yor ma đao; Gâp mra tâm rmal khân may ta n'har bri Israel, jêh ri khân may mra gĭt Gâp jêng Brah Yêhôva.

¹¹ Ƀon aơ mâu mra jêng glah ƀŭng ma khân may ôh, mâu lĕ khân may mra jêng puăch tâm glah ƀŭng; Gâp mra tâm rmal khân may ta n'har bri Israel.

¹² Rnôk nây, khân may mra gĭt Gâp jêng Brah Yêhôva, yorlah khân may mâu chuat tĭng ndô̆ ôh nau vay Gâp dăp, mâu lĕ ŭch tông ma nau vay ƀư bơh Gâp, ƀiălah ƀư tĭng nkhơng nau vay phung mpôl băl bunuyh gŭ jŭm khân may.’”

¹³ Dôl Gâp gŭ mbơh lor, Y-Pêlatia kon bu klâu Y-Bênaya, khĭt. Gâp păn muh măt jêh ri nter ma bâr huy lah pô aơ: “Ơ Yêhôva Brah Ndu! May mra ƀư rai ngăn lĕ phung Israel hôm e klen aơ?”

¹⁴ Geh nau Yêhôva ngơi ma gâp:

¹⁵ “Hơi kon bunuyh, phung gŭ tâm ƀon Yêrusalem hŏ ngơi ma phung oh nâu may nơm, jêng phung ndŭl mpôl may jêh ri lĕ rngôch bunuyh phung ngih Israel, pô aơ: ‘Du ngai hom bơh Brah Yêhôva; bri aơ hŏ ăn jêh ma phung hên ƀư jêng drăp ndơn.’

¹⁶ Yor nây, lah hom ma khân păng: ‘Kôranh Brah Yêhôva lah: Nđâp tơlah Gâp hŏ mprơh jêh khân păng ngai ta nklang phung băl mpôl bunuyh êng, hŏ ƀư chah rai khân păng tâm âk bri dak, Gâp ăt jêng ntŭk kloh ueh ma khân păng tâm du năng nar ta lĕ bri dak khân păng hăn tât.’

¹⁷ Yor nây lah hom: ‘Kôranh Brah Yêhôva lah: Gâp mra tâm rgum khân may tă bơh ƀon lan lĕ mpôl bunuyh, mra sŏk sĭt khân may tă bơh bri dak khân may pru pra jêh, jêh ri Gâp mra plơ̆ ăn ma khân may n'gor bri Israel.

¹⁸ Khân păng mra tât ta nây jêh ri mra mƀăr lơi lĕ rngôch ntil ndơ mhĭk ƀơ̆ ƀơch jêh ri ndơ Gâp tâm rmot du bơh ntŭk nây.

¹⁹ Gâp mra ăn ma khân păng nuih n'hâm mhe, dơm tâm khân păng nau mĭn mhe, sŏk lơi nuih n'hâm ma lŭ luh bơh nglay săk khân păng jêh ri ăn ma khân păng nuih n'hâm ma puăch

²⁰ gay khân păng mra hăn tĭng nau vay dăp Gâp, tông prăp jêh ri ƀư tĭng nau vay ƀư bơh Gâp. Khân păng mra jêng ƀon lan Gâp jêh ri Gâp mra jêng Brah Ndu ma khân păng.

²¹ Ƀiălah phung geh nuih n'hâm ŭch ma lĕ ndơ tâm rmot jêh ri ƀơ̆ ƀơch Gâp mra ƀư ma trong khân păng nkhŭt tay ta klơ bôk khân păng nơm,’ Yêhôva Brah Ndu lah pônây.”

²² Rnôk nây phung chêrubim lĭ nting năr ndrel ma lĕ jâng ndeh ta meng khân păng, jêh ri nau chrêk rmah Brah Ndu Israel gŭ ta klơ khân păng.

²³ Nau chrêk rmah Brah Ndu hao rlet klơ tă bơh nklang ƀon jêh ri gŭ ta klơ yôk mpeh luh nar ƀon.

²⁴ Huêng Brah chông gâp leo klơ jêh ri ma nau tâm saơ, Huêng Brah, Brah Ndu dơi njŭn gâp lăp n'gor bri Kaldê, tât ma phung bu mprơh du jêng bu nă. Jêh ri nau tâm mpơl gâp hŏ saơ du jêh bơh gâp.

²⁵ Rnôk nây gâp nkoch tay ma phung bu mprơh du jêng bu nă lĕ rngôch nau Brah Yêhôva mpơl jêh ma gâp.