Êsêkiêl 10 - Nau Brah Ndu Ngơi 2023

Nau chrêk rmah Brah Ndu du luh bơh ngih brah

¹ Gâp uănh jêh ri saơ đôr trôk ta klơ bôk chêrubim geh ndơ nâm bu du mlâm sưng hađăch ma lŭ chrêk saphir.

² Păng lah ma bunuyh nsoh ao bok mhay pô aơ: “Lăp hom ta nklang lĕ jâng ndeh gŭ rvah tâm dâng phung Chêrub. Sŏk hom ŭnh rnga tă bơh phung chêrubim ăn bêng lĕ bar ti may jêh ri srih ndơ nây ta klơ ƀon aơ.” Bunuyh nây lăp ntŭk nây tanăp măt gâp.

³ Tơlah bunuyh nây hăn lăp phung chêrubim dâk pa ma ngih brah, jêh ri ndâr tŭk nkŭm bêng tâm nkual nhuang ta trôm.

⁴ Nau chrêk rmah Brah Yêhôva hao du klơ tă bơh chêrub jêh ri dâk ta ntŭk kađar lăp mpông sâng ngih brah. Ngih brah bêng ndâr tŭk jêh ri tâm nkual nhuang bêng nau chrat ang chrêk ma lơp Brah Yêhôva.

⁵ Nteh rpuh nting năr chêrubim bu tăng kŏ tât ta nkual nhuang padih nâm bu bâr Brah Ndu Geh Lĕ Nau Brah tơlah Păng lah.

⁶ Dôl Brah Yêhôva hŏ ntăm ma bu klâu nsoh ao bok mhay pô aơ: “Sŏk hom ŭnh tă bơh nklang lĕ jâng ndeh gŭ rvah, bơh nklang phung chêrubim”, bunuyh nây hăn lăp jêh ri dâk ta meng du mlâm jâng ndeh.

⁷ Jêh nây du huê chêrub yơr ti sŏk ŭnh tă ta nklang phung chêrubim jêh ri djôt leo dơm ta ti bunuyh nsoh ao bok mhay. Bunuyh aơ sŏk dơn jêh nây luh du hăn.

⁸ Tâm dâng nting năr phung chêrubim geh rup du mpang ti bunuyh.

⁹ Gâp uănh jêh ri saơ geh puăn mlâm jâng ndeh ta meng phung chêrubim, ăp jâng ndeh ta meng du mlâm chêrub, jêh ri rup lĕ jâng ndeh nây nâm bu lŭ khlay bêril.

¹⁰ Bi ma rup, lĕ puăn jâng ndeh tâm ban da dê, ăp mlâm nâm bu jâng ndeh gŭ tâm trôm jâng ndeh êng ri.

¹¹ Dôl hăn, khân păng hăn tĭng puăn mpeh, mâu n'gĭl pa ma, pa chiau; tĭng nâm ntŭk rlet mpeh jâng ndeh panăp hăn, khâng păng tĭng rlet mpeh đah nây, dôl khân păng hăn mâu n'gĭl pa chiau pa ma ôh.

¹² Lam săk jăn phung chêrubim, nđâp ma ndŭr kơi, ti, nting năr, jâng ndeh bêng ma trôm măt da dê gŭ jŭm. Lĕ rngôch puăn jâng ndeh tâm ban pônây da dê.

¹³ Rnôk nây, gâp tăng bu ntơ lĕ jâng ndeh nây jêng, “lĕ jâng ndeh rvah ndăch.”

¹⁴ Ăp chêrub geh puăn muh măt: măt rơh nguay jêng muh măt Chêrub; muh măt rơh bar jêng muh măt bunuyh; muh măt rơh pe jêng muh măt yau mŭr; muh măt rơh puăn jêng muh măt klang lêl.

¹⁵ Rnôk nây, phung chêrubim hao klơ: Aơ jêng lĕ mpa rêh gâp hŏ saơ jêh ta kơh dak krong Kêbar.

¹⁶ Tơlah phung chêrubim hăn lĕ jâng ndeh hăn ta meng; tơlah phung chêrubim lĭ nting năr gay hao klơ tă bơh neh pôri lĕ jâng ndeh hôm gŭ ta meng khân păng.

¹⁷ Tơlah phung chêrubim nsrŭng lĕ jâng ndeh nsrŭng đŏng tâm ban lĕ; jêh ri tơlah phung chêrubim hao khân păng ăt hao đŏng yorlah huêng brah lĕ mpa rêh nây gŭ tâm lĕ jâng ndeh nây.

¹⁸ Rnôk nây nau chrêk rmah Brah Yêhôva luh tă bơh kađar lăp mpông sâng ngih brah jêh ri gŭ ta klơ phung chêrubim.

¹⁹ Phung chêrubim lĭ nting năr hao du luh tă bơh neh tanăp măt gâp dôl khân păng hăn ndrel ma lĕ jâng ndeh êp meng. Khân păng hăn gŭ ntŭk lăp mpông pêr mpeh luh nar ngih Brah Yêhôva, jêh ri nau chrêk rmah Brah Ndu Israel gŭ ta klơ khân păng.

²⁰ Nây jêng lĕ mpa rêh gâp saơ jêh gŭ tâm dâng Brah Ndu Israel ta kơh dak krong Kêbar, jêh ri gâp gĭt khân păng jêng phung chêrubim.

²¹ Ăp chêrub geh puăn muh măt jêh ri puăn nting năr; tâm dâng nting năr geh rup nâm bu ti bunuyh.

²² Rup muh măt khân păng nâm bu muh măt gâp saơ lĕ rup jêh ri khân păng nơm, ta kơh dak krong Kêbar. Ăp mpa rêh hăn sŏng rlet panăp da dê.