Êsêkiêl 1 - Nau Brah Ndu Ngơi 2023

Nau mbơh lor ma phung ƀon lan Israel ( 1:1 – 24:27 ) Y-Êsêkiêl tâm saơ

¹ Năm rơh pe jât, năng prăm ta khay puăn, dôl gâp gŭ ta nklang phung bu nă, gŭ ta kơh dak krong Kêbar, lĕ ndâr trôk pơk jêh ri gâp geh nau tâm saơ Brah Ndu mpơl ma gâp.

² Ta năng prăm khay nây — jêng năm rơh prăm pakơi bu mprơh Hađăch Jêhôjakin jêng bu nă —

³ geh nau Brah Yêhôva lah êng ma kôranh ƀư brah Y-Êsêkiêl, kon bu klâu Y-Busi, tâm n'gor Kaldê, ta kơh krong Kêbar. Ta ntŭk nây, ti Brah Yêhôva dơm ta păng.

⁴ Ri gâp saơ geh phŭt văch tât tă bơh mpeh pa lơ khôm tât, geh du ndâr tŭk toyh put ŭnh hit sol ang văr jŭm păng, jêh ri tă bơh tâm nklang ŭnh nây geh ndơ n'gă ang nâm bu kông nchrat lơp lam trôk.

⁵ Tă bơh tâm nklang păng, geh ndơ nâm bu puăn mlâm mpa rêh, rup nâm bu kơt aơ: khân păng tâm ban rup bunuyh,

⁶ ƀiălah ăp mpa rêh geh puăn măt jêh ri puăn nting năr.

⁷ Jâng khân păng sŏng, mpang jâng nâm bu mpang jâng ndrôk kon nkuăng nchrat ang nâm bu kông chrêk.

⁸ Tâm dâng nting năr khân păng, puăn njônh geh ti bunuyh da dê. Puăn mlâm mpa nây geh muh măt jêh ri geh nting năr kơt aơ:

⁹ nting năr khân păng tâm rđĭl; lah khân păng hăn mâu rle n'gĭl ôh ƀiălah ăp mlâm ăt hăn sŏng rlet panăp.

¹⁰ Bi ma muh măt khân păng, ăp puăn mlâm geh muh măt bunuyh da dê; puăn mlâm geh muh măt yau mŭr da dê mpeh pa ma; puăn mlâm geh muh măt ndrôk da dê mpeh pa chiau jêh ri puăn mlâm geh muh măt klang lêl da dê.

¹¹ Nây jêng măt khân păng. Bi ma ntĭng năr khân păng dĭ rlet hao prêh; ăp mlâm geh bar plơp nting năr tâm rđĭl jêh ri geh bar plơp nting năr nkŭm săk khân păng.

¹² Ăp mlâm hăn sŏng panăp; ta ntŭk huêng brah đă hăn khân păng hăn ta nây, dôl hăn mâu rle n'gĭl ôh.

¹³ Rup săk jăn mpô mpa nây tâm ban ma rup rnga ŭnh dôl hit jêh ri rup chiông ŭnh chai, hăn rsong ta vah vang lĕ mpa rêh nây; ŭnh hit nchrang jêh ri geh lơp nglaih luh tă bơh ŭnh nây.

¹⁴ Lĕ mpa rêh nây nchuăt ta-aơ ta-ri nâm bu lơp nglaih.

¹⁵ Dôl gâp uănh ma puăn mlâm mpa nây, gâp saơ ta neh geh du mlâm jâng ndeh gŭ êp ta meng puăn mlâm mpô mpa rêh nây, ăp mpa rêh tâm puăn pŭng geh du mlâm jâng ndeh da dê.

¹⁶ Rup jêh ri bu ƀư lĕ jâng ndeh nây nâm bu lŭ khlay bêril nchrat rêp ƀlêp; lĕ rngôch puăn jâng nây tâm ban da dê; rup jêh ri bu ƀư nâm bu jâng ndeh gŭ tâm trôm jâng ndeh êng ri.

¹⁷ Tơlah hăn leo panăp khân păng hăn tĭng puăn mpeh jêh ri mâu rle n'gĭl dôl hăn ôh.

¹⁸ Lĕ jâng ndeh prêh, uănh geh nau klach ngăn jêh ri lĕ puăn jâng ndeh lĕ mpa rêh bêng măt da dê.

¹⁹ Tơlah mpa rêh hăn, lĕ jâng ndeh nây hăn êp kêng pŭng; jêh ri dôl lĕ rngôch mpô mpa rêh hao tă bơh neh, pôri lĕ jâng ndeh nây ăt hao tâm ban lĕ.

²⁰ Ta ntŭk huêng brah hăn khân păng hăn lĕ, jêh ri lĕ jâng ndeh hao ndrel ma khân păng yorlah brah lĕ mpa rêh nây gŭ tâm lĕ jâng ndeh.

²¹ Tơlah ăp mpa rêh hăn, khân păng hăn đŏng; tơlah lĕ mpa rêh nsrŭng, khân păng ăt nsrŭng; jêh ri tơlah ăp lĕ mpa rêh hao klơ tă bơh neh, pôri lĕ jâng ndeh hao klơ ndrel ma khân păng đŏng; yorlah huêng brah mpa nây gŭ tâm lĕ jâng ndeh.

²² Ta klơ lĕ bôk mpa rêh geh du đôr nchrat ang nâm bu lŭ rsang klach ngăn lĭ lam bôk khân păng.

²³ Tâm dâng đôr nây, lĕ nting năr khân păng ling sŏng, nting năr aơ tâm rđĭl đah nting năr ri. Ăp đôr nây geh bar nting năr da dê nkŭm săk jăn khân păng.

²⁴ Tơlah khân păng hăn leo panăp, gâp tăng nteh rpuh lĕ nting năr khân păng nâm bu nteh dak hoch djhut djhut, nâm bu bâr Nơm Geh Lĕ Nau Brah, nteh drơu drơu phung tahan. Tơlah khân păng gŭ nsrŭng, nting năr khân păng nhop.

²⁵ Tơlah khân păng gŭ nsrŭng jêh ri nhop lĕ nting năr, geh nteh huy ngăn luh tă bơh đôr ta klơ bôk khân păng.

²⁶ Ta klơ đôr panăp ta klơ bôk lĕ mpa rêh geh ndơ nâm bu sưng hađăch lŭ khlay saphir, jêh ri ta sưng hađăch nây geh ndơ nâm bu rup du huê bunuyh.

²⁷ Gâp saơ ntơm bơh gang bŭt nơm nây hao plơ̆ klơ gâp saơ nâm bu kông lơp rmah, sol ang nâm bu rup chiông ŭch, jêh ri ntơm bơh gang bŭt nơm nây trŭnh tâm dâng, gâp saơ nâm bu rup chiông ŭnh geh nau ang gŭ jŭm păng.

²⁸ Nchrat nchrang gâp saơ jŭm ntŭk nây nâm bu nau ang bêh tŭng tĭng tâm tŭk dôl nar mih. Nây jêng nau tâm mpơl rup nau chrêk rmah Brah Yêhôva. Tơlah gâp saơ pônây, gâp păn muh măt ta neh jêh ri gâp tăng bâr dôl lah ma gâp.