Êsai 9 - Nau Brah Ndu Ngơi 2023

Nau mbơh lor ma Nơm Mêsia

¹ Phung ƀon lan hăn jêh tâm nau ngo Hŏ saơ jêh nau ang toyh; Phung dôl gŭ tâm bri ngo klĕng. Aƀaơ nau ang sol tâm khân păng.

² May hŏ ăn bĭk rơ̆ jêh ƀon lan nây, Jêh ri May ăn ma khân păng bêng nau răm maak. Khân păng hâk maak tanăp May Tâm ban ma nau maak tâm yan rek, Tâm ban ma bu hâk maak tơlah tâm pă ndơ pit in.

³ Yorlah May hŏ pă jêh mâng mbăk jâk, Mâng rpăt ta săng nglik khân păng, Jêh ri mâng nơm tŭn jot khân păng. Nâm bu May hŏ ƀư tâm rnôk Madian.

⁴ Lĕ rngôch ndrom jâng phung tahan soh tâm nôk tâm lơh, Jêh ri kho ao mprănh mham Bu mra prăp ma ndơ ăn ŭnh sa da dê.

⁵ Yorlah bu deh jêh ma he du huê kon se, Bu ăn jêh ma he du huê kon bu klâu; Nau dơi chiă uănh mra n'gân ta nglik Păng. Bu mra rnha amoh Păng: “jêng Nơm Khlay Ngăn, jêng Nơm Blau Nchră, Jêng Brah Ndu Nau Brah, Jêng Mbơ̆ N'ho ro, jêng Kôranh Brah Đăp Mpăn.”

⁶ Nau dơi Păng chiă uănh ăt hao n'ho ro, Jêh ri nau đăp mpăn mâu mra lôch ôh Ta sưng hađăch Y-Đavit jêh ri ma ƀon bri hađăch Păng, Ƀư ăn nâp jêh ri ăn jŏ jong bri nây Tâm nau di jêh ri nau sŏng srăng, Bơh nar nây tât ƀaƀơ n'ho ro. Nau gơih nđơr tâm Brah Yêhôva ma phung tahan Mra ƀư nau nây!

Brah Ndu mra phat dôih Israel

⁷ Kôranh Brah hŏ njuăl du nau ngơi tâm rdâng đah phung Yakôb, Jêh ri nau ngơi nây tŭp ta ngih phung Israel.

⁸ Lĕ rngôch phung ƀon lan, jêng phung Êphraim jêh ri phung gŭ tâm ƀon Samari, Mra gĭt nau ngơi nây. Sŏk nuih n'hâm sưr n'hao êng, khân păng lah pô aơ:

⁹ “Glo neh uk rlâm jêh, Ƀiălah he mra rdâk tay ma lŭ khlay; Bu kăl chôt jêh tơm sikamôr, Ƀiălah he mra ntrok ma tơm Sêdar ta ntŭk khân păng.”

¹⁰ Yor nây, Brah Yêhôva mra n'hao phung rlăng bơh Y-Rêsin Dâk tâm rdâng đah khân păng, jêh ri nsônh phung rlăng khân păng.

¹¹ Phung Aram panăp, jêh ri phung Philistin pakơi, Hă trôm mbung rvăn phung Israel. Nđâp lah kơt nĕ, nau păng ji nuih mâu du ôh, Ƀiălah ti Păng ăt hôm yơr!

¹² Ƀiălah phung ƀon lan mâu sĭt ôh ma nơm dong khân păng, Mâu lĕ khân păng joi Brah Yêhôva ma phung tahan.

¹³ Yor nây, knŏng tâm du nar, Brah Yêhôva mra koh lơi bơh phung Israel Nđâp bôk jêh ri chiăng, nđâp ma n'gĭng tơm jŏk ndrel ma tơm rpho.

¹⁴ Bôk jêng kôranh bu ranh jêh ri nơm bu yơk Chiăng jêng nơm mbơh lor nti lah nau mƀruh.

¹⁵ Yorlah phung têk ndrêng phung ƀon lan aơ hŏ nhhơt trong jêh, Bi phung njŭn khân păng lĕ roh rai jêh.

¹⁶ Yor nây, Kôranh Brah mâu maak ôh đah phung bu klâu ndăm khân păng, Mâu lĕ yô̆ ma kon đơi jêh ri phung ndrô khân păng. Yorlah ăp nơm khân păng jêng phung mâu blau yơk ma Brah Ndu jêh ri phung ƀai Jêh ri lĕ rngôch trôm mbung ngơi ma nau rluk. Nđâp lĕ nau nây kđôi lĕ, nau Păng ji nuih mâu du ôh, Jêh ri ti păng ăt yơr!

¹⁷ Yorlah nau ƀai sa tâm ban ma ŭnh, Păng sa rtau lok jêh ri pih pŭm, Păng sa lĕ tơm si ta krŏng mbâl, Ƀư ma ŭnh nhhŭk dŭk dŭk mpăr leo klơ.

¹⁸ Yor nau Brah Yêhôva ma phung tahan ji nuih, Bri neh ŭnh sa, phung ƀon lan jêng tâm ban ma ndơ ăn ŭnh sa. Bu mâu geh nhhuach ôh ma oh nâu păng.

¹⁹ Khân păng sŏk ndơ pa ma ƀiălah ât ji ngot, Khân păng sa ndơ pa chiau ƀiălah ăt mâu hơm ôh; Ăp nơm sa nglay săk kon păng nơm.

²⁰ Phung Manasê tâm rdâng đah phung Êphraim, phung Êphraim tâm rdâng đah phung Manasê, Jêh ri ndrel n'grŭp khân păng tâm rdâng ma phung Yuđa. Nđâp ma lĕ nau nây kđôi, nau Păng ji nuih mâu du ôh, Ƀiălah ti Păng ăt hôm yơr!