Êsai 8 - Nau Brah Ndu Ngơi 2023

Nau mbơh lor ma nar Nơm Mêsia

¹ Brah Yêhôva lah ma gâp: “Sŏk hom du pŏk kađar toyh, jêh ri nchih ta nây ma rplay samƀŭt kon bunuyh: ‘Y-Maher-Salal-Has-Bas.’ ”

² Gâp djôt leo phung mbơh răp jăp jêng kôranh ƀư brah Y-Urija jêh ri Y-Sakari, kon bu klâu Y-Yêbêrêkia.

³ Jêh nau nây, gâp hăn gŭ ndrel ma kôranh nơm mbơh lor bu ur, jêh nây păng ntreo jêh ri deh du huê kon bu klâu. Brah Yêhôva lah ma gâp: “Tâm amoh hom păng jêng Y-Maher-Salal-Has-Bas;

⁴ yorlah êlor ma kon se nây gĭt kuăl: ‘Mbơ̆ gâp!’ mâu lah, ‘Mê̆ gâp!’ hađăch Asiri mra hăn sŏk lĕ drăp ndơ bơh Damas jêh ri ndơ pit sŏk bơh Samari.”

⁵ Brah Yêhôva lah tay ma gâp du tơ̆ đŏng pô aơ:

⁶ “Yorlah phung ƀon lan aơ hŏ dun jêh ma n'hong dak Silôê đăp mpăn, jêh ri klach râm nsâr tanăp măt Y-Rêsin ndrel ma kon bu klâu Y-Rêmalia;

⁷ yor nây, Kôranh Brah mra ƀư ăn dak bơh Dak Krong Me hoch thăng ta khân păng, nâm bu ntĭt hađăch bri Asiri ndrel ma lĕ rngôch nau chrêk rmah păng. N'hong dak aơ mra hao ler bêng n'hong jêh ri lip lĕ rngôch kơh,

⁸ n'ho hoch lăp tâm bri Yuđa, hoch ler kơh jêh ri rlêng kŏ tât băm trô ko. Ơ Êmanuel, nting năr păng ling luh nkŭm lĕ bri neh may!”

⁹ Ơ phung ƀon lan, ăn khân may tâm gop jêh ri bu mbang rai! Ơ lĕ rngôch bri ngai, rkêng tôr iăt hom! Rêt hom rse bŭt, jêh ri bu dong nchah; Rêt hom rse bŭt, jêh ri bu dong nchah!

¹⁰ Tâm nchră hom ndrăng khân may, ƀiălah nau nây bu ƀư rai lơi; Mpơl hom nau dăp ƀư, ƀiălah nau nây mâu mra nâp ôh, Yorlah Brah Ndu gŭ ndrel he.

¹¹ Ma ti ktang n'gân ta gâp, Brah Yêhôva ntĭm nti jêh ri mbơh jêh ma gâp lơi hăn ôh tâm trong phung ƀon lan aơ. Păng lah:

¹² “Lơi rnha ôh nau ndơm ma lĕ rngôch nau phung ƀon lan aơ mra rnha nau ndơm! Lơi klach ôh nau khân păng klach, mâu lĕ râm nsâr.

¹³ Ƀiălah ăn khân may klach yơk Brah Yêhôva ma phung tahan jêng kloh ueh. Păng nơm jêng Nơm khân may klach yơk jêh ri râm nsâr.

¹⁴ Păng mra jêng du ntŭk kloh ueh; ƀiălah Păng jêng glo lŭ chêh jâng bu jêh ri lŭ toyh ƀư prah ma lĕ bar đah ndŭl mpôl Israel, ăt jêng tanh srang jêh ri dăk sân ma phung gŭ tâm ƀon Yêrusalem.

¹⁵ Âk bunuyh tâm khân păng mra chêh jâng, cha lôt prah jêh ri nchah; khân păng mra geh dăk jêh ri bu mra nhŭp.

¹⁶ Kât nâp hom nau mbơh, nchăng prăp hom nau nti ta nklang phung oh mon Gâp!”

Phung oh mon Y-Êsai

¹⁷ Gâp mra gŭ kâp Brah Yêhôva, jêng Nơm pôn muh măt Păng bơh ngih Yakôb; gâp mra kâp gân Păng!

¹⁸ Aơ, gâp jêh ri phung kon Brah Yêhôva ăn jêh ma gâp jêng nau mbên khlay jêh ri nau tâm mbơh tâm bri Israel tă bơh Brah Yêhôva ma phung tahan, Nơm gŭ ta yôk Siôn.

¹⁹ Tơlah geh bunuyh đă khân may: “Ăn khân may ôp phung gru rƀên jêh ri phung n'hŭm, jêng phung ngơi bŭk,” ăn khân may plơ̆ lah: “Mâm ƀư du phung ƀon lan mâu ôp ma Brah Ndu khân păng nơm lŏ hăn joi ôp phung khĭt jêh ăn ma phung rêh?”

²⁰ Hăn tĭng hom nau vay jêh ri nau mbơh! Tơlah khân păng mâu ngơi tâm ban pônây, n'hêl nanê̆ mâu mra geh nau ƀhit rvi ang ma khân păng ôh.

²¹ Khân păng mra nsong blêng tâm bri, rêh ni ngăn jêh ri ji ngot ji hir. Tâm nôk khân păng ji ngot, khân păng mra ji nuih, rtăp rak hađăch jêh ri Brah Ndu khân păng nơm. Khân păng mra n'gơr măt leo ta klơ trôk,

²² jêh nây khân păng kŭnh uănh ta neh ntu, ƀiălah knŏng saơ nau rêh ni jêh ri nau ngo, nau rngot klâng; bu mra nklơ̆ khân păng tâm nau ngo mbâl.

²³ Ƀiălah mâu mra hôm geh nau ngo ôh ma phung hŏ dơn nau rngot. Tâm rnôk kăl e, Brah Ndu hŏ ƀư bêk prêng bri Sabulôn jêh ri Naptali; ƀiălah tâm nar kăndơ̆, Păng mra ƀư chrêk rmah bri neh gŭ tâm klơ trong hăn ta dak mƀŭt, jêng mpeh kăl tê̆ dak krong Yurdan, jêng nâm bu n'gor Galilê ma phung bu năch.