Êsai 7 - Nau Brah Ndu Ngơi 2023

Nau mbơh lor ma Êmanuel

¹ Tâm rnôk Y-Ahas chiă uănh, kon bu klâu Y-Jôtham, sau Y-Usia hađăch bri Yuđa, geh Y-Rêsin hađăch bri Aram ndrel ma hađăch bri Israel jêng Y-Pêka, kon bu klâu Y-Rêmalia, leo phung tahan hăn lơh ƀon Yêrusalem, ƀiălah khân păng mâu dơi pit ôh.

² Tơlah bu mbơh ma ngih Y-Đavit pô aơ: “Phung Aram tâm rnglăp jêh đah phung Êphraim,” nuih n'hâm hađăch Ahas nđâp ma phung ƀon lan râm nsâr tâm ban ma tơm si tâm krŏng n'goh n'gơ tanăp sial.

³ Brah Yêhôva lah ma Y-Êsai: “May ndrel kon bu klâu may jêng Y-Sêar-Jasup hăn tâm mâp đah Y-Ahas ta dŭt n'ho rmlông dak bơh nglao klơ, ta trong toyh leo tât ta mir phung ƀư kloh bok.

⁴ Ăn may lah ma Y-Ahas pô aơ: ‘Njrăng hom jêh ri gŭ rklăk, lơi klach ôh, lơi ăn may rdja nuih n'hâm ôh yor bar mlâm yôk ngâl knŏng hôm luh nhhŭk, nây jêng nau Y-Rêsin ji nuih, hađăch Aram, jêh ri kon bu klâu Y-Rêmalia.

⁵ Yorlah Aram ndrel ma phung Êphraim jêh ri kon bu klâu Y-Rêmalia mĭn ŭch ƀư mhĭk ma may, jêh ri lah pô aơ:

⁶ He hăn lơh Yuđa hom, hêk păng jêng âk rngơl, tâm pă păng ma he nơm, jêh ri njêng kon bu klâu Y-Tabel jêng hađăch ta nklang păng.’

⁷ Kôranh Brah jêng Brah Yêhôva lah: ‘Nau nchră nây mâu mra jêng, Nau nây mâu mra tât ôh.

⁸ Yorlah bôk Aram jêng Damas, Bôk Damas jêng Y-Rêsin. (Tâm prao jât ma prăm năm, phung Êphraim mra rai, khân păng mâu hôm jêng du phung ƀon lan đŏng ôh).

⁹ Bôk Êphraim jêng Samari, Bôk Samari jêng Y-Rêmalia. Tơlah khân may mâu iăt nanê̆ ôh, Khân may mra mâu nâp ôh.’”

Nau mbên khlay ma Y-Ahas

¹⁰ Brah Yêhôva ngơi tay đah Y-Ahas:

¹¹ “Dăn hom du nau tâm mbên khlay bơh Yêhôva Brah Ndu may, tâm dâng nau jru tâm ƀon phung khĭt mâu lah tâm klơ trôk.”

¹² Ƀiălah Y-Ahas lah: “Gâp mâu mra dăn ôh jêh ri mâu đŏng janh rlong uănh Brah Yêhôva.”

¹³ Y-Êsai lah: “Hơi ngih Y-Đavit, iăt hom! Mâm khân may lah ƀư rsuak bu jêng nau kan jê̆, kŏ aƀaơ khân may ŭch ƀư rsuak Brah Ndu gâp đŏng?

¹⁴ Yor nây, Kôranh Brah nơm mra ăn du nau tâm mbên khlay ma khân may: Aơ, du huê bu ur druh mra bă ntreo, deh du huê kon bu klâu jêh ri ntơ amoh kon nây jêng Êmanuel.

¹⁵ Kon se nây mra sa dak toh ndrôk jêh ri dak sŭt, kŏ tât păng blau dun nau mhĭk jêh ri săch nau ueh.

¹⁶ Yorlah êlor ma kon se nây blau dun nau mhĭk jêh ri săch nau ueh, pôri bri dak geh bar hê hađăch may klach nây mra jêng rngot njăp.

¹⁷ Brah Yêhôva mra ăn tât ma may, ma phung ƀon lan may jêh ri ma ta ngih hađăch lĕ nar nau tât ê mâp geh ntơm bơh nar phung Êphraim tâm nkhah đah phung Yuđa, nĕ jêng nar Brah Ndu mra njuăl hađăch Asiri tât.”

¹⁸ Tâm nar nây, Brah Yêhôva mra uh nŭng kuăl huăch rhuay gŭ nglĕ dŭt tâm ăp dak krong bri Êjipt jêh ri kuăl sŭt bơh bri Asiri tât.

¹⁹ Lĕ rngôch khân păng mra văch tâm lĕ rngôch rlŭng jru, tâm lĕ mpir lŭ, lĕ trôm lŭ, tâm lĕ rngôch pŭm lok jêh ri ndrêch gơ̆.

²⁰ Tâm nar nây, Kôranh Brah mra dŏng pêh poih nkhôm mpeh đah ri dak krong, jêng hađăch bri Asiri, gay poih bôk jêh ri rsau jâng khân may, jêh ri poih nđâp ma têp kang tâm ban lĕ.

²¹ Tât nôk nây, ăp nơm lĕ knŏng dơi mât tâm du mlâm ndrôk me druh jêh ri bar mlâm biăp.

²² Ƀiălah khân păng ăn âk ngăn dak toh, yor ri bu mra sa glo dak toh, yorlah lĕ rngôch phung hôm klen tâm bri mra mât khân păng nơm ma glo dak toh jêh ri dak sŭt.

²³ Tât nôk nây, ta ăp ntŭk tăm du rbăn tơm krăk ƀâu, rnoh khlay du rbăn rlay prăk, mra hon bêng rtau lok jêh ri pih pŭm.

²⁴ Bu nâm ŭch mŭt ta nây, ăn păng djôt hăr jêh ri na, yorlah lĕ bri geh knŏng rtau lok jêh ri pih pŭm.

²⁵ Khân may mâu hôm đŏng hăn tâm mir yôk khân may hŏ vay kai pŏk yorlah klach ma rtau lok jêh ri pih pŭm; ƀiălah ntŭk nây mra jêng ntŭk bu mra mƀơk ndrôk jêh ri ăn biăp jot hăch ntŭk nây.