Êsai 66 - Nau Brah Ndu Ngơi 2023

Nau chrêk rmah Yêrusalem mhe. – Nau rai lôch phung mhĭk

¹ Brah Yêhôva lah: “Trôk jêng sưng hađăch Gâp, Neh ntu jêng rnơl chrong jâng Gâp, Moh ngih khân may mra ŭch rdâk ma Gâp? Moh ntŭk jêng ntŭk ma Gâp gŭ rlu?

² Ti Gâp rhăk njêng jêh lĕ rngôch ndô ndơ aơ, Jêh ri lĕ rngôch ndơ nây jêng jêh.” Brah Yêhôva lah pônây. “Aơ jêng bunuyh Gâp uănh, Jêng nơm dêh rhêt jêh ri geh huêng rngot ma nau tih, Nơm klach râm nsâr ma nau Gâp ngơi.

³ Mbu nơm nkhĭt du mlâm ndrôk jêng tâm ban ma nơm nkhĭt du huê bunuyh; Nơm nhhơr kon biăp ƀư mpa ƀư brah tâm ban ma nơm nkê̆ch juet lơi trô ko so; Nơm nhhơr ndơ ƀư brah rnih môi jêng tâm ban ma nơm nhhơr mham sŭr; Nơm su ndơ ƀâu kah jêng tâm ban ma nơm yơk mbah ma rup brah. Yorlah khân păng săch tĭng trong khân păng nơm, Jêh ri nuih n'hâm khân păng knŏng maak ƀư lĕ nau ƀơ̆ ƀơch.

⁴ Gâp mra săch lĕ nau ƀư rêh ni ma khân păng, Mra ăn tât ma khân păng nau klach kir. Yorlah Gâp kuăl jêh ƀiălah mâu geh nơm plơ̆ lah ôh, Gâp ngơi jêh ƀiălah khân păng mâu iăt ôh; Khân păng ƀư jêh nau mhĭk tâm dâng măt Gâp, Jêh ri săch nau Gâp mâu maak.”

Brah Yêhôva koh dŏng ma Siôn

⁵ Ơ khân may jêng phung râm nsâr ma nau Ngơi Brah Yêhôva, Iăt hom nau Brah Yêhôva: “Phung oh nâu khân may tâm rmot ma khân may Jêh ri mƀăr lơi khân may yor amoh Gâp, khân păng geh lah pô aơ: ‘Ăn Brah Yêhôva geh nau chrêk rmah, Gay ma hên dơi saơ nau răm maak khân may!’ Ƀiălah khân păng yơh mra bêk.”

⁶ Iăt hom, geh bâr drơu drơu bơh ƀon toyh, Geh nau nter bơh ngih brah, Păng jêng bâr Brah Yêhôva, Nơm plơng bôk ma phung rlăng đah Păng.

⁷ Lor ma ntơm ji deh, Bu ur me hŏ deh kon; Êlor ma nau ji deh tât, Păng deh jêh ma du huê kon bu klâu.

⁸ Mbu nơm mâp tăng nau tâm ban pônây? Mbu nơm mâp saơ nau geh tâm ban pônây? Geh lĕ du bri dak ji deh tâm du nar, Mâu lah du ndŭl mpôl bunuyh bu deh tâm du nar dơm? Bi ma ƀon Siôn ntơm bê̆ch veng ŭnh, Hŏ deh kon jêh.

⁹ Brah Yêhôva lah: “Gâp nơm yơh pơk rnăn ăn bu ur me dơi deh, Mâm ƀư lŏ mâu ăn deh? Mâu lah Gâp jêng Nơm ăn bu dơi deh king đŏng nau deh?” Brah Ndu khân may lah pônây.

¹⁰ Ơ lĕ rngôch phung rŏng ma Yêrusalem! Hâk maak hom ma păng, maak hom yor păng. Ơ lĕ rngôch phung rngot klâng ma Yêrusalem! Maak ndrel hom ma păng.

¹¹ Gay ma khân may dơi pu jêh ri hơm ma dak toh Dak toh nau păng tâm bonh leng; Gay khân may dơi nhêt jêh ri mpay Tă bơh ma nau chrêk rmah bêng ler păng.

¹² Yorlah Brah Yêhôva lah: “Aơ, Gâp mra ăn nau đăp mpăn hor hoch tât ta păng tâm ban ma du n'hong dak krong, Jêh ri nau chrêk rmah lĕ bri dak bêng ler tâm ban ma n'hor dak; Khân may mra pu, bu mra chông khân may ta pŭng vĕ, Jêh ri rbot ta kômâk.

¹³ Gâp mra bonh leng khân may Tâm ban ma me bonh leng kon păng, Khân may mra geh nau tâm bonh leng tâm Yêrusalem.”

Nau chiă uănh jêh ri nau Brah Ndu ji nuih

¹⁴ “Khân may mra saơ nau nây, jêh ri nuih n'hâm khân may mra răm maak; Nting khân may mra bĭk rơ̆ tâm ban gơ̆ nse. Bu mra gĭt ti Brah Yêhôva gŭ ndrel ma phung oh mon Păng, Jêh ri Păng mra ji nuih ma phung rlăng đah Păng.

¹⁵ Yorlah aơ, Brah Yêhôva mra văch tâm ŭnh, Jêh ri ndeh seh Păng mra jêng tâm ban ma sial vănh blông, Gay nkhŭt nau Păng ji nuih ktang, Jêh ri nau Păng nduyh tâm chiông ŭnh hit.

¹⁶ Yorlah Brah Yêhôva mra dŏng ŭnh jêh ri đao Gay phat dôih lĕ rngôch nglay săk; Jêh ri phung Brah Yêhôva nkhĭt mra jêng âk.

¹⁷ Phung prăp ƀư kloh khân păng nơm lăp tâm lĕ đang trao yơk mbah rup brah ta nklang đang trao, sa puăch sŭr, puăch đe jêh ri lĕ ndơ ƀơ̆ ƀơch êng, mra khĭt ndrel n'grŭp,” Brah Yêhôva lah pônây.

¹⁸ “Bi Gâp, Gâp gĭt năl nau kan jêh ri nau mĭn khân păng. Tât năng, Gâp mra văch tâm rƀŭn lĕ rngôch bri dak jêh ri lĕ rngôch nau ngơi; khân păng mra văch jêh ri saơ nau chrêk rmah Gâp.

¹⁹ Gâp mra dơm du nau mbên ta nklang khân păng, jêh ri Gâp mra njuăl phung hôm gŭ rêh klen khân păng hăn tât ma lĕ bri dak jêng Tarsis, Pul, Lut, jêng phung geh blau pănh na, tât ma phung Tubal jêh ri phung Javan, tât ma lĕ gôl dak mƀŭt gŭ ngai, jêng lĕ ntŭk phung ê hŏ mâp tăng lư ôh nau lư n'găr Gâp jêh ri ê hŏ mâp saơ ôh nau chrêk rmah Gâp. Khân păng mra mbơh nau chrêk rmah Gâp ta nklang lĕ bri dak.”

²⁰ Brah Yêhôva lah: “Phung bu năch mra njŭn lĕ rngôch phung oh nâu khân may plơ̆ sĭt bơh lĕ rngôch bri dak. Khân păng rdeng khân may klơ seh, ndeh, tâm ưn, ncho seh bri jêh ri seh samô, hăn ta yôk kloh ueh Gâp jêng Yêrusalem, gay nhhơr khân păng tâm ban ma du mpa nhhơr ma Brah Yêhôva; tâm ban đŏng phung Israel djôt leo mpa nhhơr tâm ndơ dŏng kloh rsang lăp ma ngih Brah Yêhôva.”

²¹ Brah Yêhôva lah: “Gâp ăt mra săch phung ƀaƀă tâm khân păng ăn jêng kôranh ƀư brah jêh ri phung Lêvi.”

²² “Yorlah tâm ban ma trôk mhe jêh ri neh mhe Gâp rhăk njêng jêh, Mra ăt hôm e tanăp Gâp tâm ban kơt nây lĕ, Noi deh jêh ri amoh săk năm deh khân may mra ăt hôm e nâm bu kơt nây lĕ.” Brah Yêhôva lah pônây.

²³ Brah Yêhôva lah: “Bơh ăp khay mhe aơ tât ma khay mhe êng, Bơh ăp nar saƀat aơ tât ma saƀat ri Lĕ rngôch nglay săk mra văch gay yơk mbah tanăp Gâp.

²⁴ Khân păng mra luh hăn jêh ri saơ săk jăn phung bunuyh tâm rdâng jêh đah Gâp; ndrŭng tâm săk khân păng mâu mra khĭt ôh, ŭnh sa khân păng mâu blau nhhât ôh, jêh ri khân păng mra jêng ndơ ƀơ̆ ƀơch ma lĕ rngôch bunuyh.”