Êsai 65 - Nau Brah Ndu Ngơi 2023

Nau phat dôih sŏng srăng jêh ri nau yô̆ tâm rklaih

¹ Phung bunuyh mâu mâp dăn ôp ma Gâp, hŏ mbơh sơm dăn Gâp; Phung bunuyh mâu joi Gâp, hŏ mâp jêh đah Gâp. Gâp lah ma du ndŭl mpôl bunuyh mâu mâp mbơh sơm ma amoh Gâp pô aơ: “Ta aơ Gâp, aơ ta aơ Gâp!”

² Lĕ nar Gâp yơr ti Mpeh du phung ƀon lan vay tâm rdâng; Jêng phung hăn tâm trong mâu ueh, Tĭng nâm nau mĭn khân păng nơm;

³ Jêng phung ƀon lan mâu rlu nsônh nau ji nuih ma Gâp, Nđâp tanăp muh măt Gâp: Khân păng nhhơr mpa ƀư brah tâm lĕ đang trao, Su ndơ ƀâu kah ta klơ lĕ mbŭch ƀrĭk,

⁴ Gŭ tâm ntŭk môch Gŭ lĕ măng tâm ntŭk ndâp Gay sa puăch sŭr, Prăp dak gâm puăch ƀơ̆ tâm ngan khân păng.

⁵ Pôri khân păng nănh lah pô aơ: “Du hom may, Lơi văch dăch gâp ôh, yorlah gâp jêng kloh ueh lơn ma may!” Phung nây jêng tâm ban ma nhhŭk ŭnh tâm trôm trô muh Gâp, Tâm ban ma ŭnh hit nar măng.

⁶ Aơ jêng nau hŏ nchih prăp jêh tanăp Gâp: “Gâp mâu mra gŭ rklăk ôh, ƀiălah mra plơng bôk; Ngăn yơh, Gâp mra plơng bôk di nanê̆

⁷ Nau tih khân may tâm ban ma nau tih phung chô yau khân may.” Brah Yêhôva lah pônây; “Yorlah khân păng hŏ su ndơ ƀâu kah ta klơ lĕ yôk, Jêh ri suai rak Gâp ta klơ lĕ dor yôk, Rĭ dĭng Gâp mra veh nau kan khân păng nôk kăl e Jêh ri plơng bôk tĭng nâm kan khân păng ƀư jêh.”

⁸ Pô aơ Brah Yêhôva lah: “Lah bu saơ ndrănh mhe tâm rkŭm play krăk ƀâu Pôri bu lah: ‘Lơi ƀư rai păng ôh, Yorlah tâm păng geh nau ueh lăng;’ Gâp ăt mra ƀư tâm ban pônây yor phung oh mon Gâp, Gay ma Gâp mâu ƀư rai lĕ rngôch khân păng.

⁹ Gâp mra ƀư ăn du noi deh luh bơh Yakôb, Jêh ri geh du huê bunuyh ndơn drăp lĕ yôk Gâp, luh bơh Yuđa; Phung Gâp hŏ săch mra ndơn păng, Jêh ri phung oh mon Gâp mra gŭ ta nây.

¹⁰ Ma phung ƀon lan Gâp, phung tĭng joi jêh Gâp, Sarôn mra jêng ntŭk ndrêch gơ̆ ma phung biăp, Jêh ri rlŭng Akôr mra jêng ntŭk rlu ma phung ndrôk kuen.

¹¹ Bi ma khân may, jêng phung chalơi jêh Brah Yêhôva Jêh ri chuêl yôk kloh ueh Gâp; Jêng phung nkra sưng sông sa ma brah Ƀŭn Lap, Jêh ri kêt bêng ndrănh tâm lŭk ăn ma brah Veh;

¹² Gâp mra tâm nal khân may ma đao, Lĕ rngôch khân may mra chon mon dơn nau bu nkhĭt; Yorlah Gâp hŏ kuăl ƀiălah khân may mâu plơ̆ lah ôh, Gâp ngơi jêh ƀiălah khân may mâu iăt. Khân may ƀư jêh nau mhĭk tâm dâng măt Gâp, Jêh ri hŏ săch jêh nau mâu ƀư maak ma Gâp.”

¹³ Yor nây, Kôranh Brah Yêhôva lah: “Aơ, phung oh mon Gâp mra sông sa, Bi khân may mra ji ngot; Aơ, phung oh mon Gâp mra nhêt, Bi khân may mra ji hir; Aơ, phung oh mon Gâp mra maak, Bi khân may mra geh nau bêk;

¹⁴ Aơ, phung oh mon Gâp mra mprơ yor nuih n'hâm maak, Bi khân may mra nter vơl yor nuih n'hâm bêng ma nau rngot, Jêh ri mra nhĭm nhhiăng yor huêng khân may rai yot.

¹⁵ Bu mra prăp amoh săk khân may Gay ma phung Gâp săch jêh ƀư nau rak rtăp; Kôranh Brah Yêhôva mra nkhĭt khân may, Ƀiălah Păng mra rnha phung oh mon Păng ma amoh êng.

¹⁶ Yor nây, mbu ta klơ neh ntu mbơh sơm nau ueh lăng ma păng nơm Mra sŏk amoh Brah Ndu nanê̆ ngăn ma nau mbơh sơm; Jêh ri mbu ta klơ neh tâm ton Mra sŏk amoh Brah Ndu nanê̆ ngăn ma nau tâm ton. Yorlah nau rêh ni kăl e chuêl jêh, Jêh ri mâu hôm mpơl tanăp măt Gâp.”

Chrêk rmah tâm nau rhăk njêng mhe

¹⁷ “Yorlah aơ, Gâp mra rhăk njêng trôk mhe jêh ri neh mhe; Bu mâu hôm kah gĭt ôh ma lĕ ndơ kăl e, Mâu lĕ bu hôm mĭn ma ndơ nây.

¹⁸ Ƀiălah maak hom jêh ri hâk răm hom mro mrăng Ma lĕ nau Gâp hŏ rhăk njêng; Yorlah aơ, Gâp rhăk Yêrusalem jêng nau hâk răm, Jêh ri phung ƀon lan păng jêng nau maak.

¹⁹ Gâp mra hâk maak yor Yêrusalem, Gâp mra maak yor phung ƀon lan Gâp; Ta ntŭk nây bu mâu mra tăng ôh bâr nhĭm, Mâu lah bâr nter nau nđêh nji đŏng.

²⁰ Ta nây mâu mra geh ôh phung kon se khĭt gơnh, Mâu lĕ geh phung bu ranh mâu rĭng năm; Yorlah khĭt nôk du rhiăng năm, kơp jêng khĭt mom, Jêh ri nơm knŏng rêh tât du rhiăng năm bu mra kơp jêng nơm geh nau rak rtăp.

²¹ Bu mra ndâk ngih jêh ri gŭ ta nây, Mra tăm đang krăk ƀâu jêh ri sa play păng.

²² Khân păng mâu mra ndâk ngih ăn nơm êng gŭ ôh, Mâu lĕ tăm đang krăk ƀâu ăn nơm êng sa. Yorlah nar phung ƀon lan Gâp gŭ rêh mra jêng tâm ban ma nar tơm si gŭ rêh; Phung Gâp săch mra dơn ndơ tă bơh kan ti khân păng nơm ƀư.

²³ Khân păng mâu mra pah kan dơm dam ôh, Nau tât ji tưp ndal mâu tât ma phung kon khân păng ôh; Yorlah khân păng jêh ri phung kon sau khân păng Jêng noi deh Brah Yêhôva ăn nau ueh uĭn.

²⁴ Êlor ma khân păng kuăl mbơh sơm, Gâp mra dơn ro; Dôl khân păng hôm ngơi, Gâp tăng jêh.

²⁵ So bri jêh ri kon biăp mra sa gơ̆ ndrel, Yau mŭr mra sa rhe nâm bu ndrôk, Bêh mra sa ndruyh neh. Mra mâu hôm geh nơm phă mâu lah ƀư rai Ta lĕ yôk kloh ueh Gâp.” Brah Yêhôva lah pônây.