Êsai 64 - Nau Brah Ndu Ngơi 2023

Nau mbơh sơm phung ƀon lan Păng

¹ Ơ! Ueh lơn ma May hêk lĕ ndâr trôk jêh ri jŭr văch, Ƀư ma yôk n'gơ n'găr tanăp May;

² Tâm ban ma ŭnh sa long kro, Tâm ban ma ŭnh ƀư khuh dak, Gay ăn phung rlăng đah May gĭt amoh May, Jêh ri lĕ phung ndŭl mpôl bunuyh râm nsâr tanăp May.

³ Lah May ƀư lĕ nau kan krit kir hên mâu geh kâp gân ôh, Pôri May jŭr, jêh ri yôk n'gơ n'găr tanăp May da dê.

⁴ Bơh rnôk ơm, bu mâu mâp tăng ôh, Tôr mâu mâp tăng, măt mâu mâp saơ, Rlau ma May, Mâu geh Brah Ndu êng ôh, Nơm hŏ pah kan kơl kơt nĕ ma phung gŭ kâp Păng.

⁵ May vơt dơn nơm pah kan sŏng srăng ma nau răm, Phung hăn tâm trong May jêh ri kah gĭt ma May. Aơ, May ji nuih jêh yorlah hên hŏ ƀư tih; Gŭ jŏ tâm nau tih kơt nĕ hên hôm geh nau tâm rklaih lĕ?

⁶ Lĕ rngôch hên jêng jêh tâm ban ma ndơ ƀơ̆ ƀơch, Lĕ kan sŏng srăng hên jêng tâm ban ma bok ao ƀơ̆ jêh; Lĕ rngôch phung hên nhop kro tâm ban ma n'ha si, Jêh ri nau kue hên khôm rdu hên tâm ban ma sial.

⁷ Mâu geh nơm kuăl mbơh sơm ma amoh May, Mâu lah nsrôih kuăn May; Yorlah May pôn jêh muh măt bơh hên, Gay ma hên rai lôch tâm nau kue hên.

⁸ Ƀiălah, ơ Brah Yêhôva, aƀaơ May ăt jêng Mbơ̆ hên; Hên jêng neh uk, jêh ri May jêng nơm blau mon glah; Lĕ rngôch hên jêng kan ti May ƀư.

⁹ Ơ Brah Yêhôva, lơi nuih rlau keh ôh, Mâu lĕ kah gĭt n'ho ro ma nau tih hên! Aơ, hên dăn May mêt uănh, Lĕ rngôch hên jêng phung ƀon lan May.

¹⁰ Lĕ rngôch ƀon kloh ueh May hŏ jêng bri rdah, Siôn ăt jêng bri rdah, Yêrusalem jêng ntŭk rngot njăp.

¹¹ Ngih brah hên kloh ueh, Jêng ntŭk phung chô yau hên tâm rnê ma May Bu su jêh ma ŭnh; Lĕ rngôch ndơ khlay hên bu ƀư rai da dê jêh.

¹² Ơ Brah Yêhôva, lĕ kơt aơ nau tât, Mâm nuih n'hâm May hôm dun? Mâm May hôm gŭ rklăk Gay ƀư rêh ni hên rlau keh?