Êsai 63 - Nau Brah Ndu Ngơi 2023

Nar plơng bôk jêh ri tâm rklaih

¹ Nơm bơh ƀon Bôsra bri Êđôm văch, Nsoh bok ao chăng rhưch, ndơ nsoh chrêk rmah, Nhuat hăn rnam ma nau ktang dŭt toyh, Mbu moh Nơm aơ? “Gâp yơh, Nơm mbơh nau sŏng srăng, Nơm brah dơi tâm rklaih!”

² Mâm ƀư kho ao Kôranh Brah chăng rhưch, Ndơ nsoh Păng jêng tâm ban ma ndơ nsoh nơm jot play krăk ƀâu tâm drŏng?

³ “Knŏng du huê Gâp jot ta ntŭk drŏng păt play krăk ƀâu, Mâu geh du huê tâm phung ƀon lan gŭ ndrel ma Gâp ôh. Gâp jot jêh khân păng tâm nôk Gâp ji nuih, Jot nchah jêh khân păng ma nau Gâp ji nuih; Mham khân păng tâm ban ma dak krăk ƀâu mprănh ta bok ao Gâp Lĕ rngôch kho ao Gâp krêp mham da dê.

⁴ Yorlah nuih n'hâm Gâp hŏ dăp nal jêh ma nar plơng bôk, Jêh ri năm Gâp tâm chuai tât jêh.

⁵ Gâp uănh, mâu geh nơm kơl ôh; Gâp hih rhâl, mâu geh nơm tâm kơl; Rĭ dĭng ti Gâp nơm yơh kơl Gâp, Nau Gâp ji nuih kơl Gâp.

⁶ Tâm nau ji nuih, Gâp jot plên phung ndŭl mpôl bunuyh; Gâp ăn khân păng nhŭl yorlah nau Gâp ji nuih, Jêh ri Gâp ƀư pling jêh mham khân păng ta neh.”

Nau Brah Ndu yô̆ nđach jêh ri nau mâu răp jăp phung ƀon lan Păng

⁷ Gâp nkah tay nau ueh bơh Brah Yêhôva, Jêh ri nau tâm rnê ma Brah Yêhôva, Yorlah tĭng nâm lĕ nau Brah Yêhôva ƀư ăn jêh ma he, Jêh ri Păng ăn nau ueh âk toyh ma ngih Israel, Tĭng nau Păng yô̆ nđach, Jêh ri nau ueh bơh Păng mâu blau dŭt.

⁸ Yorlah Păng lah jêh: “Nanê̆, khân păng jêng ƀon lan Gâp, Jêng phung kon mâu mra ndơm mƀruh ôh.” Jêh ri Păng jêng Nơm Tâm Rklaih khân păng.

⁹ Tâm lĕ rngôch nau rêh ni tât ma ƀon lan Păng, Păng ăt geh nau rêh ni lĕ, Jêh ri tông mpăr tanăp Păng hŏ rklaih jêh khân păng. Yorlah nau rŏng jêh ri nau yô̆ nđach, Păng yơh tâm chuai jêh khân păng; Păng hŏ ut ra-u jêh ri chông leo khân păng dôl tâm lĕ nar rnôk kăl e.

¹⁰ Ƀiălah khân păng hŏ tâm rdâng Jêh ri ƀư rngot jêh Brah Huêng Ueh Păng; Yor nây, Păng plơ̆ jêng nơm rlăng đah khân păng, Păng nơm yơh tâm lơh đah khân păng.

¹¹ Nôk nây, phung ƀon lan Păng kah gĭt Ma Y-Môis rnôk kăl e jêh ri ôp: “Mbah ntŭk Nơm hŏ njŭn leo rmăk biăp Jêh ri phung biăp luh hao bơh dak mƀŭt? Mbah ntŭk Nơm dơm jêh Brah Huêng Ueh Păng Ta nklang khân păng?”

¹² Nơm ƀư ăn ti nau chrêk rmah Păng Hăn pa ma Y-Môis, Jêng Nơm hŏ nkhah jêh dak tanăp khân păng, Gay amoh lư n'găr n'ho ro;

¹³ Jêng Nơm hŏ leo phung ƀon lan Păng rgăn klơ lĕ rbuh, Tâm ban ma du mlâm seh nchuăt tâm bri rdah ƀiălah khân păng mâu chêh prah ôh.

¹⁴ Brah Huêng Ueh Brah Yêhôva hŏ ƀư ăn jêh ma phung ƀon lan Păng gŭ rlu, Tâm ban ma phung mpô mpa rong jŭr hăn ta rlŭng joi ntŭk rlu. May njŭn jêh phung ƀon lan May Gay amoh May dơi chrêk rmah.

Nau mbơh sơm rmal nau tih

¹⁵ Bơh trôk, dăn Kôranh Brah mêt uănh, Bơh ntŭk May gŭ kloh ueh jêh ri chrêk rmah, dăn May mêt uănh! Mbah nau duh nđơr jêh ri kan nau brah May? Nau May rŏng jêh ri yô̆. Bu hŏ king jêh ƀơh!

¹⁶ Nanê̆, May jêng Mbơ̆ hên; Nđâp tơlah Y-Abraham mâu gĭt năl ôh hên, Jêh ri Y-Israel mâu lĕ dơn hên; Ơ Brah Yêhôva, May yơh jêng Mbơ̆ hên, Bơh rnôk n'ho ro May jêng Nơm Tâm Chuai hên.

¹⁷ Ơ Brah Yêhôva, mâm ƀư May ăn hên nkhah du bơh trong may? Mâm dĭng ăn nuih n'hâm hên dăng kŏ tât hên mâu hôm klach yơk ma May ôh? Yor phung oh mon May jêh ri phung ndŭl mpôl drăp ndơn May. Dăn Kôranh Brah plơ̆ sĭt hom!

¹⁸ Phung ƀon lan kloh ueh May geh n'gor aơ mâu hŏ jŏ ôh, Ƀiălah phung rlăng đah hên jot jêh ntŭk kloh ueh May.

¹⁹ Jŏ jêh, hên jêng jêh tâm ban ma phung May mâu mâp chiă uănh, Jêh ri mâu hôm geh kuăl amoh May đŏng ôh.