Êsai 60 - Nau Brah Ndu Ngơi 2023

Nau chrêk rmah Yêrusalem tâm nar kăndơ̆

¹ Dâk hom jêh ri sol ang hom! Yorlah nau ang may tât jêh, Jêh ri nau chrêk rmah Brah Yêhôva sol ang jêh ta klơ may.

² Aơ, nau ngo nkŭm neh ntu, Nau ngo mbâl nkŭm phung ƀon lan; Ƀiălah Brah Yêhôva sol ang ta klơ may, Nau chrêk rmah Păng mpơl ta klơ may.

³ Lĕ bri dak mra văch ma nau ang may, Lĕ phung hađăch mra n'gĭl nau ang ơm ôi chrêk lơp may.

⁴ N'gơr hom măt may jêh ri uănh văr jŭm; Lĕ rngôch khân păng tâm rƀŭn ndrel, văch ma may. Phung kon bu klâu may mra văch tă bơh ntŭk ngai, Bu chông ta ti phung kon bu ur may.

⁵ Rnôk nây, may mra saơ jêh ri chrat ang, Nuih n'hâm may ƀă klach ƀă pơk huy; Yorlah nau rmeh ler bơh dak mƀŭt bu mra njŭn ma may, Drăp ndơ phung ndrŏng bơh lĕ bri dak mra văch ma may.

⁶ Âk râk seh samô mra nkŭm bri neh may, Nđâp ma kon seh samô bơh bri Madian jêh ri bri Êpha; Lĕ rngôch phung bơh Sêba mra văch. Khân păng djôt leo mah jêh ri ndơ ƀâu kah, Jêh ri mra nhhơr nau mprơ tâm rnê ma Brah Yêhôva.

⁷ Lĕ rngôch phung mpô mpa rong bơh bri Kêdar mra tâm rƀŭn ta may, Lĕ rngôch biăp nkuăng bơh bri Nêbajôt mra dơi dŏng ƀư ndơ ƀư brah. Gay ma may nhhơr ta nơng ƀư brah Gâp, du ndơ ƀư brah ueh nuih n'hâm Gâp; Jêh ri Gâp mra ƀư ma ngih chrêk rmah Gâp lơ hâu ntop nau chrêk rmah.

⁸ Mbu nơm phung aơ mpăr tâm ban ma ndâr tŭk, Tâm ban ma sĭm plŭk mpăr sĭt ma rsuăn khân păng?

⁹ Lĕ gôl dak mƀŭt mra kâp gân Gâp; Mpôl kumpăn bơh bri Tarsis văch lor lơn mra njŭn phung kon may bơh ngai plơ̆ sĭt, Ndrel ma prăk jêh ri mah khân păng, Gay ma tâm rnê amoh Yêhôva Brah Ndu may, Nơm Kloh Ueh Israel, Yorlah Păng ăn jêh nau chrêk rmah ma may.

Yêrusalem dơi ndâk tay

¹⁰ Phung bu năch mra rdâk tay mpêr ƀon may, Phung hađăch khân păng mra pah kan ma may. Yorlah tâm nau Gâp ji nuih, Gâp hŏ dong may, Ƀiălah aơ Gâp lŏ yô̆ ma may, tĭng nau yô̆ Gâp.

¹¹ Lĕ mpông ƀon may ăt mra pơk mro, Lĕ nar nđâp măng bu mâu nchăng khân păng ôh, Gay ma bu dơi njŭn ăn ma may drăp ndơ lĕ bri dak, Jêh ri njŭn phung hađăch khân păng sĭt ƀư bu nă.

¹² Yorlah mbu ndŭl mpôl jêh ri ƀon bri hađăch Mâu ŭch tông bâr ma may mra rai lôch; Bu mra ƀư rai lơi phung ndŭl mpôl nây lĕ ƀhiau.

¹³ Tơm si chiprơ, tơm si n'ho jêh ri tơm si buis jêng nau chrêk rmah bri Liban, Ăt mra njŭn ma may, Ŭch ƀư ueh ngih brah kloh ueh Gâp; Gâp mra ăn chrêk rmah ntŭk Gâp chrong jâng.

¹⁴ Phung kon bu klâu phung tŭn jot may Mra văch kŭnh bôk văch ma may; Lĕ rngôch phung tâm rmot ma may Mra chon mon tanăp jâng may. Khân păng mra rnha may jêng Ƀon Brah Yêhôva. Jêng Ƀon Siôn ma Nơm Kloh Ueh Israel.

¹⁵ Ntrok bu hŏ chuêl jêh ri tâm rmot jêh ma may, Kŏ tât mâu geh nơm hăn rgăn ta ntŭk may ôh, Ri mơ Gâp mra ăn may nau yơk mro mrăng, Jêh ri jêng nau răm maak ma âk rô̆.

¹⁶ May mra nhêt dak toh lĕ rngôch bri dak, Pu toh phung hađăch. May mra gĭt Gâp yơh, Brah Yêhôva, jêng Nơm Tâm Rklaih may, Jêh ri Nơm Tâm Chuai may jêng Nơm Geh Lĕ Nau Brah phung Yakôb.

¹⁷ Gâp mra ăn mah ntrok ma kông, Gâp mra ăn prăk ntrok ma loih, Kông ntrok ma tơm si, Loih ntrok ma lŭ. Gâp mra ƀư ăn nau đăp mpăn mât mray may Jêh ri nau sŏng srăng chiă uănh may.

¹⁸ Bri may mâu mra đŏng tăng ôh nau djơh janh, N'gor may mâu đŏng hôm nau jêng rngot njăp rlâm rai nchah. May mra rnha mpêr ƀon may jêng “Nau Tâm Rklaih” Jêh ri kuăl mpông ƀon may jêng “Nau Tâm Mprơ Rnê.”

Brah Ndu jêng nau chrêk rmah Siôn

¹⁹ May mâu hôm mra nsing nar Sol ang nôk nar, Jêh ri mâu hôm ŭch đă khay Sol ang nôk măng; Yorlah Brah Yêhôva mra jêng nau ang n'ho ro ma may, Brah Ndu may mra jêng nau chrêk rmah may.

²⁰ Nar may mâu hôm nhâp đŏng ôh, Khay mâu mra ndâp ôh; Yorlah Brah Yêhôva mra jêng nau ang n'ho ro ma may, Lĕ nar may rngot klâng lôch jêh.

²¹ Lĕ rngôch phung ƀon lan may mra jêng sŏng srăng da dê, Jêh ri khân păng mra dơn bri nây n'ho ro. Khân păng jêng nkeh nse Gâp tăm jêh, Jêng kan ti Gâp ƀư jêh, gay ma Gâp geh nau chrêk rmah.

²² Nơm djê̆ lơn mra geh rbăn phung kon sau, Nơm rdja lơn mra jêng du mpôl băl bunuyh ktang. Gâp jêng Brah Yêhôva, Gâp mra ƀư gơnh nau nây di nau tâm nal!